Chin ramkulh Hakha khawpi ah ralhrang ralkap cun an kuthnuai ih hnatuan chinmi 2 cu Social ah CDF dinpinak nan langter tin an kai.
Ralhrang ih kaihmi Chinmi pahnih cu Nu Vung Huai le Aye Aye Maw an si. Nu Vung Huai cu ramkulh fimzirzung ah hnatuan a si ih, Daw Aye Aye Maw cu ramsung siah peknak zungah hnatuan a si.
“May 24, zinglam nazi 11 hrawngah Chin ramkulh Hakha khawpi ih um Nu Vung Huai ( ramkulh fimzirzung ih hnatuan ) le Nu Aye Aye Maw ( ramsung Siah peknak ih hnatuan ) tei pahnih cu Social Facebook hmangin dankalh pawlkom thazang an pe , thuthang dik lo an thehdarh ih, CDF dankalh pawlkom pawl an pehtlaih ruangah kaih an si,” tin ralhrang cun thu an suah.
US Ah Tlawngta Nauhak 19 An Kap That – US ram Taxas state Uvalde khawpi ah kum 18 lawngih upa Salvador timi cun meithal thawn Robb Elementary hramthok tlawnginn a luhcilh ih, tlawnginn sungin tlawngta nauhak 19 le zirhtu pahnih a kap that.
May 24, zinglam nazi 11:30 hrawngih thilthleng a si ih, Salvador in ziangruangah tlawngta nauhak 18 le zirhtu pakhat a kap that timi a san cu theih a silo. Ziangahtile, amah Salvador khal palik hnenih a pekawk duh lo ruangah palik pawlin an kap that ve.
Salvador cun kum 18 a kim ni ah daan vekin meithal a lei ih, hmaisabik ah a pi a kap. A pi cu sizung fehpi hngal a si ih,an tuamhlawm rero lai. Palik pawl cun a pi kaptu Salvador cu meithal ret ih pe aw dingin an sim nan, Salvador in a duh lo ih, meithal thawn a tlan. Lamzin tluan khalah palik pawl thawn an kap aw phah ih, palik pakhat hliam a ngah ve.
Neta ahcun Salvador cu tlawnginn sungah a lutih, tlawnginn sungih a hmuhpi pohpoh a kap vivo. Tlawnginn sungah tlawngta 19 le zirhtu pahnih a kap that. An kai thei silo Palik pawl mangbang cun amah Salvador khal an kap that lawlaw. Tlawnginn ahcun tlawngta 600 hrawng an um ih, tlawngta tamzet hliam ngah an um ih, sizung ah tuamhlawm rero lai an si.
US ram ah kum kim cun daan vekin meithal lei a theih ih, hivek ruangah kahawknak a thleng deuh ringring. Kan dung khalah tlangval pakhat in duhtawk in mi a kap ciamco zo. Hivek ruangah US mipi cun meithal lei thei daan thleng danglam dingin cozah dinglai an dil rero ve.
Leave a Reply