Falam Le Hakha Meisa Ban An Tuah Thok – Chin ramkulh Falam le Hakha khawpi ih um mipi pawl cun zarh thum lenglo meisa an ngah lo zo ih, meisa an ngah lonak san ih an relmi cu Gangaw lamzin ih meisa ban pawl a siat tin an sim.
November 4 ahcun Hakha le Falam ih feh Gangaw lamzin ih meisa ban siat pawl an tuah thok ih, zarh khat sungah tuah theh thei an tum. Meisa ban pawl cu thli in a hran siat ih, meisa ban thar thleng thluh a tul ding tin an sim. Tu ahcun meisa ban thar khal an tuahnak ding hmunah a thleng zo tin a tuahtu pawl cun an sim.
Zar thum sung meisa an ngah lo zo ruangah Hakha le Falam ahcun mipi an buai tukih, meihol man khal a kai ciamco phah. Hakha ahcun meithal thawng 20 tiang a thlengih, Falam khalah meithal dip khat ah thanwg 13 tiang a thleng.
Hakha ih um pakhat cun “Dawr tuah pawl khal thaten thil kan zuar theilo. A hleice in eiin zuar pawl kan buai zetih dawr dang nei pawl khal har an ti. Zarh thum sung rori meisa kan ngah lo zo tikah dawr tuah lawng siloin mipi khalin har an ti thluh. Phone battary thunnak ding hrimhrim khal kan buai phah zet a si,” tin a sim.
Chin Nauhak Ruru An Hrem That – Sagaing ramthen kalaymyo thingunau vengah nauhak ruktu pakhat an kai ih, an hremnak ah a thi tin khuami pawl cun an sim.
November 1 ah Kalaymyo hmunlai ih um Lian Siam Muang ( kum 12 ) cun ting 10 le ting 5 karlak man thilri a ru ih, khua mino in an kaih ngah tikah an hrem that. Rukru Lian Siam Muang cu a nauhak laiah a nu in a thihsan ih a pa in nupi dang a neihsal tikah nuei tuar in a um. Tlawng a kai thok khalah rualpi pawl pencil,pen le cabu tivek a rak ruksak theu.
A nulepa cu zuin a si tikah an fate an ngaihsak lo ih, an vuak, an hrem theu. Myanmar ih covid 19 natnak a luh ve tikah tlawng a kai nawn lo lanta ih lamzin sir tivek ah a riak theu. Cutin , lamzin sir minung pawl thawn an thei aw , an kom aw ih ritheihsi a tham thok tikah ruk a ru thok ve.
November 1 ahcun venghnen inn a bauh ih ting 10 le ting 5 karlak thilri a ru. A tlansuah man hlanah veng mino pawlin an kai ngah ih, hrem phah in thu an sut ciamco. A lungruh tuk tikah thusuh a theih lo ih an hro an vaw phah. Cuvek cingin thu a lun lo ruangah Zomi Youth Association hnenah an ap. ZYA hotu cun kum nauhak te khal si hman sehla rukru thubuai in vei 3 kaih a sizo tin a sim.
Rukru nauhak cu upa mi 5 hrawngin an hro ,an vaw phah ih, nazi 1 sung tluk an hrem tikah a hmunah a thi cih tin khuami pawl cun an sim.
Pastor cun “Rukru asikhalle daan vekin hrem ding a si. Tu ahcun a nunnak an lak sak ih kan pom thei lo lawlaw. Kum 12 lawng a si ih, remawknak caan tampi a nei lai. Hivek cu thahrum thawh cangvaihnak ah a feh. Kannih zumtu thawn tla cun an cangvaih dan a dik lo lawlaw. A hremtu pawlih cangvaih dan cu Zumtu pawlih kan cangvaih dan ding a silo,” tin a sim.
Khuami pakhat cun “A ruak cu a sungte pawl hnenah an pe ih, an vuiliam zo. An hrem nasa tukih a hmuihmel khal a danglam thluh. A rualpi thenkhat tla cun amah ti hman theih lo khopin an hremnak ah a hmuihmel a danglam thluh tin an sim. An hrem nasa ih, cumi ruangah thi cu a si,” tin a sim.
