Hlasakthiam Benjamin Sum cun a dangbo ( tonsil ) natnak ruangah ziangmaw caan hlasak a cawlh hrih ding thu mipi theihternak a nei ih, a hrang thlacam sak dingin mipi a sawm.
Hlasakthiam Benjamain Sum cun “Hivek thuhla ka lo theihter a ttul ruangah ka riahse zet. Cumi cu ka dangbo (tonsil ) naa tuamhlawm ding ka si ruangah awnmawi in reilote sung ka cawl hrih ding. Reilote hnuah phur umza thawn ka ra kirsal dingih ka hrang thla in camsak hram uh. Nan zaten ka lo duhtawk tuk a si,” tin mipi a theihter.
Hlasakthiam Benjamin Sum cu Myanmar Idol a zuam lai khalah dangbo naa in a rak buai zet zo ih, tuitum ah felfai zetin tuamhlawm lawlaw a tum ruangah Awnmawi in reilo sung a cawl hrih ding.
Ralhrang in rampi thuneihnak an lak hnuah mipi lungrual cun ralhrang uknak do rero a si ih, dothlengnak cu a phunphun in tel a theih . Hlasakthiam Benjamin Sum khal a thiamnak zaihla hmangin dothlengnak ah theitawk suah rerotu a si ih, dothlengnak hrang le raltlan hrang hlasak in sumpai hawlnak ah theitawk rak tel ringringtu a si tlunah amai sumfai rori khal dothlengnak hrang le Myanmar raltlan hrang rak pe rero zotu a si.
Ralhrang In Zaw Win Htut Ih Fapa Hremnak An Pe – Ralhrang ralkap in dothlengnak ruangih an kaihmi hlasakthiam Zaw Win Htut ih fapa Ito cu ralhrang ralkap in kum 3 sung thawngtla dingin August 4 ah hremnak an pe.
Ralhrang ralkap cun 2021, September 5 ah Yangon S.Okalapah myone veng 5-nak ih um hlasakthiam Ito le a rualpi pawl an rak kai ih, dankalh cangvaihnak ah an tel tin thu an rak suah. Ralhrang in an kaih hnuah Ito cu Septmber 19 ah thlah zalen sal a sinan, September 20 ah ralhrang pawlin an kaisal ih, 2022, August 4 ah kum 3 sung thawngtla dingin hremnak an pe.
Ralhrang ralkap cun hlasakthiam Ito le rualpi pawl cu dankalh cangvaihnak ah an telih bomb tuahcop le ralthuam hrekkhat thawn kan kai ngah tin an kaih lai ah thu an rak suah.
Ralhrang Lamtang Pyu Saw Htee 13 An Thi – Sagaing ramthen Tanse myone Biatkyi khua kulhtu ralhrang lamtang Pyu Saw Htee pawl cu August 4, zinglam nazi 12 hrawngah mipi ralkap komkhawm in an kap ih, Pyu Saw Htee 10 an thi tin Guerrilla Warfare – KPK cun thu an suah.
Guerrilla Warfare – KPK cun “August 4, zinglam nazi 12 hrawngah Biatkyi khua kulhtu ralhrang lamtang Pyu Saw Htee pawl cu kannih Guerrilla Warfare, TSR, Tanse Tiger, PLA, TCRF le PRLF pawlin kan kap. Nazi 1 sung kan kap ih, Pyu Saw Htee pawl bawmtu ralhrang pawl an ra thlen ruangah kannih cu himdamten dung kan sip.
“Zinglam ah doawknak hmunih thi Pyu Saw Htee ruang 10 pawl cu cawleng pahnih in an phur lai khua mipi pawl cun an hmu. August 3, zan nazi 8 hrawng khalah sim hnuih vaktawk Pyu Saw Htee pawl kan kap ih, pyu Saw Htee 3 an thih tlunah hriamhma ngah tampi an um. Kannih mipi ralkap komkhawm lam cu kan him a si,” tin thu an suah.
