Chin ramkulh Falam peng Hakha le Falam karlak ih doawknak ah ralhrang 63 an thi tin CNA thuphuangtu Salai Htet Ni cun mipi a simthei.
Ralhrang ralkap mipum 200 hrawng cu Mawtaw 27 thawn Falam in Hakha lam pan an si ih, Lamzin tluanah Chin ralkap komkhawm pawl in July 8 in 12 tiang an rak do. Ni 5 sung doawknak ah ralhrang 63 an thi ih hriamhma ngah tampi an um. Chin ralkap komkhawm lamin miraltha pakhat a thi ve tin Salai Htet Ni cun a sim.
Salai Htet Ni cun “Ralhrang lam hriamhma ngahzat cekci cu theih a har. Asinan, ni 5 sung kan doawknak ah ralhrang 63 an thi timi cu kan fiah thei zo. Kannih lamin miraltha pakhat kan can ih, hriamhma ngah 10 hrawng an um. Kannih lamih hriamhma ngah 10 lakin mi pathum hrawng cu an besia. Tuini tiang kan do aw peh hrih.
“Ralhrang pawl cu anmai ratnak lamzin in an ra ih, kannih Chin ralkap komkhawm cun lamzin in kan rak bawh ih, thupten kan do fukfi theu. Cutikah, ralhrang pawl cu khua sungah an lutih, mipi inn an urkang. Kannih lam cun bomb zamthei le drone hmangin ralhrang kan do tikah ralhrang lam thi an tam duh. Doaw rero lai hrih kan si ,” tin a sim.
Chin ralkap komkhawm lakin thi cu Matupi CDF sungtel a si ih, Falam peng Ramthlo le Dokthek karlak ih doawknak ah a thi. Chin ralkap komkhawm cun bomb le drone hmangin ralhrang pawl an do tlangpi ih, meithal kah ban cin khalin an kap aw phah.
Ralhrang ralkap pawl cu Falam in Hakha feh vivo tum an si ih, mawtaw 4 cun bungrua an phur. Tu ah ralhrang pawl cu Ramthlo le Dokthek khua karlak ah an um hrih tin an sim ih, tuini lamah hmailam pan vivo tum an si.
Ralhrang In Pyu Saw Htee 7 An Kai – Sagaing ramthen Kyuan Hlah khua ih Pyu Saw Htee 7 pawl cu ralhrang ralkap in an kai. Pyu Saw Htee 7 pawl cun ralhrang bawi ih sungte pakhat an suam hnuah sumpai an laksak ih, an that. Cumi ruangah Pyu Saw Htee pawl 7 pawl cu ralhrang ralkap in an kai.
Kanbalu myone Pitauk khua ih fangcet nei Min Min le a rualpi pakhat cu June 27 ah vok lei dingin Kyaun Hla khua ah an feh. Kyuan hla khua an thlen tikah Kyuan hla khua ih Pyu Saw Htee pawl cun an rak kai ih, vok leinak ding tangka ting 15, phone 2 le bike pakhat an laksak ih, an kai.
Fangcet nei Min Min le a rualpa cu Kyaun Hla Pyu Saw Htee pawlin khuapawn ah an hruai ih, Min Min sawn an kap that. A rualpa cu a tlansuak ngah ih, thilthleng umdan a relsuak thluh.
Min Min rualpa khua a thlen veten Kyuan Hla Pyu Saw Htee pawlin Min Min an thah thu a sungte pawl a simthei hngal. Min Min Sungte pawl cun Min Min thah a si thu cu an sungkhat ralbawi Nyan Lin Aung hnenah an simthei ih, ralbawi Nyan Lin Aung cun Kyuan Hla palik pawl cu thil umdan zingzoi dingin a theihter hngal.
Kyuan Hla palik pawl cun June 29 ah Min Min ruang an hawl cih ih, cerek bawm tivek lawng an hmu ih a hlawhsam. Min Min ruang cu hawl peh a si ih, July 2 zinglam nazi 9 hrawngah an phumnak hmunah an hmu ih, an phorhsuak hnuah Kyuan Hla pituh sizung ah an luhpi ih, an zohfel.
