Kalay PDF In Mipi Ngaithiam An Dil

Kalay PDF In Mipi Ngaithiam An Dil – Sagaing ramthen Kalaymyo ah kalay PDF cun ralhrang ralkap mawtaw bomb an puah ih mipi vak pakhat hriamhma a ngah phah ruangah Kalay PDF cun hriamhma ngah mipi hnenah ngaithiam an dil cih.

Kalay PDF cun “July 23, zinglam nazi 7 hrawngah Kalaymyo in suak ralhrang mawtaw pakhat bomb kan puah. Ralhrang mawtaw cu bomb kan puah ngah nan, an feh peh thei. Cumi hnuah ralhrang mawtaw dang pakhat a rasal ih, bomb kan rak puahsal. Neta sawn bomb kan puahmi cun an mawtaw a fuh tukih, ralhrang mawtaw cu lamzin sirah a ding hngal. Mawtaw sungin aihram thawm le tap thawm khal kan thei.

“Lamzin sirih ding ralhrang mawtaw cun anmah bawm dingin ralhrang dang an ko ih, zinglam nazi 8 hrawng lawngah ralhrang dang an thleng thei. Ralhrang pawl cun kiangkap cu duhtawk in an kap ciamco. Kiangkap duhtawk ih an kah hnuah ralhrang pawl cun kiangkap ceknak an nei betih, cumi laifang ah bomb kan puah bet. Ralhrang mawtaw bomb kan puahmi ah ralhrang 5 an thi ih, hriamhma ngah tampi an um.

“Ralhrang ralkap in lamzin ceknak an nei ih, cumi laifang ih bomb kan puahmi cun lamzin feh mipi pakhat a ngah ih,hriamhma a ngah tin kan thei. Kannih Kalay PDF cun hriamhma ngah mipi hnenah ngaithiam kan dil duh ih, poi kan ti tuk rori. Kannih Kalay PDF cun ralhrang pawl kan donak ah mipi tuar lo ding zawngin cangvaih kan tumbik.

“Ralhrang ralkap pawl umhmun khuarnak, ralhrang ralkap pawl inn kiangkap le ralhrang ralkap pawl mawtaw kiangkap ah doawknak a suak thei ringring ih,ralhrang ralkap kiangkap hrimhrim ah mipi um lo dingin zangfah kan lo dil duh a si,” tin Kalay PDF cun thu an suah.

Paletwa Ah AA le Ralhrang An Do Aw – Chin ramkulh Paletwa peng sungah mipi cun July 24, zinglam in doawknak thawmvang puak awn an thei ih, Paletwa peng sungah Rakhine ralkap AA le ralhrang an do aw tin BBC an simthei.

July 24, zinglam nazi 10 hrawngin Paletwa ih um mipi pawl cun puak awn an thei thok ih, minute 20 sung khat le khat an kap aw tin an sim. Tuitum ih AA le ralhrang doawknak cu kan dungih AA le ralhrang pawl an rak doawknak Abuangtar khua kiangih ralhrang pawl umhmun khuarnak tlang kiangkap ah a si.

2022, May 26 ah ralhrang ralkap pawl cun Abaungtar khua kiangkap ih AA sakhan an rak kap ih doawknak a suak. June 27 khalah AA lamin ralhrang an kap hmaisa ih, an doaw sal. June 27 hnu ahcun July 24 ah ralhrang ralkap le AA doaw sal an si. Tuitum an doawknak ah thi an um maw timi cu felfai in theih a si lo ih, zosawn in doawknak hram an thok timi khal theih a silo.

KNU Hruaitu Hrilawknak An Nei Ding – Karen ralkap KNU cun covid 19 natnak ruangah kum 4 veikhat hruaitu hrilnak an neih theumi cu an nei thei hrih lo ih, tu ah hruaitu hrilnak neih thei rori an tum thlang.

