Sagaing ramthen Kalaymyo ah Kalay mipi palik KPS cun rittheihsi an kaihmi ting 100 tlun man cu June 26 an urkang ih, rittheihsi tham le zuar an kaih vivo ding thu an tarlang.
Kalay mipi palik KPS cun “Leitlun rittheihsi dokalh ni avei 35-nak June 26 ah kannih Kalay mipi palik khalin thla 6 sungih kan kaihmi rittheihsi pawl kan urkang. Ritheihsi kan urkangmi pawl cu bingvar 293 gram ( ting 26 man ), Bingdum 2983 gram ( ting 80 man ), WY mum thawng 3 ( ting 13 man ) le ritteihsi dawhnak ih an hmanmi tthim 10 pawl an si.
“Rittheihsi kan urkangnak ahcun Kalay mipi uktu lamin hotu, Kalay mipi palik , Kalay PDF le khuanu khuap hotu pawl an tel ih, nazi 9:30 ah caan kan khar thei a si,” tin thu an suah.
Kalay mipi palik KPS cu ralhrang in rampi thuneihnak an lak hnuah CDM tuah palik pawl komkhawm ih an dinmi a si ih, a hleice in Kalay peng sungah rittheihsi an do tlunah palik tuanvo ih tuah tulmi pawl ziangkim an buaipi thu mipi theihternak an nei zo.
Sakhan Cuh Aw In Doawknak A Sosang – Karen ramkulh Myawady thlanglam Wawlay myone ih ralhrang ralkap sakhan Ukkari cu KNU ralkap KNLA ,KNDO le PDF pawl tangtlang in June 25 zan ihsin theitawk an do ih, June 26, zinglam nazi 8 hrawngah sakhan an lafel nan, ralhrang pawl an ra kirsal ih doawknak a sosang.
KNLA, KNDO le PDF pawl tangtlang in ralhrang sakhan an lakfel hnuah thianfainak nei dingin an feh ih, ralhrang dungsip pawl cu anmah bawm dingih ra ralhrang pawl thawn an sakhan suahsannak lamah an kirsal ih, nasa ten an do aw ciamco.
KNLA ralbawi cun “Mizan lamin nasaten kan do. Annih lam ralthuampi tiang an hmang nan, June 26, zinglam nazi 8 hrawng ahcun an sakhan suahsan in ralhrang pawl dung an sip. Cuveten kannih khal sakhan thianfainak nei dingin kan feh cih. Sakhan suahsan ih dungsip ralhrang pawl cu anmah bawm dingih ra ralhrang dang pawl thawn lamzin ah an tongaw ih, an sakhan lam panin an ra kirsal.
“Cutin , sakhan thianfainak kan nei man lo ih, nasaten kan doaw. Doawknak ruangah kiangkap khua mipi hrekkhat hrantang khal an um. Tuhrih tiang ahcun ralhrang ziangzat an thi tikhal rel a theih hrih lo. Sun hnuah ralhrang raldonak vanzam veikhat a ra zamin bomb in thlak. Boruak a sosang tuk lai a si,” tin a simthei.
Ralhrang In Mipi 10 An Urkang – Mon ramkulh Tadung myone Thungbolay khua ih mipi 10 pawl cu ralhrang pawlin June 25 ah an kai ih, an urkang that thluh tin tlansuak thei pawl cun an sim.
Ralhrang ralkap cun June 25 ah Thunbolay khua an luhcilh ih, mipi lakin mi 10 an kai. An kaihmi lakah nauhak pahnih le rualban lo pakhat an tel. Cupawl cu ralhrang in an thah hnuah mipi inn sungah an ret ih, inn thawn an urkang.
Mit hmutu cun “Thungbolay khua cu Karen miphun pawl umnak khua a si. Tuih ralhrang pawl kaihmi le thahmi khal Karen miphun pawl an si. An thahmi lakah nauhak le rualban lo khal an tel. Ralhrang pawl an rat ruangah tlan man lo mipi pawl cu ralhrang in an kai.
“An ruang pawl khal thaten phum duh loin inn sungah an retih, inn thawn an urkang tel. Ralhrang pawl cun Thungbolay khua in inn 152 an urkang. Tu ah ralhrang pawl cu khua sungah an um hrih ih,kaihmi hrekkhat an nei lai. Hrekkhat cu an thlahmi khal an um,” tin a sim.
Tadung PDF pawl cun theitawk in ralhrang ralkap pawl an rak do nan, ralthuam le mipum an thlauawk tuk ruangah dung an sip ih, ralhrang pawl cun Thungbolay khua an urkang tin thu an rak suah ve. An thusuahmi ahcun doawknak ah ralhrang 7 an thi man tin an tarlang.
