Hakha Le Falam In Meisa An Ngah Thlang Ding

Hakha le Falam In Meisa An Ngah Thlang Ding – Chin ramkulh Falam le Hakha ih feh Meisa ban a siat ruangah Falam le Hakha ih um mipi pawl cun thlakhat tluk meisa an ngah nawn lo zo ih, tu ahcun meisa ban sia an tuah tha zo ruangah Hakha le Falam ih um mipi pawlin meisa an ngah thlang ding tin an sim.

Falam le Hakha ih feh meisa hri cu Gangaw lamzin tluanah ban a tlu ih, hri a cat. Cumi ruangah Falam le Hakha ah meisa a feh thei lo. Meisa ban sia cu November 4 in an rak tuah thok ih,ban thar in an thleng vivo. November 9 ahcun Meisa ban tlu pawl an rem theh thluh ding thu a tuahtu pawl cun an sim.

November 9 ihsin Falam le Hakha cun meisa an ngah thlang ding nan,Hakha cawbuk vengih meisa hri siat a um bet ruangah Hakha ahcun veng zatein meisa an ngah kim hrih lo ding tin a tuahtu pawl cun an sim.

Hakha ih um pakhat cun “Meisa a rat ding cu kan hngakhlap tuk thlang. Meisa a rat lo tikah meihol hlir kan ringih, meihol man a kai thluh. Culo, thildang khalah meisa tulnak tampi kan nei ih meisa a rat lo tikah mipi kan buai phah thluh. Tu ahcun meisa ban siat an tuah theh thlang ding ti kan thei ih, kan lungawi ngaingai. Ahleice in nunnak thapih in tuahsaktu pawl hnenah lungawithu kan sim a si” tin a sim.

Hakha Ah Vok Sii An Dawt – Chin ramkulh Hakha peng sungah vok hrekkhat sungdok vekin an na ih, vok thi an rak um. Curuangah ramsa sibawi pawl cun Hakha peng sungah vok si an dawt vivo.

Vok sii an dawhmi cu veikhat dawh man ah thawng 4 an la ih, vok 200 hrawng sii an dawt zo. Tutiang ih an hminsin dan vek asile Hakha peng sungah vok 100 tluk an thi zo ih,thisen luak ih thi an um tin an sim.

Ramsa sibawi cun “Hakha ah vok natnak a um timi cu kan fiah zo nan, ziang natnak bik a si timi cu felfai in kan rel thei hrih lo. Ziangahtile , hmunpi ah kan zoh thei lo. Kan zoh dan vek asile vok sungsok natnak a bang. Vok pakhat ah a malbik sii vei hnih kan dawhsak. Tu khalah vok natnak a um ringring lai a si,” tin a sim.

Timit Bomb Puak Ah Mipi An Him Hrih – Ralhrang ralkap cun November 7, sun nazi 2 hrawngah Hakha peng Timit hmunram cu raldonak vanzam pahnih in bomb veithum an va thlak nan,tutiang ahcun mipi lam an him lai tin an sim.

Hakha ih um pakhat cun “Thuhla kan theih veten zamrang zetin zingzoinak kan nei hngal ih, tuhrih ahcun ralhrang in vanzam in bomb an thlak ruangah thi an um thu kan thei hrih lo. Mipi ralkap siseh mipi lam khal bomb puak lakah an him hrih in kan thei.

“Asinan, Hakha ih ralhrang hmunpi cun Timit lam cu ralthuampi in an kap bet rero lai. Ralhrang raldonak vanzam cu bomb veithum a thlak hnuah a zam kirsal cih. Bomb puak cu kannih Hakha ih um pawl hmanin kan thei.

“Timit ahcun a thlatel in mipi ralkap le ralhrang pawl an kap aw zo ih, ralhrag pawl duh vekin hmailam an pan thei lo. Cutikah ralhrang pawlin raldonak vanzam an hman phah in a lang. Boruak a sosang tukih doawknak picang suak thei ringring a si,” tin a sim.

Ralhrang 17 An Thi Ih PDF 6 An Thi – Sagaing ramthen Mungzua myone Htanlipin khua ih doawknak ah ralhrang 17 an thi ih,PDF lam 6 an thi ve tin Chindwin Attack Force cun mipi theihternak an nei.

Chindwin Attack Force cun “Noveber 6, sun nazi 12 hrawngah Htanlipin khua ih umhmun khuar ralhrang mipum 150 hrawng cu ralthuampi le ralthuamte thawn kan kap ciamco. Doawknak ah ralhrang 17 an thi ih, hriamhma ngah an tam. Ralhrang thi an tam tikah ralhrang pawl cun ralthuampi, bomb, RPG tivek an hmang ciamco ih, ralthuampi in vei 20 tluk in kap. Cumi ahcun kannih PDF sungtel 6 khalin ram le miphun hrang an nunnak an hlan ve.

“Tuitum ah Chindwin Attack Force, Mungzua The Boy, tualsung PDF dang le mipi ralkap dang thawn ralhrang ralkap pawl kap kan si. Tuitum ah kan sungtel 6 pawl kan humhim thei nan, doawk laiah kan cerek a cem ih, dung ka sip zawngah an nunnak a cem phah a si,” tin thu an suah.

N.Korea An Phuang Aw – N.Korea in S.Korea ramri kiangih Missile an kahsuak thu le raldonak vanzam an zamter thu ah mipi simfiangnak an nei ih, S.Korea le US thaten do thei dingin raldo zirnak nei men kan si tin N.Korea lam an phuang aw.

S.Korea le US in raldo zirtlangnak an neih tikah N.Korea lamin daiten an rak zoh men thei lo ih, Missile an kap suak, raldonak vanzam an zamter tivekin an cangvai ciamco. Cumi ruangah S.Korea khalin Missile an kapsuak phah ve ih, raldonak vanzam an rak zamter ve.

Hivek ruangah ram pahnih karlak boruak a se phah zetih ramri ah nasaten an hro aw rero. Hivekih kan cangvaihnak san cu S.Korea le US ah donak ah a takin raldo zirnak nei kan si tin N.Korea lam cun thu an suah.