Delhi Chinmi Pawl Lekpannak An Nei – India ram New Delhi khawpi ih um Chin raltlan pawl cun kum tinten an tuah theumi Winter Sport cu tuikum khalah an tuah ih, November 4 zan ah an thehfel. Ni 5 sung lehpannak nei an si ih, Mipa bawhlung , Volleyball mipa nunau tin leknak an tuah.
Commmunity tin zuam aw an si ih, Bawhlung ah Zomi ( Tedim ) in pakhatnak laksawng an ngahih, Lailun ( Falam ) in pahnihnak laksawng an ngah. Lek thabik ah Lailun laitlan Lian Sin hril a si ih, Lailun hmaitlan Vungte in sit goal tambik laksawng a ngah. Mipa Volleyball final ah Lailun A ( Falam ) le Lailun B lek ding an sinan, mah le mah an si ruangah an kian aw men. Nunau Volleyball ah Mizo in pakhatnak an ngah ih, Hakha ( Cinrung ) in pahnihnak an ngah. Ni 5 sung lekpannak an tuahmi cu buainak um loin a theh thei.
Hruaitu pakhat cun “Raltlan kan si ih, kan harsa cio ko. Asinan, Sport hrang bawmtu tete kan nei ih, kan mipi thinhar le hnatuan ringring pawl an cawlh hahdam theinak dingah camkhat te leknak kan tuahsakmi a si,” tin a sim.
Hmatpungtin Ken Lo Ruangah An Hrem That – Yangon ramthen Dalah myone Ttaakyi vengih um Ni Lin SOe timi cu Dalah le twenty karlak ih a fehnak ah ralhrang pawlin hmatpungtin na keng lo tin an hrem that.
Nilin Soe cu hnatuanak in tlung a si ih, khualtlawng a silo ruangah hmatpungtin ken tulin a ruat lo. Ralhrang pawl cun a hnatuan tlung an rak cekih, anih cun hnatuan feh a si ruangah hmatpungtin a ken lo thu a sim. Cutin ralhrang pawlin an kai ih, an hrem that.
A sungte pakhat cun “Hmatpungtin an cek ih, hnatuan feh a si ruangah hmatpungtin a ken lo thu a sim. Cumi men cu a kut le ke an ttawn in an hrem that men. Ralhrang pawlin an hrem rero lai ahcun a nu le veng upa an thlengih, hrem nawn lo dingin zangfah an dil rero nan ralhrang pawlin a nui thusim khal an lung lo. Ralhrang pawlin an hrem that hnu lawngah a ruang cu a nu an pe. A nu cu tap phah in a fate ruang a tlunpi. Fate a neihsun a si tikah a tuarna tuk.
“Ralhrang pawl cun a ruang serhnak caan khal an pe duh lo ih, an vuiter lohli men. An inn le ralhrang check gate a nai awte. lamzin ah ralhrang check gate an tuahmi a si ih, lamzin sukso duhduh in an cek. Nunau tivek tla cu an check phah ah an tham theu ih, an duh lo asile an hro ciamco. Cutikah nunau hrang tla cu zawh ngam ding ci khal a si nawn lo,” tin a sim.
Pyu Saw Htee 15 An Puah That – Sagaing ramthen Ayadaw myone Taleba khua ih Pyu Saw Htee hotu thi cu Pyu Saw Htee tam zetin vuinak an nei. Cumi laifang ah mipi ralkap lam cun Drone in bomb an thlak ih, Pyu Saw Htee 15 an thih bet tlunah hriamhma ngah 20 hrawng an um tin an sim.
Zero pawlkom hotu cun “November 1 ah Pyu Saw Htee hotu kan rak that ih, cucu Pyu Saw Htee pawlin hlunghlai zetin vuinak an nei. Thlanmual lamih ruang an fehpi laiah drone 5 in bomb kan thlak ih, Pyu Saw Htee 15 an thih tlunah hriamhma ngah 20 hrawng an um timi cu felfai zetin kan hmu a si,” tin a sim.
