Chin ramkulh Hakha in Falam ih lut ralhrang pawl cu mipi ralkap komkhawm in lamzin tlunah an rak do rero ih, tu ahcun ralhrang pawl cu Falam in Kalaymyo lam an pan zo.
Falam le Hakha karlak ih doawknak tlunah Falam peng sungih doawknak thuhla famkim khal May 10 cu CNDF in mipi theihternak an nei ih, ralhrang 26 an thi tin an tarlang.
CNDF cun “2022 May 2 ni ah Raldonak Tank pa (2), SAC ralhrang mawtaw (20) luan Ralhrang mipum (170) hrawng cu, Chin Ramkulh, Hakha ihsin Falam lam pan in an ra ih May 4 le ni 5 ah hmunram kilhimtu tangkop pawl cun peng (26) le Peng (20) hmun ihsin kan rakbawh ih, Mine puah in kan domi ah SAC ralhrang lam mi (18) an thi. Tangkop mipi ralkap lam ihsin Pa raltha pa 8 in ram le miphun hrang ah an nunnak an pe.
Cui ni ah Ramthlo khua inn (10) le Tlangzar khua inn (17) SAC ralhrang pawl in an urkang. May (6) ah CNDF in peng 16 lan ihsin Mine kan rak puah ih ralhrang 8 hrawng an thi ih hriamhma ngah khal an tam.
Cui ni ah CNDF lam ih Him ten dung kan sip sal thei nan, May (7) ah Mine puahawk sual pang raung ah CNDF ralkap pakhat a Nunnak a liam a si,” tin mipi an theihter.
Doawknak thi mipi ralkap lam 8 an um bangin bomb cangsualnak ruangah mipi ralkap thi thawn mipi ralkap 10 kan can tin CDF cun mipi theihternak an rak nei zo.
Kalay Ah Ralhrang 14 An Thi – Sagaing ramthen Kalaymyo thlanglam ih ni 3 sung doawknak ah ralhrang 14 an thi tin Kalay PDF cun May 10 ah mipi theihternak an nei.
Kalay PDF cun “May 8, zanlam ah ralhrang ralkap le an tuanpi Pyu Saw Htee pawl cu Inkyuan khua in hmun 2 ah an then aw ih, ralhrang mipum 200 hrawng cun in nor. Curuangah kannih Kalay PDF, CDF KKG le pumpe aw hrekkhat thawn zinglam nazi 7 in zan nazi 10 tiang kan do aw. May 8 ih kan doawknak ah ralhrang a malbik 10 hrawng an thi ding.
“Yisin lamih feh peh ralhrang ralkap pawl cu May 9,zinglam nazi 8 hrawngah Yisin khua kiangah kan do betih, zanlam nazi 4 hrawng tiang kan do aw. May 9 ih kan doawknak ah ralhrang 4 an thi ih, Kannih Kalay PDF lamin miraltha 2 khal an nunnak a cem.
“Tuini May 10 zinglam khalah Yisin khua lamih feh ralrhang pawl cu kannih mipi ralkap komkhawm in kan do. Ralhrang lamin ralthuampi duhtawk in an kap ciamco ih, zinglam nazi 9 hrawngah ralthuam kan haidaih nawn lo cu dung kan sip hrih. Cumi hnu ahcun ralhrang ralkap le an tuanpi Pyu Saw Htee pawl cu Yisin khua sungah an lutih, mipi inn an urkang.
“Ni 3 sung ralhrang ralkap thawn kan doawknak ah ralhrang 14 hnakin mal lo an thi ih, dinak hrang kekartu kalay PDF sungtel pahnih khal kan thlahliam ve a si,” tin thu an suah.
Ralhrang Bawi Ting 600 A Tlan – Shan ramkulh Nankham myone Mantat khua ih umhmun khuar ralhrang ralkap lakin hotu tatyin hmu Bohmukyi Yaza min le Tatyin bo Aung San Oo tei pahnih cu an kuthnuai ralhrang pawl hrang eiin man sumpai an suahmi an tlanpi tin ralhrang lamin thu a suak.
April 20 ah ralhrang bawi le tatyin hotu cun an sakhan an rak suahsan zo ih, sumpai an lakmi cu tatyin pakhat ralhrang eiin man a si. Tatyin pakhat ah ralkap 100 hrawng an um theu.
Ralhrang thuthang cun “An pahnih in CDM tuah an si cuang lo. AN tatyin hrang thlakhat eiin man an suah ih,an tlan. Khawitawk an tlan ih, an rel tikhal theih a si hrih lo,” tin thu an suah.
April 4 khalah Shan ramkulh Ta AUng hmunram Nanhsan myone in Nanh khi khua ih umhmun khuar ralhrang ralkap 4 cun ralkap hmun an rak suahsan ih, CDM tuah in mipi lam an rak tang zo.
Kaya Ah Ralhrang 4 An thi – Kaya ramkulh Demoso myone myomah vengah ralhrang ralkap le Demoso pDF pawl may 9 zingah an do aw ih, doawknak ah ralhrang 4 an thi tin Demoso PDF cun mipi an theihter.
Demoso PDF cun “May 9 zingah Demoso myomah ih raltho ralhrang ralkap pawl cu kannih mipi ralkap pawlin thupten kan rak do ih, doawknak ah ralhrang 4 an thi. Zinglam veikhat, zanlam ah veikhat tin nikhat ah veihnih kan do aw. Ralhrang ralkap cun mipi ruat loin duhduh an kap ciamco ih, mipi inn le thilri siat phah tampi a um,” tin mipi an theihter.