July 5 ahcun Kyuan hla khua ih Pyu Saw Htee 7 pawl cu ralhrang bawi ih sungte Min Min an thah ruangah kaih an si. Pyu Saw Htee 7 pawl cu ralhrang ralkap pawlin Kanbulu ralkap hmunpi ah an hruai ih, an hrem, thu an sut.
Kyuan Hla dothlegnnak hotu cun “Pyu Saw Htee 7 lakah hotu bik cu venglal a si ih, a thok ahcun venglal kai duh loin an um lawk. Asinan, neta ahcun venglal khal telin Pyu Saw Htee 7 an kai. Taktak te cun Pyu Saw Htee le ralhrang pawl kop aw in mipi tangka an dil theu. Tuitum cu ralhrang lam an rak tel lo ih, anmah Pyu Saw Htee pawl thupte cangvaihnak a si,” tin a sim.
Pyu Saw Htee timi pawlkom cu ralhrang dinpitu pawlkom an si ih, ralhrang pawl raldopitu an um tlunah thuhla sim ringringtu khal an um. Hrekkhat cu ralhrang dinpitu kan si ih, ralhrang pawlin in tan ti’n mahten mipi rak dekcok ih sumpai dil khal an rak tampi ve. Cutikah mipi hrang hnoksakza ngaingai an si.
Mipi Phur Mawtaw In Bomb Palpuak – Sagaing ramthen Mungzua le Mandalay lamzin ah khualtlawng mawtawpi cun lamzin ih bomb kammi a palpuak ngah ih , mawtaw sungih to mipi 12 pawl hriamhma an ngah.
Hriamhma ngah mipi 12 lakin mi pakhat cu sizung ah a nunnak a cem zo. Mungzua myone Kinmon khua kiangah mipi phurtu mawtawpi cun July 11 ,zanlam ah lamzin ih bomb kammi a palpuak ngah.
Buaipitu pakhat cun “Bomb puak ruangah mawtaw a siat ih, mawtaw sungih to mipi lakin kut, ke , taksa dangdang tivek hriamhma ngah an tam. Mipa pakhat cu zamrangten sizung kan fehpi nan, a zan ah a nunnak a cem. Mawtawpi laifang hrawngah bomb a puak ih, mipi lakin hriamhma ngah an tam phah a si,” tin a sim.
Zopawl ih bomb kammi a si ti cu tuini tiang theih a si hrih lo ih, mipi ralkap siseh ralhrang lam khalin bomb kamtu thawn pehpar aw in thu an suah hrih lo veve. Myanmar ram a buai hnuah Kalay Gangaw zin, Mungzua mandalay zin, Myintkyina le Mandalay zin tipawl cu him lo ah ruah an si.
Rakhine Ah Doawknak Um Lo Dingin An Zuam – A tufang Rakhine ramkulh sungih ralhrang le AA karlak boruak sosang ah ANP party cun doawknak um lo dingin khatlam khatlam an bia ih, Rakhine mipi khalin doawknak kan duh lo tin an sim ve.
Kan dung khalah Ralhrang cun AA biak an duh thu an rak simthei zo ih, AA lamin an let hrih lo. Ralhrang in Karen ramkulh sungih AA sakhan pakhat an kah ruangah AA lam 6 an thih phah ih, an sakhan pawl khal a siat thluh. Cumi ruangah AA lam cun ralhrang pawl kan thungrul sal ding tin thu an rak suah zo.
Asinan, tu ahcun Rakhine mipi le Party pawl cun Rakhine ramkulh sungah doawknak an duh lo ih, AA le ralhrang do aw lo dingin ttan an rak suah. AA an bia, ralhrang pawl an bia ih remnak tuah an tum.
