Tamu PDF cun a tufang kalay le Tamu karlak ih ralhrang thawn doawknak a sosan ruangah mipi pawl cu a cangthei asile kalay le Tamu karlak lamzin zawh hrih lo dingin June 8 zingah mipi an theihter.
Tamu PDF cun “A tufang Kalay le Tamu karlak lamzin ah ralhrang ralkap thawn June 7 ah nasa ten kan do aw ih, mipi pawl cu Tamu le Kalay karlak lamzin zawh hrih lo dingin kan lo simthei duh. Lo theih loin Kalay le Tamu karlak lamzin kan feh tul asile mawtaw sangka thlalang ong uhla feh uh. Cuvek a rem lo asile mawtaw mit engter uh. Lole ralhrang mawtaw ah kan ruat pang dingih kan lo kap ngah pang ding a si,” tin thu an suah.
A tufang Tamu peng sungah ralhrang ralkap le mipi ralkap pawl nasa ten an do aw ih, Kalaymyo ih ralhrang pawl cu Tamu lamah an fehsuak theu. Cumi ruangah Tamu PDF pawl cun Kalay le Tamu lamzin cu mipi zawh hrih lo dingin mipi an theihter.
Ralhrang In PDF 4 An That – Ralhrang ralkap cun mandalay ramthen sungin le Makui ramthen sungin PDF 4 an that. Mandalay ramthen sungin PDF cu ralhrang in an kaih hnuah an that ih, Makui ramthen sungih PDF 2 cu ralhrang thawn doawknak ah thi an si.
Makui PDF cun June 7, zinglam nazi 6 hrawngah Puak myone Kaile palik sakhan an do ih, palik lamin an rak khamawk ve tikah nasa ten an doaw. Doawknak ah ralhrang palik tamsawn cun an sakhan an suahsan thluh ih, ralhrang palik pakhat cu nungdam in PDF pawlin an kai ngah.
Doawknak a rei tikah ralhrang cun Helicopter an hmangih, duhtawk in hnuailam an kap ciamco. Cumen siloin leihnuai khalin ralhrang tamzet cun ‘kaile palik sakhan an pan ve. Cuvek ruangah PDF pawl cu zamrang ten dung an sip cih ve nan, PDF pahnih cu ralhrang ralkap pawlin an kap that man tin Makui PDF cun thu an suah.
PDF cun Kaile palik sakhan cu an nawkkang thluh ih, palik thizat le ralthuam an lakzat tivek an phuang lo. Cutikah palik tlan pawlin ralthuam ziangkim an tlanpi thluh manin a lang. Palik sakhan doawknak ih thi PDF 2 cu June 7 ah kan vuiliam cih tin PDF cun mipi an theihter.
Mandalay ramthen Kyaukpandaw myone Botte khua khalah ralhrang ralkap cun PDF pahnih an kai ngah ih, an that cih tin Mandalay PDF cun mipi an simthei ve. Ralhrang ralkap in an kaih hnuah an thahmi PDF mino pahnih cu Hein Zeyar Phyo le Hein Zeyar Oo an si.
Khuami pakhat cun “Ralhrang in an kaih hnuah nasa ten an hrem ih, an kap that. Pakhat sawn cu a lu ah an kap ih, pakhat sawn cu a awm ah an kap. Rawl ei dingin hmundang ih feh an si ih, lamlak ah an rak kai. An kaihnak san cu an phone an ceksak ih, an phone sungah PDF fawn thaen an zuk an hmu ih, an kai cih siko. Cuveten, palik pawl cun ralhrang hnenah an kuat.
“Ralhrang pawl cun hremnak hmunah nasa ten an rak hrem ih an theih duhmi an rel lo ruangah si ding hremnak hmun ahcun an kap that men. An phone sung ahcun PDF fawm thawn an zukawkmi lawng siloin PDF thuhla dang neuhneuh tla a um tivek kan thei. Tu ahcun an phone pawl cu ralhrang kutah a um zo a si,” tin a sim. Kyaukpandaw PDF khalin an sungtel pahnih ralhrang pawlin an kai ih, an that tin mipi an rak theihter ve.
Ralhrang cun Sagaing ramthen Chaung Oo myone khalah PDF pahnih le mipi 6 an that tin Chuang Oo PDF cun thu an suah.
Chuang Oo PDF cun “Thillei lam tuanvo latu kan sungtel PDF 2 cu June 7,zinglam nazi 7 hrawngah Pyu Saw Htee an kai ih, cumi thawn pehpar aw in mipi 6 an kai bet. Pyu Saw Htee le ralhrang cun PDF 2 le mipi 6 an kaihmi cu an that cih hngal.
“Ralhrang donak ah nunnak hlantu zaten an sungte rualin kan tuarpi tuk. Kannih a damlai pawl cu ralhrang uknak cemral ko kan do vivo ding a si,” tin thu an suah.
Ralhrang Mawtaw Bomb An Puah – Sagaing ramthen Sagaing khawpi in Mungzua Mandalay lamzin ih feh mipi mawtaw vek to ralhrang ralkap pawl cu June 7, sun nazi 2:30 hrawngah PDF in bomb an rak puah ih, ralhrang 4 an thi tin PDF komkhawm cun mipi theihternak an nei.
PDF cun “Ralhrang pawl mipi mawtaw vek to in an suakvak timi kan thei ih,kannih cun ralring zetin kan rak bawh cih. Kan hnen lam an ra thlen tikah ,ralhrang pawl an to timi kan fiang hnuah bomb kan puah. Ralhrang mawtaw bomb puak ah 4 an thi fel a si,” tin thu an suah.
Ralhrang mawtaw bomb puahtu mipi ralkap pawl cu Farmers Revolution Force FRF (CHU), MRA, le mipi pumpe aw pawl an si. Pumpe aw pawl timi cu PDF pawlkom hminsung ah ngan an silo nan, PDF in an tul caan ah ralhrang do in pok vutvo cih pawl an si.
Makui ramthen Sikphyo myone Ttanmakauh khua ih umhmun khuar ralhrang ralkap pawl khal June 7, sun nazi 2 hrawngah mipi ralkap komkhawm in bomb an puah ih, ralhrang 10 hrawng an thi ding tin thu an suah.
Doawknak ah PDF lam cun ralhrang hnenin meithal zunkhat an laksak thei thu an tarlang ih,doawknak ah PDF pakhat a thi ve tin mipi an simthei.
Leave a Reply