Google cun may 11 ih Developer Conference an neihnak ah Google translate ah tong 24 an ret bet thu mipi an simthei ih, tong 24 an ret betmi ah mizo tong khal a tel.
Google translate ih an ret betmi tong 24 pawl cu Assamese, Amymara, Bambara, Bhojpuri, Dhivehi, Dogri, Ewe, Guarani, Ilocano, Konkani, Krio, Kurdish, Lingala, Luganda, Maithili, Meiteilon, Mizo, Oromo, Quechua, Sanskrit, Sepedi, Tigrinya, Tsonga , Eswatini le Twi pawl an si.
Google translate ih an retmi tong 24 lakah India ram sungih tong 8 an tel thar ih, Sanskrit, Assamese, Bhojpuri, Dogri, Konkani, Maithili, Mizo le Meiteilon pawl an si. Hitin , Google translate ah India ram sungih tong 19 a um thlang.
Hitin Google translate ah leitlun tong phunphun 133 a um thlang. Google translate ih tong an ret bet dan cu a hmangtu mipi an tam dan ih zir in a si ih, Mizo tong cu India ram Northeast ah mipum ting 8 le thawng 30 hrawngin an hmang tin Google cun a tarlang.
CNA In Raldo Thu An Suah – Chin ralkap CNA cun Hakha le Falam karlak ih doawknak siseh Mindat lamih doawknak thuhla khal may 12 zan ah mipi theihternak an nei.
CNA cun “Kannih CNA, CDF Thantlang le CNDF pawl cun May 3 in 6 tiangah vei 4 ralhrang ralkap kan do. Doawknak ah ralhrang 34 an thi ih, hriam ngah 20 tluk an um. Doawknak hmun cu Hakha le Falam karlak Ramthlo, Tlangzar le Taal khua karlak pawlah an si.
“Hakha in suak ralhrang ralkap mawtaw 27 le tank 2 cu kannih mipi ralkap komkhawm in kan do ih, ralhrang mipum 150 hrawng an si ding. Ralhrang pawl cun hremnak pekmi thawngtla 15 cu ralphaw ah hmangin an phur ih, Ramthlo khua in 10 le Tlangzar khua in UPC biakinn thawn inn 16 an urkang.
“Ralhrang pawl cu May 9 ah Falam suahsan in Kalaymyo lamah an feh vivo, Lamzin tluanah CNDF in bomb an rak puah ih, ralhrang 4 an thi. Chin ramkulh matupi in Mindat lamih feh ralhrang pawl khal May 7 le 8 ah CDF Mindat in lamzin tluanah vei 3 an do ih, ralhrang 30 hnakin mal lo an thi ih,hriam ngah an tam.
“May 3 in 6 tiang Hakha le Falam karlak ih doawknak ah Chin ralkap CNA sungin miraltha 4 le CDF Thantlang sungin miraltha 4 cun ram le miphun hrang an nunnak an hlan a si,” tin thu an suah.
Doawknak ih thi Chin ralkap 8 an um bangin bomb cangsuaknak ruangih thi Chin ralkap an rak um betih, Falam le Hakha karlak doawknak boruak ah mipi ralkap lam 10 an thi tin CDF cun mipi theihternak an rak nei zo.
Chin ramkulh Matupi in Mindat lam pan ralhrang pawl cu zarh hnih hnu khalah Mindat an thleng thei hrih lo ih, lamlak ah Mindat CDF cun theitawk in an do rero hrih.
Mindat CDF thuphuangtu Salai Ha Awm cun “Peng 100 hrawng lawng hla Matupi le Mindat karlak lamzin cu zarh hnih tluk rei an feh zo. Cumi ih langfiang zet cu an duh ruangah feh siloin tlunlam thupek ruangah feh tento fang an si. Ralhrang ralkap pawl hrang ahcun Matupi le Mindat karlak cu thihnak thlanmual vek a si thlang.
“Ralhrang pawl Mindat an thlen thei khalle Mindat in Makui ramthen Kyauk Htuh an luh tikah YAW ralthuamkai pawlin an rak do lala dingih, an hrang lamzin a ong lo. Kyauk Htuh in Pakkoko , Pakokko in Mungzua an feh khalah lamzin tluanah PDF pawl an ralring thluh zo a si,” tin a sim.
Leave a Reply