Tio le kalay Lamzin An Ong – Falam peng Rihkhawdar kiangkap ih doawknak ruangah mipi ralkap lam cun Kalay in Tio fehnak zin cu August 13 ah an rak khar.
Tu ahcun Kalay le Tio fehnak lamzin cu August 19 in an onsal ding tin’ mipi ralkap lam cun August 18 ah thu an than ih, buainak a um asile a tul dan vekin kan kharsal ding tin’ an tarlang.
August 10 ah Tio ih ralhrang sakhan cu mipi ralkap komkhawm in bomb puah in an rak kap ih, ralhrang bawi telin ralhrang 5 an thi. Tio ih ralhrang sakhan do a si thu ah mipi ralkap khat le khat ruah dan bangaw lo an um phah ih, casuah in ralrinnak an pe aw rero zo. August 14 , sun nazi 2 hrawngah ralhrang pawl cun Tio kiangih Haimual khuathar an luhcilh ih, khua sungin inn 16 an urkang hnuah kum kim lo Chin unau hnihte an rak that.
Hivek a thlen hnuah buainak dang theih bet a si hrih lo ih, Tio le Kalay lamzin cu August 19 in mipi ralkap lam cun an on thu an sim. Doawknak ruangah lamzin kharsal a ttul ding asile mipi an theihter sal ding thu khal an tarlang.
Khatlam ah Gangaw PDF cun Kalaymyo le Gangaw lamzin zawh hrih lo dingin mipi theihternak an ve ih, Gangaw lamah doawknak a sosang tin’ an tarlang.
Myanmar Ah Russia Ralkap Zung An Ong Ding – Ralhrang ralkap cun Russia thawn kan tuantlangnak hngetter sintu ah Myanmar khawpi Naypidaw le Yangon ah Russia palai zung on a si ding tin’ Zaw Min Tun a tongsuak.
Russia le ralhrang tuantlangnak ah Russia cun Myanmar ah ralkap palai zung pahnih an ong dingih zung ahcun Russia ralkap le Myanmar ralkap in hna an ttuan ding. Khatlam ah Myanmar ralkap khalin Russia ah Myanmar ralkap palai zung an ong ve ding. Ralhrang ralkap cun Naypidaw le Yangon ah Russia ralkap zung hrang hmunram an ruat fel zo tin’ thu a suak.
Hitluk in Russia le ralhrang an tuantlang ciamco thu ah China cun thlanglam ram pawl a puh ih, US le Europe ram pawl ruangah Russia le Myanmar hi hnget zetin pehtlaih aw sinsin a ti tin an sim.
Russia in Ukraine an do ruangah US le Europe ram pawl cun Russia hremnak an pe ih, ziangkim ah an tuanpi duh lo. Ralhrang khal ralthuam rinsan in rampi thuneihnak an lak ruangah US le Europe ram pawlin an tuanpi duh lo ih,hremnak phunhun an pe ve. Hivek a si tikah hrem tuar veve Russia le Myanmar cu ziangkim ah naih aw zetin an tuantlang phah tin’ China lam cun an sim.
India In Rohingya Pawl A Kuat Thlung Ding – India ram Home Minister zung cun an ramsung ih um Rohingya miphun pawl Myanmar ih an kuat ding thu ca an suah ih, tu ahcun hmun pakhat ah an ret hrih tin an sim.
India Home Minister cun “India ram New Delhi khawpi ah daan lo ih lut Rohingya miphun pawl cu Myanmar ah kan kuat tlung thluh ding. Tu ahcun Center pakhat ah kan ret hrih ih, daan vekin an ram ah kan kuat ding a si,” tin a sim.
India Home Minister cun khawitawk ah Rohingya pawl an ret timi cu a rellang lo ih,ziangtikah Myanmar ah an kuat ding timi a ni cekci khal a rel tel lo. Tu ahcun Rohingya an kaihmi pawl cu hmunkhat ah ret dingin Delhi cozah an simthei zo.. India cun Rohingya hrimhrim an ram ih umter an siang lo ih, misual suamhmang phunkhat vekin an ruat.
2021 khalah India in Rohingya miphun pawl Myanmar ah kuat a rak tum zo ih, cumi ttih ruangah India Rohingya miphun 2000 lenglo cu Bangladesh lamah an rak tlan. Hivek ruangah India ram ih um Rohingya pawl cu an relh rero ih, thupten innsang ih hlawh khal an um.
Tuhrih ahcun Rohingya pawl cu Bangladesh raltlan hmunpi ah an tam bikih, Bangladesh khalin an ram ih Rohingya pawl Myanmar ah kuat tlung an tum ve. Asinan, ralhrang ralkap cun Myanmar ah Rohingya miphun an um lo ih, kan cohlang lo tin’ Bangladesh an let ve.
Hivek ruangah Bangladesh cun China an biak phah ih, China cun Rohingya thu ah ralhrang pawl an be lungkim thei ko ding tin an beisei. Tutiang cu Rohingya thuhla ah China le ralhrang pawl khal felfaiten biakawknak an nei thei hrih lo.
Rohingya pawl hi Myanmar rammi sinak nei, India rammi sinak nei. Bangladesh rammi sinak nei, Malaysia rammi sinak nei tivek an um ih, an zaten ram pakhat ih pom thluh ding cu an duh lo cio. Ralhrang ralkap pawl khalin Myanmar rammi sinak nei cu Myanmar ah an um thei ko tin an sim ve.
2017 kum ah ralhrang ralkap cun Rakhine ramkulh sungih Rohingya miphun pawl thianfainak an rak nei ih, Myanmar rammi sinak nei lo Rohingya miphun ting 7 lenglo cu Bangladesh ah an rak tlan thluh. Cupawl cu tu ah Bangladesh lam khalin Myanmar ah kuat kirsal thluh an duh ve. Kawl pawl cun Myanmar ah Rohingya tivek an um lo, vai hmelphu miphun kan um lo tin Rohingya pom lotu an um hnuaihni ve.
UN GS In Ukraine A Tlawng Ding – Russia in February 24 ih Ukraine an do hnuah avei khatnak hrang UN GS Guterres cun Ukraine a tlawng dingih, Ukraine a um sungah Ukraine President Zelensky le Turkey President Erdogan tei pahnih a kawm ding.
Ukraine President Zelenskyi le UN GS Gutterres cu Ukraine thlanglam ah tongaw ding an si. Tonawknak ahcun Nuclear Power plant hmunpi le Russia thawn remawknak um thei dan thuhla pawl an rel ding. Ukraine ih Nuclear hmunpi cu Russia lamin an luah hrih ih, Ukraine lamin an dil thei lo asile an kap tummen. Cumi ruangah tuitum ah nasaten rel tum an si.
Russia in Ukraine an do hnuah leitlun ram tamzet cun Russia le Ukraine karlak ah remnak dingin thu an rak relpi rero zo nan, zohman in remnak an tuahsak thei lo ih, tuini tiang an do aw peh hrih. Tuitum ah UN GS in teh Russia le Ukraine karlak ah remnak a tuahsak thei pei maw timi cu leitlun ih thilri pakhat a si ve.
Leave a Reply