June 27, zinglam nazi 7 hrawngah ralhrang ralkap mawtaw 5 in kalaymyo suahsan in Chin ramkulh sung an luh ruangah Chin miphun humhimtu CNDF cu Kalay le Falam lamzin karlak zawh hrih lo dingin mipi an theihter.
Ralhrang mawtaw pawl Falam an lan ding maw, Tedim peng sungah umhmun an khuar ding tikhal theih a silo nan, misual rapthlak ralhrang pawl in lamzin ih an tonmi pohpoh kaih an hman tlunah an thah theu ruangah lamzin tluanih ralhrang an um ahcun lamzinpi zawh lo cu mipi hrang himbik a si.
Khatlam ah ralhrang mawtaw a burin Chin ramkulh sung an luh tikah mipi ralkap pawlin bomb an puah theu ih, mipi tuar ve lo dingin le mipi mawtaw sawn bomb an puah ngah lonak dingah mipi an theihter caan khal a um ve.
Salai Tin Maung Oo Thih Caam An Hmang – Myanmar ram thuanthu tlunah chinmi thuanthu khalah ralhrang uknak do ruangih ralhrang in hridai in an thlaithat mi Salai Tin Maung Oo thih ni cu Myanmar ramsung hmun tinkim tlunah ramleng hmun tinkim khalah hngilhlonak caan an hmang.
Salai Tin Muang Oo cu Asho Chin miphun a si ih, Unau pa 8 lakah fapa upabik a si. 1951 kum ah Taung Ngu khawpi ah a rak suak. Rinsantlak le mifim, mifel mino le tlawngta hotu a si. Ralhrang uknak dokalh in caan an neih laifang 1976,March 22, ah Ne Win ralkap pawlin an rak kai. An kaih hnuah thawng an thlak ih, thla 3 sung thawng an thlak hnu 1976 , June 26 zinglam nazi 4:00 ah hridai in an thlai that.
“Hilai fangah Salai Tin Maung Oo cu kum 25 lawng a si ih, dothlengnak tuahmi na bansan asile kan lo thlah zalen ding tin an tiammi asinan, a nunnak hlanin ralhrang uknak rak dotu a si.
An thlaithat hlanah ralhrang pawlin thunetabik rel duh na nei maw an ti tikah Salai Tin Maung Oo cun “Ralkap kuthnuai hrimhrim ahhin ziangtik hmanah ka khuk ka bil dah lo ding, Ka taksa cu nan that thei ko ding nan, ka miphun le ka ram hrangah ka lungput le ka ruahnak cu ziangtik hmanah nan that thei cuang lo ding a si” tin a rak simthei.
Tlawng Saya An Kap That – Naypidaw ramthen Pinmana myone Alechaung khua ih tlawng sayakyi le Zirhtu pahnih dang cu June 25, zan nazi 10 hrawngah mi pahnih in meithal in an kap ih, tlawng saya pakhat a thi.
Alechuang tlawng sayakyi Maung Maung Tar, hramthok tlawng zirhtu Ni Win Htun le Hlaing Min Htun pawl cu tlawnginn sung room pakhat ah zanriah an ei tlang hai ih,cumi laifang cu meithal keng mi pahnih in an kap.
Meithal keng mi pahnih cun tlawng saya Ni Win Htun le HLaing Min Htun an kap ngah ih, a hmunah tlawng saya Ni Win Htun sawn a thi. Tlawng saya dang pakhat Hlaing Min Htun khal an kap ngah ih, sizung an luhpi cih. Tlawng sayakyi bik cu an kap ngah lo.
Zoin tlawng saya pahnih meithal in an kap timi theih a silo ih, tlawng saya kaptu pawl pawl kai ngah dingin kan hawl rero tin ralhrang lam cun thu an suah.
KNU In Ralhrang 19 An That – Karen ralkap KNU hmunram sung Ngiolaypin ramthen sungih doawknak ah ralhrang bawi telin ralhrang 19 an thi tin Central KNU cun thu an suah.