Ralhrang 5 An Thi – Sagaing ramthen Bamuak ah mipi ralkap pawlin ralhrang pawl an do peh ih, June 26 ni an doawknak ah ralhrang 5 an thi tin thu an suah.
Kachin le Sagaing ramri Bamuak ah ralhrang ralkap le mipi ralkap pawl an doawknak a ni tel a si thlangih, a caan ahcun KIA le PDF tangtlang in ralhrang pawl an do. Tuitum cu anmah PDF tangkhawm in ralhrang fehkhawm bomb an rak puahmi a si ih, bomb puah ih ralhrang an domi ah ralhrang 5 an thi tin mipi an theihter.
Ralhrang pawl bomb puah an si tikah mipi zawnruat loin an cangvai ciamco ih, ralthuampi in kiangkap khua an kap ciamco. Hivek ruangah doawknak kiangkap ih um khua pawl cu khua ah um ngam loin hmunhim ih an ruahnak hmun ah an tlan. PDF pawl cun mipi tuar ding zawngin ralhrang an domi a silo nan, ralhrang pawl cu mipi tuar ding zawng rori’n an cangvai sawn tin mipi an simthei.
Ralhrang Ralkap In Palik Sakhan An Kap – Makui ramthen Htilin khawpi ih thleng ralhrang ralkap le palik pawl cu Karaoke thuhla ah nasa ten an el aw ih, an karlak boruak a sosang tin Htilin PDF cun thu an suah.
Thuhla theitu cun “June 26, zanlam nazi 5 hrawngah ralhrang pawl zuin le ritheihsi tham in an buai ih, tongkam an el aw ciamco. An rit hnuah Karoake feh tum an si ih, an duhdan bangaw lo ah an buai. An buainak hmun ahcun meithal an phorhsuak lo nan, a hnuah ralhrang pawl cun palik sakhan umnak lamah ralthuampi an kap ciamco ih, palik sakhan kiangih um inn pakhat a tlak ngah. Cumi ruangah ralhrang hnuai ih penguk cazin nu pakhat le a fanu an thi ih, inn ih rak um USDP party sungtel U Aung Than Win khal hriamhma naa tuk a ngah,” tin a sim ih, Htilin PDF khalin thu an suah.
Hivek a si hnuah Htilin pDF cun ralhrang palik pawl cu ralhrang hnuaiah hmuhsuam tuarih um rero men loin mipi lamtang dingin an rak sawm rero ve. Ralhrang pawl khal mipi bum tumin PDF fawm vek an hruh ih,khua sungah an cangvai ciamco tin Htilin pDF cun an thusuah ahcun an tarlang.
Yangon Palik Sakhan Bomb An Puah – Yangon ramthen Bahan myone Yitasi lamzinpi ih ralhrang palik sakhan cu June 26, zan nazi 6 hrawngah Yangon PDF pawlkom pahnih in bomb an puah thu an tarlang.
Yangon PDF cun “Kannih PDF komkhawm pahnih cun June 26, zanlam nazi 6 hrawngah Yangon Bahan myone ih palik sakhan bomb kan puah. Kannih cun ralhrang uknak kan do vivo dingih, mipi pawl in dinpi vivo dingin kan lo sawm a si,” tin thu an suah.
PDF pawlkom pahnih in Yangon palik sakhan bomb an puahmi ah ralhrang ziangzat an thi,ziangtluk palik sakhan a siat timi an fiah man lo ih, an himnak hrang dung an sip cih thu an hotu cun media simtheihnak a nei.
India Tilian le Leimin Ah Thi An Tam – India ram Assam State sungih tilian le leimin ruangah mi 127 an thi ti’n tuanvo neitu pawl cun thu an suah ih, theitawk in runsuahnak an nei rero hrih.
Assam State ih ruah cen ruangah zarh khat leng tilian, leimin an tuar thlangih , mi tampi hriamhma ngah, umnak tthawn an um tlunah mipi 127 rori an thih phah zo. Ruahcen ruangah tilian cun khua 4536 rori harsatnak a pe ih, mipi ting 2 le thawng 80 hrawng cu hmunhim beunak capm ah an um zo.
Tilian le leimin in zinpi 173 a siat zo ih, tilik ruangah umnak ding nei lo mipi tam tuk an um zo. Tilian le leimin tuar Assam State cu India ramsung State dang pawlin eiin ,sumpai le thilri phunphun pawl bomnak an pe rero ih, runsuah hna khal a tamthei bikin an ttuan. India cozah khalin mipi harsa pawl runsuak dingin ralkap ,lawng le vanzam an kuat rero tin thu an rak suah ve.
Leave a Reply