Ralhrang ralkap in rampi thuneihnak an lak hnuah Kaya ramkulh khalah nasa ten an buai ih, mipi ralkap komkhawm cun ralhrang ralkap an do peh rero. kaya ahcun Loikaw, Demoso, Phuruso le a kiangkap pawl ah doawknak aum ringring ve.
Thailand In Myanmar Hnatuan 288 An Ko – Ram pahnih an biakawk fel zo bangin Thailand cun a kum telih a rak phihmi ramdang hnatuan a kawh nawn lomi cu 2022, may 10 in a ko thoksal ih, Myanmar hnatuan 288 khal daan vekin Thailand ram sungah an lut fel zo.
Myanmar rammi 288 pawl cu MOU timi daan vekin Thailand ram sungah lut an si ih, May 10 zingah Myanmar suahsan in Thailand lamah an lut fel zo. Thailand ih hnatuan ding pawl cu ram pahnih lungkim dan vekin felfai zetin hminkhen ngan an si ih, Thailand ram sungah arsa cetzung ah hna an tuan ding.
Thailand cun covid 19 natnak ruangah 2022 in ramleng hnatuan a ko nawn lo. hivek ruangah Myanmar rammi tamzet cu Thailand ram ah thupten an lut rero ih, Thailand palik pawlin an kai rero. Ahleice Myanmar ram a buai ruangah le covid 19 natnak ruangah Myanmar ram sungah hna nei lo tampi an um ih, Myanmar ah tuan ding a um silo a theih dandan in ramdang khal thupten an lut.
Hivek ruangah Myanmar lam cun Thailand tuanvo neitu pawl cu MOU daan vekin hnatuan ko dingah remnak an tuahpi ih, Thailand cun Myanmar hnatuan ting 1 lenglo an lak ding thu kan dung thla ah an rak simthei zo. Tuitum ah a hmaisabiknak ah mipum 288 cu Thailand ram sungah anlut fel zo ih, daan vekin feh an si ruangah Thailand ram sung ah kaih le hnaihnok an si thei lo ding.
Daan vekin Thailand ram sungah Myanmar hnatuan an lut thei zo nan, thupten Thailand ram sungih lut Myanmar rammi khal an um hrih thotho ih, Thailand palik pawl cun ramri cu uluk zetin an kil tikah Myanmar rammi kaihmi an nei ringring.
Russia le Ukraine Doawknak A Rei Hrih Ding – Russia cun thla 2 sung Ukraine an do hnuah Marupol lobok Ukraine khawpi lak felmi an nei thei hrih lo ih, Mariupol khalah mipi in Russia ralkap pawl an lawm cuang lo. A tufang Donbas ah nasa ten ram pahnih an do aw nan, thuhla thar ciamco rel ding a um hrih lo. Russia cun Mariupol thluh ah Donbas khawpi lak bet an tummi a si.
Russia ralkap sawn in Ukraine ram luhcilh an si tikah Uraine khawpi tamzet cun a tuar ih, mipi tamzet an thih phah tlunah mi tam tuk raltlan an um ih, umnak ding nei lo, tlan thei lo ih,hrantang khal tampi an um.
Duh vekin Ukraine ram sungah Russia ralkap pawl zamrang tukih an cangvaih theilonak pakhat ih an relmi cu ramdang in ralthuam le sumpai thawn Ukraine an bawm rero ruangah tin leitlun ralthuam pawlcun an sim ih, tu khalah leitlun 40 tlunah US cun Ukraine bawm peh vivo an tum ih, cumi ruangah Russia le Ukraine doawknak a rei hrih ding tin leitlun ralthiam pawl cun an sim.
US cun nasaten Ukraine an rak bawm rero zo ih, tu ah $3.9.9billion in Ukraine bawm bet an tum. Ramdang in a takin Ukraine an bawm lo nan, ralthuam le sumpai in an bom rero tikah Ukraine khal Russia ralkap lamah an duai ve lo ih,an ram le khawpi pawl an humhim rero thei hrih. Ukraine cun an ram le an khawpi an humhim ih, Russia cun Ukraine khawpi hmunkhat hnu hmunkhat an lak an tumin a lang.
Tutiang cu Russia ralkap pawl in Ukraine ram sungin mariupol khawpi lawng an la thei hrih ih, kan dung zarh ah Mariupol khawpi kan la fel tin Russia ralkap pawl Mariupol khawpi sungah an lawm ih, lam an zawh. Duh vekin Russia in Ukraine khawpi kyviv tlunah khawpi dangdang khal olsam ten ala men thei lo ih, tu ahcun anmah Russia dinpitu pawl umnak Ukraine nisuahnak lam Donbas lamah buai an si.
Donbas cu Ukraine le Russia ramritawknak a si ih, Russia ram si duh tapung tampi an um. Russia in Ukraine an do hlan ihsin Donbas ah Ukraine ralkap le Russia tapung pawl an rak do aw theu. Russia in Ukraine a do hlanah Russia president Putin cun Donbas sungin Luhansk le Donetsk cu zalennak a rak pe zo ih, Ukraine ram sungih um an si nawn lo tin thu a rak suah. Cumi cu tuitum ah Russia ralkap pawlin ralkap thazang thawn a takin Donbas ah zalennak um dingin Ukraine ralkap pawl an do reromi a si.
Leave a Reply