Chin ramkulh Hakha le Falam karlak lamzin cu ruah sur tuk ruangah lei a min, lungto a ril ih, lamzin ih lungto a khat ruangah feh sukso theih hrih lo a si.
Lamzin siatnak hmun cu Hakha peng Chunchung khua kiangah a si ih, Hakha le Falam fehnak lazinpi a si tlunah Chuncung in Hakha le Falam fehnak khal a si.
Lamzin tawlreltu cun “Lamzin ih lungto zamrang ten thiatfai kan tum. Asinan, lung dang umnak lamzin tlun pawl a him lo zetih, ziangtin si maw cu tuah that a tul dingin a lang. A rang thei bikin mipi an sukso theinak dingah lamzin siat tuah kan tum. Asinan, ziangtikah mawtaw a feh thei ding timi cu rel cia a theih hrih lo,” tin a sim.
Hakha le Falam karlak lamzin cu ralhrang ralkap le mipi ralkap pawl nasa ten an rak doawk theunak hmun a si ih, tu ahcun doawknak a um lo.
Paletwa Mipi An Thinphang – A Tufang paletwa peng sungih Rakhine ralkap AA le ralhrang ralkap an doawk ruangah Peletwa peng sungih mipi pawl cu a hlan bangin an tlan ciamco lala ding an phan.
Ralhrang ralkap in rampi thuneihnak an lak hlanah Rakhine ramkulh tlunah Chin ramkulh Paletwa peng sungah Rakhine ralkap AA le ralhrang ralkap an do aw ringring ,Paletwa peng sungin raltlan tam tuk an um. A hlanih ralhrang pawl khal tutiang tlun thei hrih lo an tam. Tu ah ralhrang ralkap le AA karlak boruak a sia ih, cumi ruangah mipi cu thinphang an si.
Paletwa ih um pakhat cun “Kannih cu mipi dinhmun in kan thinphang tuk rori. Tuih AA le ralhrang ralkap pawl an doawknak hmun cu khawpi thawn a hla aw deuh nan, kan theih ban a si tikah kan um a nuam thei lo. Kannih mipi cu eiin hrang hnatuan tul kan si tikah zalen zetin suksoh thei kan duh.
“Kannih mipi cun khawitawk hmun khalah ral kan duh lo ih, doawknak kan duh lo. Ziangahtile, doawknak a um tinten a tuartu cu mipi kan si ih,ziangkim ah kan harsa thluh. Lamzin sukso in kham ih, hmundang in thil a thlen thei lo tikah kan harsa tuk.
“Kum 2 hrawng meithal puak awn, bomb puak awn le doawknak thawmvang kan theih nawn lo tikah hahdam ten kan um zo ih, nuam kan ti tuk. Asinan, tu ahcun meithal puak awn ,bomb puak awn le doawknak thawmvang kan thei sal ih, kan um a nuam thei hrimhrim lo. Tuitum ih AA le ralhrang doawknak ahcun raltlan kan um bet hrih lo. Asinan, a hlan bangin an karlak boruak a sosang vivo asile a tuartu ding cu mipi kan si ih, cuvek thlen ding cu kan tih tuk.
“Tu ah doawknak mallai a um ih, kannih Paletwa ih um pawl cu sukso vah khan thlun dingmi daan in tuahsak. Tu ahcun hmunhla ih thilri phur dingin le sukso kan vak ding asile zinglam nazi 6 in zanlam nazi 6 tiang lawng caan in pe. Hmundang ih tuamhlawm aw ding khalin myone sibawi ih theihpinak le ralkap ih theihpinak lak vivo a tul. Hivek hman buainak teneu ih kan ton zomi a si,” tin a sim.
Ralhrang In Kani Donak Ah Vanzam An Hmang – Ralhrang ralkap cun Sagaing ramthen Kani myone sungih mipi ralkap pawl donak ah vanzam an hmangih, mipi 3 an thi phah tin khuami pawl cun RFA an simthei.
Khuami pakhat cun “Thuhla kan theih dan vek asile tutiang ahcun ralhrang in raldonak vanzam an hman ruangah mipi 3 an thi zo. Raldonak vazam in nazi 1 sung tluk hnuailam an kap ciamco. Leihnuai khalah Kani PDF le ralhrang pawl an do aw ih, doawknak thuhla cipciar cu mipi ralkap lamin an phuang ko ding,” tin a sim.
Kani PDF hotu cun “Ralhrang mipum 80 hrawng an si ih, kannih mipi ralkap komkhawm in kan do. May 31, zinglam nazi 9:15 in kan do aw thokih, ralhrang bawi pakhat telin ralhrang 30 hawng cu an thi ding tin kan ruat. Nazi 2 sung nasa ten kan do aw ih, doawknak ah ralhrang lam an tuarna. Cumi ruangah, raldonak vanzam an hmangih, mipi 3 an thih phah.
“Ralhrang lamin vanzam an hman cin cun kannih mipi ralkap pawl cu zamrang ten dung kan sip. Cumi ah mipi ralkap komkhawm lakin hriam ngah 4 kan um. Tuitum ah kanmah lawng siloin KLG PDF, MPDF, Dragon Brothers, Yoma Fighter le Yinmarpin PDF pawl thawn ralhrang ralkap do kan si,” tin a sim.
Leave a Reply