Pyu Saw Htee timi cu ralhrang lamtang an si ih,ralthuam kengin PDF pawl dotu an um tlunah dalan vekin ralhrang pawl bawmtu khal an um.
PDF 21 An Kai – Yangon ramthen Dalah myone ah PDF 21 kan kai tin ralhrang pawl cun thu an suah ih, PDF pawl cu October 18 ihsin October 24 karlak ih an kaihmi pawl an si thu ralhrang cun November thla ah thu an suah.
Kaihmi PDF 21 lakah mipa 17 an tel ih, nunau 4 an tel. An zaten Yangon ramthen sungih cangvai an si tin an tarlang. Yangon dothlengnak pawlkom pakhat UG cun PDF pawl kaih an siko tin mipi an rak simthei ve.
UG thuphuangtu cun “An kaihmi pawl cu taktak a siko. Asinan, Yangon khalah dothlengnak pawlkom tampi kan um ih, dothlengnak pawlkom pakhat ih sungtel cu an si thluh lo. Ziangmi PDF ah an um ,ziang pawlkom ah an tel timi cu felfai in kan thei thluh hrih lo. Asinan, PDF pawl an kaihmi cu a dik ko. Hivekin PDF pawl kaih an sinak san ih kan hmuhmi cu fimkhur tawk lo ruangah, dalan ruangah le felfai zetih timtuahnak neih lo ruangah tivek pawl an si. Kan himnak kan ngai thupi a tul deuhdeuh a si,” tin a sim.
Yangon ih dothlengnak pawlkom pakhat cun “Kannih Yangon hi khawpi pakhat a si tikah Khawpi sungah theitawk in ralhrang hnaihnok an tul ih, fimkhur zetin kan cangvai. Asinan, khawpi sungih um kan si tikah kan umnak hmun hi ralhrang lamin an rak thei man cingcing. Curuangah Yangon PDF pawl kaih an ton theunak a si. Hmundang ahcun hramlak ah an um ih, an cangvaih ding lawngah khua sung an lut. Kannih Yangon ahcun hramlak in khawpi sungih cangvaihnak cu a harsa. Asinan, neta ahcun kan himnak ding ruatin hmunhim lamih tthawn khal an tam zet thlang a si,” tin a sim.
Ralhrang In Mi 17 An Urkang – Ralhrang ralkap cun October thla sungah mi 17 rori meisa in an urkang tin hminsin tuahtu pawl cun an sim. Ralhrang ih urkangmi pawl cu Sagaing ramthen ah 13 le Makui ramthen ah 4 an si.
Ralhrang pawl cun October thla sungah minung 17 an urkang tlunah mipi inn 1553 khal an urkang. Ralhrang in mipi inn an urkangmi pawl cu Sagaing ramthen ah inn 1044 le Makui ramthen sungah inn 470 an si ih, culo hmundang khalah ralhrang pawl cun mipi inn an urkang sakmi a um.
Data For Myanmar sungtel cun ‘Hminsin kan tuahmi hnakin a tamsawn thei,ziangahtile Internet le phone line thatlonak hmun khalah ralhrang in inn le minung an urkang thatmi a um ih, felfai in cazin tuah theih lomi a um. Curuangah ralhrang pawlih cangvaih dan cu kan rel le sim hnakin a rapthlak sawn. A takih tuartu pawlin an thei ih, mit hmuh rori a si,” tin a sim.
Ralhrang in rampi thuneihnak an lak hnuah rampi huapin ralhrang rak do a si ih, a tufang cu a thlatel in Sagaing ramthen sung le Makui ramthen sungah doawknak a sosang tuk. Sagaing ramthen le Makui ramthen sungih ralhrang thi an tam bangin ralhrang pawl khal rapthlak zetzetin an cangvai ve ih, khatlam khatlam in an tuar. Asinan, dothlengnak an tuahmi cu bansan men an tum lo lawlaw.