AA In Rakhine Party ALP hotu Pakhat An Kai – Rakhine ralkap AA cun Rakhine Party ALP hotu pakhat Bohmukyi sangtu Khine Polin an kai tin ALP cun thu an suah ih, hivek cu Rakhine karlak buainak suaktertu a si tin an tarlang.
ALP cun “Kan party Central sungtel bohmukyi sangtu Khine Polin cu August 2, zan nazi 6 hrawngah Rakhine ralkap AA in a umnak inn rori ah an kai ih, inn ih um tlawngta nauhak pakhat khal an hruai tel. Hivek cu Rakhine buainak suaktertu a si ih, Rakhine zalennak zuamtu lakah thleng ding a silo tin kan hmu. AA cun ahlan khalah kan sungtel thenkhat kaihmi an nei zo ih, tutiang an thlah hrih lomi khal an um.
“Kannih ALP le AA cu miphun pakhat tumtahmi bang aw kan si. Tuvekin dothlengnak kan tuah laiah kanmah Rakhine sunglam buainak kan neihmi cu tlangpar ralthuamkai dang lak le ramleng hmuhdan ah Rakhine miphun sinak a tlaniamter. Curuangah lungrualnak siattertu cangvaihnak pawl cu hrialthiam in kaihmi Khine Polin , tlawngta Soe Min Naing le midang an kaihmi pawl khal thlah thuh dingin AA kan dil duh a si,” tin thu an suah.
AA cu Rakhine ramkulh sungah Politics party le miphun ralkap nei thabik ti ih an relmi a si ih, ALP khal Politics party le ralkap mallai nei in cangvai an si ve nan, Politics lamah nasa sawn ih cangvai le kan dung khalah Min Aung Hlaing tongtu ih tel tlangpar ralthuamkai pawlkom pakhat an si.
R2P Dil Bet Tum Kyaw Moe Tun – UN ah Myanmar palai tuan rero hrihtu U Kyaw Moe Tun cun Myanmar dothlengnak hrang R2P a dil peh vivo ding thu Myanmar mipi simtheihnak a nei.
U Kyaw Moe Tun cu NLD cozah san in Myanmar UN palai rak ttuan a si ih, Ralhrang ralkap in rampi thuneihnak an lak hnuah ralhrang tuanpi paih loin UN zungpi rori ah Myanmar mipi rak ttantu a si. Ralhrang in rampi thuneihnak an lak hnuah UN ahcun Myanmar palai ah ret peh thotho asinan, ralhrang ai a awh lo ih, NUG ai khal a awh lo.
Amah cu NUG le Myanmar mipi lamtang a si ih, UN ahcun UN ih Myanmar palai a rak si cia ruangah palai thar hril a si hlan sung cu UN ah Myanmar palai hna an kai ding. Anmah UN cun tuini tiang NUG le ralhrang cozah ah ziangmi an pom, an cohlang timi thu an suah hrih lo.
U Kyaw Moe Tun cun “Ka sinak le ka tithei tawkin ka dil rero zo ih, cumi bak cu tithei ka nei ve lo. Asinan, ka tlintawk le dil theinak cin in R2P dil peh vivo ka tumih, ka hlawhtlin hlanhlo ka dil rero ding. Leitlun ram hrekkhat cun Myamar mipi in ttan zet nan,in ttan hrih lotu an um ih, cupawl khal mipi lamtang dingin ka nor vivo ding.
“Ralhrang ralkap pawl cu thlengawk an tum dah lo ih, a kelten an cangvai ringring. Duhtawk in mipi an that ih, duhtawk in mipi neihsiah an siatsak, an ru, an suam. Cumi ruangah R2P dil peh rero ka si. Thenkhat cun a cangthei lo, R2P tivek ngah a theih lo ding an tinan, Myanmar mipi in kan ttul ruangah ka dil peh vivo ding a si,” tin a sim.