KNU ralkap KNLA le ralrhang pawl cu June 25 le 26 ah ni 2 peh in vei 3 do aw an si ih, doawknak ah ralhrang 19 an thi ih, hriamhma ngah tampi an um. Anmah KNU lam cun thi an um lo thu mipi an theihter.
KNU Central cun “June 26 ah Ngiolaypin ramthen Kyaukkyi myone Ngiokung khua kiangah ralhrang ralkap thawn kan doaw ih, ralhrang 3 an thi. June 25 ahcun Innet khua kiangah ralhrang ralkap thawn kan do aw ih, ralbawi telin ralhrang 14 an thi. June 25 thotho ah Naungkung khua kiangah kan do aw betih ralhrang 2 an thi.
“Ni 2 sung hmun 3 ih kan doawknak ah ralhrang thi an tam ih,hriamhma ngah khal an tam. Kannih KNLA lam cu kan him. Doawknak ih ralhrang pawl thi an tam ruangah ralhrang pawl cun kiangkap khua cu ralthuampi in an kap. Doawknak cu ramri lan ralhrang pawl ruangah suak a si.
“Ralhrang pawlin mipi tuar ding zawngin mipi umnak khua ih ralthuampi an kah ciamco ruangah khua 10 lengloin mipum thawng 10 tlun cu khua ah um ngam loin an tlan thluh. Ralhrang in ralthuampi an kah ruangah mipi lakin hriamhma ngah khal an um ih, inn siat phah khal a tam. Raltlan pawl cu theitawk in kan buaipi ih, kannih cun mipi kan humhim vivo ding a si,” tin a sim.
A tufang KNU hmunram 3 sungah doawkak a sosang ngaingai ih, ralhrang pawl cu mipi tihrim in an cangvai. Tadung myone ahcun ralhrang pawlin khua mipi 10 an thah tlunah mipi inn an urkang ciamco ih, mipi tamzet hmunhim ah an tlan. Myawaddy myone ahcun KNLA le KNDO komkhawm in ralhrang sakhan la dingin an kap ih, ralhrang dungsip pawl mipum tamsawn in an ra kirsal ruangah doawknak a sosang tin mipi an theihter.
Myawaddy myone sung sakhan cuh aw ih an doawknak ah ralhrang thi an tam nan, a zat an fiah thei hrih lo. KNDO le KNLA lam khalin CDm tuah ralbawi Wai Lin Aung cu ralhrang do in a nunnak a cem ve.
KNDO hotu pakhat cun “Tuitum ih kan thlahmi Wai Lin Aung Aung cu ralhrang sinak dinhmun sang in ralthuam famkim thawn CDM tuah a si ih, CDm a tuah hnuah daiten ummen loin kan hnenah ralhrang do rerotu a si. A awm ah ralhrang pawlin an kap ngah ih, dung kan sip lai lamzin ah a nunnak a cem. Kan lakah RPG kap thiam kan neihmi pakhat a si. Hivekin in fehsan tikah kan uituk lawlaw,” tin a sim.
MNDAA le Ralhrang An Do Aw – Shan ramkulh saklam Muse myone sungih um MNDAA pawl cu ralhrang lamin an va tibuai tikah doawknak a suak ih, ralhrang thi an um tin MNDAA lam cun an sim.
MNDAA hotu cun “June 26, sun nazi 2 hrawngah ralhrang pawl cu kanmah panin ral an tho. Hlaral in Nantuang ih kan sakhan in kap ih, kannih khal lamzin lailak ihsin kan rak kap cih ve. Nazi 1 sung kan kap aw ih, cumi hnuah kan himnak hrang dung kan sip cih.
