Kalay Ih Doawknak Ah Ralhrang Thi An Tam

Sagaing ramthen Kalaymyo thlanglam Natmyiang in suak ralhrang ralkap pawl cu June 22 ah mipi ralkap komkhawm pawlin nasaten an do aw ih, ralhrang 10 an thi tin mipi ralkap pawl cun thu an suah. Kalay thlanglam ih an doawk hnuah Kalay PDF cun a hranten Kalay le Tamu lamzin ah ralhrang mawtaw bomb an puah ih,ralhrang 20 hrawng an thi tin thu an suah.

CDF KKG cun “Kalaymyo thlanglam Natmyiang khua ih riak ralhrang mipum 100 hrawng cu June 22, zinglam ah ke in an suak ih, kannih mipi ralkap komkhawm CDF KKG, Kalay PDF, CNDF , RKDF le pah-khah-phah pawlin zinglam nazi 9:30 hrawngah kan rak kap.

“Zanlam nazi 3 tiang kan do aw ih, doawknak ah ralhrang ralkap 10 tlun an thi ih, hriam ngah tampi an um. Kannih mipi ralkap komkhawm lamin pah-khah-phah pakhat, CNDF pahnih, Kalay PDF pakhat tin mi 4 hriam ngah an um ve. Doawknak ah Kalay PDF pakhat kan can a si,” tin thu an suah.

Kalay PDF cun “Kalay thlanglam Natmiang khua ih umhmun khuar ralhrang ralkap mipum 100 pawl cu June 22 zingah ke in Yankyi Aung lamah an feh ih, kannih mipi ralkap komkhawm Kalay PDF, CNDF, CDF KKG , pah-kah phah le RKDF pawlin kan rak do. Zanlam nazi 3 hrawng tiang kan do aw ih, doawknak ah ralhrang 10 hnak in mal lo an thi.

“Doawknak ah kannih Kalay PDF lamin pakhat kan can ih,mipi ralkap komkhawm lamin 4 hriamhma an ngah. Zanlam nazi 4 hrawngah ralhrang ralkap pawl cun He-luk khua ih inn hrekkhat an bauh ih thil an laksak tlunah inn hrekkhat an urkang.

“Zanlam nazi 4 hrawngah Kalaymyo in Tamu lamin feh ralhrang mawtaw 7 cu kalay le Tamu karlak lamzin ah kannih Kalay PDF in bomb kan kam ciami in kan rak puah ih, ralhrang mawtawpi 3 a siat thlunah ralhrang mawtaw pakhat khal a siat. Ralhrang mawtaw bomb kan puahmi ah ralhrang 20 hrawng an thi dingah ruah a si,” tin thu an suah.

CNDF Vakok cun “June 19 ah ralhrang mipum 200 hrawng cu Kalay thlanglam ah hrosuang in ral an tho. Ralhrang pawl cu Natmiang ah zan hnih an riak ih,ralhrang mipum 70 hrawng cu June 22 ah Natmiang lamin Kalay lamah an feh.

“Ralhrang dang mipum 130 hrawng cu Natmiang in He-luk khua lamah an feh ih, kannih mipi ralkap komkhawm cun zanlam nazi 3 tiang kan do. Doawknak ah ralhrang 10 hnakin mal lo an thi ih, kannih mipi ralkap lamin pakhat kan can tlunah mi 4 in hriam kan ngah ve a si,” tin thu an suah ve.