Responsibility to Protect (R2P) timi cu ram pakhat sungah a bur ih thahawknak ,leitlun ralkap daan pahbalnak ,miphun cimit tumih thahawknak a thleng cing khalin ramleng in an bawm lo asile R2P a lut thei ih, R2P a luh dan phunphun a um. Palai hmangin biakawknak, ralthuam peknak, ralthuam lei khamsaknak le sipuazi kharsaknak tivek pawl an si.
R2P ti ruangah UN ralkap pawl Myanmar ram sungah an lut tengteng ding tinak a si thluh lo ih, ralthuam in an bawm thei, palai in an remsak thei, ralhrang pawl ralthuam leinak an phit thluh thei ih ralhrang pawl sizuapi khal an phit thluh thei. Cupawl zate cu R2P sungah a um thluh tin U Kyaw Moe Tun cun a sim.
ASEAN le Ralhrang Remnak 5 Thu Ah Singapore An Sosang – ASEAN sungtel Singapore cun Myanmar ram buainak ruangah ralhrang cozah cu ASEAN in remnak 5 kan tuahpi nan, an pitlin duh cuang lo ahcun ralhrang kan seherh reronak ding san a um lo tin ASEAN ramdang vuanci meeting ah thu an bur.
ASEAN ramdang vuanci meeting cu July 31 in an thok ih, August 6 ah theh ding an si. ASEAN pawlkompi ah ram 10 an um ih , ram 10 palai lakin Myanmar lawng an tel lo. Culo palai dang zaten an tel thluh ih, USA, Russia le China palai pawl khal mikhual dihmun in thurelnak ah tel caan an nei.
ASEAN ramdang vuanci meeting ahcun Singapore ramdang vuanci Vivian cun “Myanmar ram buainak ah remnak um dingin ralhrang pawl cu thil 5 tuah dingah remnak kan tuahpi. Asinan, remnak kan tuahpimi 5 an pitlin duh cuang lo asile ziangsi ralhrang kan pehtlaih reronak san um?
“Tu ah ralhrang cun dothlengnak ruangih an kaihmi 4 an thlaithat men. Cucu, ASEAN thawn remnak kan tuahmi 5 ziangih an siarlonak le ASEAN palai Myanmar ih a tlawn rero khal zianghmanlo ah an suah men. Curuangah remnak kan tuahpimi 5 an pitlin duh lo ahcun ralhrang pehtlaih nawn lo ding kan si,” tin thu a bur.
Tu ah ASEAN ramdang vuanci pawl meeting nei rero lai an si ih, thunet zianghman an tuah hrih lo. Meeting ahcun Myanmar thuhla hleice zetin an rel ih, meeting an theh ah an thurelmi pawl mipi an theihter leh dingah ruah a si.
Russia Palai In US A Mawhtluk – Myanmar ih tlawng Russia ramdang vuanci Lavrov cun US cu buainak hrampi an si ih, Russia le China dokalh in caan hmang rerotu an si tin leitlun a simthei.
Taiwan le China buainak ah US House Speaker Nancy cu China lamih ralrinnak pek rero cingin Taiwan ram sungah a lut ih, China an thinheng tuk. Thinheng tuk China cu tuini tiang a takin an cangvai hrih lo nan, Taiwan hrang khohkhan zetin daan an tuahsak ih, China in nan suah thei dan ding lamzin a um lo tin an simthei.
Hivekin China le US boruak a sosan ciamco thu ah Russia ramdang vuanci Lavrov cun “Tuitum ih China le US buainak kan zoh asile US cu buainak hram an si ih, Ukraine le Russia buainak vek rori in Taiwan le China buainak ah an tel hrim. Leitlun hmuh theih lole lang lo ding tawkfang in buainak an suakter ih, midang tawtawk an hmang.
“China uknak kan zahsak tuk ti cingin Taiwan taw an tawk rero ih, an thurelmi rintlak a um lo. Ukraine le Russia buainak khal anmah US lamin Ukraine taw an tawk ruangah a si. Buainak ah hremnak tong lo dingin an cangvai ih, an tongkam le cangvaih dan cu a danglam tuk tlunah zum ding an um lo a si,” tin a sim.
Leave a Reply