AA In Palik Bawi An Kai – Rakhine ramkulh Taungkuk myone mah-ih palik sakhan ih palik bawi pakhat cu November 4 zingah AA pawlin an kai.
Taungkuk ih um pakhat cun “A tufang cu kannih Rakhine ah AA le ralhrang pawl an kai aw rero men. AA in ralhrang milesa an kaih tikah ralhrang pawlin AA thawn tuantlang ih an zummi pawl an rak kai rero ve. A thok ahcun AA lamin an uknak karh vivo an tum tikah AA ih hmanrua pawl cu ralhrang lamin an rak kai hmaisa. Cutikah AA in ralhrang milesa an kai ve ih,cutin kai aw ton rero an si.
“Tuitum ih AA pawl kaihmi palik bawi cu Ko Ko Min Tun a si ih, phaya puai hmangih a vahsuaknak hmunah AA pawlin an rak kai ngah. Tu ahcun AA le ralhrang pawl khat le khat an kai aw rero men nawn lo ih, Rakhine ramkulh ahcun hmun tinkim ah doawknak a sosang tuk a si,” tin a sim.
MNDAA le Ralhrang An Kap Aw – Shan ramkulh Lashio myone ah ralhrang ralkap le MNDAA an kap aw tin kiangkap ih um pawl cun an sim.
Khuami pakhat cun “MNDAA pawl umnak ah ralhrang pawl an feh ih, an kap aw. Doawknak a um tikah ralhrang lamin duhtawkin ralthuampi an kap suak theu ih, khua sungah a tla ding kan phang tuk. Tuitum an doawk khalah ralhrang lam cun duhtawkin ralthuampi an kap ciamco ih, khua sungah ralthuampi veikhat a tla zo.
“Asinan, minung thih phah cu kan um lo. Tu khalah boruak a sosang zetih an do aw peh hrih dingin a lang. MNDAA le ralhrang an doawk ceng cun a ni peh in an do aw tlangpi ih,tuitum khal nithum peh in an do aw zo. Doawknak ruangah mipi kan tuar ding cu kan phang zet a si,” tin a sim.
MNDAA khalin doawknak thu an suah ve ih, “Ralhrang thaw ni 3 peh in kan do aw zo. Doawknak ah felfai zetin ralhrang pahnih thi kan fiah thei ih,ralhrang hriamhma ngah 6 tluk an um ding. Ralhrang pawlin ramri in ra nor ruangah kap aw kan si ih, kan boruak a sosang hrih a si,” tin thu an suah ve.
Lashio myone Maiyaw hmunram ahcun MNDAA tlunah TNLA, AA le SSPP pawl khal an um ve ih, ralhrang le tlangpar ralthuamkai pawl doawknak hmun pakhat deuh a si.
China In Pakistan Bawm Vivo Ding – An ram ih tilik a thlen hnuah nasaten buai Pakistan ram cu China in an bom vivo ding thu an tiam. Pakistan ih tilian ruangah mi 1700 tlun an thih phah ih, sumpai in $30 Milion tluk an sugral.
Hivek ruangah Pakistan cun leitlun ram dangdang hnenah bomnak an dil kual vivo ih, China khal kut an va dawh. Cutikah China president cun an ram ih kutdawh Pakistan Preisident hnenah China in Pakistan an bom vivo ding thu a rak tiam. China in Pakistan a bawm tum dan cun a siatmi lamzin le innpi pawl an saksak ciamco dingih, cumi manah Pakistan ram sungih lung mankhung le leihnuai thilri mankhung hnatuannak ah China an tel ve ding.
Leitlun Politics thlirthiam pakhat cun “China hi thluk an mang tangkai zet. Tu ah Pakistan an bawm ciamco ding nan, Palistan in China hnenah leiba tampi an neih phah ding. Cutikah China in Pakistan ram sungah an duhduh an tuah thei phah dingih, leiba ruangah a phunphun in an nor thei ding. Hivek cu China in ram pakhat hnu pakhat an lak tum vivo dan a si,” tin a sim.
Leave a Reply