Rakhine ih um pakhat cun “Kannih Rakhine mipi cun ral doawknak kan duh nawn lo. Do aw lo ih, hahdamten um kan duh. Ralhrang pawl khalin Rakhine ahcun doawk an duh ve loin a lang. Khat le khat an kaihsakawk reromi khal tu cun a dem tuk zo. Do aw lo dingin Party pawl an zuam ih, mipi hrang nasaten palai an ttuan a si,” tin a sim.
Rakhine party pakhat ANP cun Rakhine ramkulh sungih doawk an duh lo thu casuah in theihternak an neih hnuah khat le khat rem aw zetih um dingin an sawm aw ih, mipi hmanmi lamzinpi le tipar zin tivek khalah mipi hrang tihnung bomb kam lo dingin le mipi hnaihnok lo dingin AA le ralhrang pawl an sawm.
ICJ Ah Ralhrang Ih Thuburmi An Relcat Ding – Gambia ram in ICJ Court ih ralhrang an heknak thubuai ah ralhrang cun thiamthu an rak rel zo ih, ralhrang pawl thiam thu relnak cu July 22 ah Court lamin an relcat ve thlang ding.
ICJ ih ralhrang thubuai cu 2022, February 25 ah veikhat an rak rel zo ih, cumi ahcun ralhrang lamin thiamthu an rak rel. Gambia ramin kan ram sungih buainak rel theinak an nei lo ih, kannih khalin Gambia ram ih puh vekin sual tuahmi zianghman kan nei lo tin ralhrang lam cun ICJ Court an rak simthei.
Ralhrang pawlih thiamthu relnak cu 2022, July 22 ah ICJ Court thuthentu pawlin an zohfel dingmi a si ih, ralhrang pawl relmi an cohlan sak ding maw, an hnonsak ding timi a siko. Court in ralhrang pawl relmi an hnonsak asile ralhrang siseh Myanmar khal hrem theih dinhmun ah an um ding.
Thubuai ah NUG lam cun Myanmar aiawh dingin nasaten an rak zuam nan, ICJ Court cun ralhrang lam sawn Myanmar aiawh dingin an rak sawm. Himi ruangah NUG lam an lungawi lo zet. NUG cun Myanmar ai rak awh sehla Myanmar ralkap pawl an sual rori ko, duhtawk in mipi an that ko tin thurel an rak tum. Asinan, ralhrang pawl sawn Myanmar aiawh dingih sawm an si tikah thiamthu an relsawn.
Thubuai cu 2017 kum ih Rakhine ramkulh sung Rohingya le ralhrang ralkap pawl buainak a si. Ralhrang cun Rakhine ramkulh sungih Myanmar rammi sinak nei lo Rohingya miphun pawl cu Myanmar ram in an rak dawisuak ih, Rohingya lamin an rak do ve. Nasaten an doawknak ah ralhrang pawl cun a bur a bur in Rohingya miphun an rak that ciamco ih, an inn khal an rak urkang sak ciamco.
Cucu, Muslim ram Gamcia cun Myanmar ralkap hmin in siseh Myanmar ram hmin khalin ICJ Court ah thubuai an rak thehlut ih, ICJ Court in an cohlan sak tikah thubuai cu 2019 kum in an rak rel thok.
A thok ahcun Myanmar ram aiawh in Daw Aung San Suh a rak dingih, ICJ Court ah ralhrang pawl dinpi in Daw Suh thu a rak rel. Covid 19 natnak ruangah thubuai rel peh thei loin reizet an um ih, 2022 February thla lawngin rel thoksal an si.
Tui kum ahcun ralhrang in Daw Suh an kaih ruangah Daw Suh in Myanmar ralkap ai a awh thei nawn lo ih, anmah ralhrang pawlin ICJ Court ih fehtu ding pawlkom an din ih,ICJ COurt ah an thiamthu an rel. July 22 ah Court cun ralhrang lam thiamthu relmi an zohfel dingih, cumi ih zir in thubuai umdang tampi a danglam thei thlang.
Leave a Reply