‘Tu ahcun doawknak hmunram pawl thianfainak kan nei thei hrih lo. Curuangah, doawknak ah ralhrang thi an um rori nan, a zat kan fiah thei hrih lo. Ralhrang pawl kanmah lam panin raltho an si tikah doawknak a sosang sinsin thei a si,” tin a sim.
Kokang ralkap MNDAA pawl hi ralhtuam thatha nei an si ih, ralhrang thawn an doawk tikah ralhrang lam thi an tam thei ngaingai. Cumen siloin ralhrang ralthuam phunphun laksak thiamzet ralthuamkai pawlkom pakhat an si.
Mibum Hmang Pawlkom An Kai – Shan ramkulh saklam khua tinkim ah fehin an tonmi pohpoh lungmolhnak sii dawt ih a phunphun ih mi bumtu pawlkom pawl cu တန်ယန်း khawpi ah an kai ngah.
Mi bumhmang pawl hi mi 17 an si ih, nunau le mipa kom aw an si.
Tan Yan khuami pakhat cun, “Kan kai ngah tikah ningzak vekin an um ciamco. Khuitawk ihsin an ra ti kan thei lo. Khawpi le hmunpi sungih mi an bum thei nawn lo tikah khawte lamah ra cangvai an si in a lang. Tu ahcun kaih ngah fel an si,” tin a sim.
Misual pawl ih cangvaih dan cu tangka hlun le thar an thleng ih, phone hlun an lei, awngbali lem an zuar ih mi an bum vivo.
Hsipaw khawpi le Lashio khawpi lam khal an hrut thluh zo. Sii mi an dawt ih an dawhmi pawl cu nazi pakhat sung lai an thinlung a buai theh. Cumi sungah an hlawnthil, sui le ngun, sumpai an laksak, hrekkhat cu a bumin an bum.
Mi bumhmang pawl hi Yangon lam ihsin ra an si dingah an zum bik ih tlangpar miphun dang umnak khawte pawl an bum vivo. An thuhla theih a si tikah khua mipi tangrual in an kulh ih , an kai ngah. Kaihmi pawl cu tuanvo neitu pawl hnenah an ap tin khuami pawl cun an sim.
Russia In Kyiv Khawpi An Kap – Russia in thla 4 sung Ukraine an do hnuah Ukraine nisuahnak lampang cu nasa ten an domi a sinan, June 26 ahcun Ukraine khawpi bik Kyiv in bomb zamthei 14 a dong.
Russia in Ukraine an do pekah Ukraine khawpi bik Kyiv lam tiang lak thluh an tumih, ralkap le mawtaw tamzet in Kyiv khawpi an rak pan. Asinan, Uraine ralkap pawlin theitawk in Kyiv khawpi an rak humhim thei ruangah Russia ralkap pawl cu dung an sipsal ih, Ukraine nisuahnak lamah tanhmun an khuar.
Kyiv khawpi in meithal puak awn le bomb puak awn a thei nawn lo ih, pangai zetin Kyiv khawpi sungih um mipi pawl khal caan an hmang rero zo. Buainak bik cu Ukraine nisuahnak lam Donbas ramthen sungah a si.
Asinan, June 26 ahcun Russia in bomb zamthei 14 in Kyiv khawpi an kap ciamco ih, Kyiv khawpi sungin innpi pahnih a siat phah. Russia cun zinglam nazi 6 hrawngin bomb zamthei in Kyiv khawpi kiangkap an kap thok ih, Kyiv khawpi sungah bomb zamthei Missile 4 a tla. Culo dang cu Kyiv khawpi kiangkap ah an tla.
Tu cu Russia in hlaral in Kyiv khawpi an kahmi a si ih, an doawknak hmun taktak cu Ukraine nisuahnak lam Donbas ramthen sungah a si. Donbas ramthen sungin Luhansk kiangkap cu kan la fel zo tin Russia cun thu an suah ih, Ukraine lam dungsip an tum men an tum lo tikah Donbas ramthen sungah doawknak a sosang hrih dingin a lang.
Leave a Reply