Cumi thuhla ah KNU thuphuangtu Padosaw Tawni cun “Kanmah KNU daan ah hruaitu hrilawknak caan cu kum 4 veikhat ah tuah dingin kan rel. Tu ahcun covid 19 natnak ruangah kum 4 veikhat hrilawk ding cu kan tuah thei lo ih,kum 5 le hrek a si thlang. Asinan, kan dan hrampi ah doawknak le thildang ruangah hruaitu kan hril aw thei lo asile kum 2 sung caan dang lak a theih timi kan nei.

“Covid 19 natnak ruangah a caan vekin hruaitu hril aw thei lo kan si ih, covid 19 natnak ruangah kan hruaitu hrekkhat khal kan can. Covid 19 natnak tlunah doawknak ruangah khal a si. Ralhrang ralkap in rampi thuneihnak an lak tikah nasaten kan do aw ih, doawk laiah kan hmunpi ih hrilawknak rak tuah ding cu a him lo.

“Kan dung khalah kan hmunram sungih um AA sakhan pakhat cu ralhrang pawlin vanzam in bomb an thlakih AA 6 an thih phah. Hivek cu thleng lo dingmi a si. Curuangah kannih khal thu tampi kan ruah phah ve. Hrilawknak tuah sehla nikhat men ah kan theh thei lo ih, cumi laiah vanzam in bomb thlak kan sile ziangtin kan kham aw ding tikhal ruah a ttul.

“Hivek cu mizapi theihthiammi a si ruangah kannih khal hrilawknak a ni kan bikhiah thei hrih lo phah. Ziangasikhalle, kum 2 tlun a luan thei lo ruangah kan tuah rori cu a tul ding. kan daan tlunah kan um thei lo ih, kan daan in kum 2 bak caan lakbet a sian lo ruangah a rem dandan ih tuah khal a ttul ding a si,” tin a sim.

KNU hruaitu hrilawknak netabik cu 2017 kum ah an rak nei zo ih, 2021 ah hrilawknak neisal ding an rak si. Tu ahcun karen ramkulh sung hmun tinkim ah doawknak a sosang tukih, hrilawk tuah ding an harsat. Asinan, an caan in a duh nawn lo ruangah lo theih loin hrilawknak an tuah a tul thlang ding.

Tanintharyi Ah Ralhrang 52 An Thi – Tanintharyi ramthen Tayet chaung le Dawei myone sungih thla 2 sung doawknak ah ralhrang 52 an thi tin Tanintharyi PDF cun mipi theihternak an nei ih, thla 2 sung doawknak ahcun PDF 7 le mipi pakhat khal an thi ve tin an tarlang.

Tanintharyi PDF cun “June 3 ah Tayet Chuang myone ih ralhrang umhmun khuarnak hmunpi cu kannih Tanintharyi PDF komkhawm in kan do. Doawknak ah ralhrang 12 an thi ih, kannih PDF lamin miraltha 2 kan can ve. Ralhrang sakhan cu kan doneh ih, Pyu Saw Htee hrekkhat kaihmi khal kan nei. June 25 ah ralhrang ralkap pawl kan kap betih, ralhrang 2 an thih tlunah ralhtuam hrekkhat khal kan laksak thei.

“June 29 khalah ralhrang ralkap thawn kan do aw nan, doawknak ih ralhrang thizat kan fiah thei lo. July 2 ahcun ralhrang ralkap le BGF komkhawm mipum 400 hrawng cun kan umnak hmun lam in ra pan ih, minute 30 sung tluk kan doawk hnuah kannih PDF lam dung kan sip. July 3 zing khalah kan do aw peh ih, bomb 14 in ralhrang kan puahmi ah ralhrang 14 an thi ih, ralhrang 20 hrawng hriamhma an ngah. Kannih lamin miraltha pakhat kan can ih, hriamhma ngah pahnih kan um ruangah dung kan sip bet.

“July 6 ah ralhrang ralkap le BGF komkhawm cun in pan betih bomb kan rak puah tikah ralhrang 5 an thi. July 7 khalah ralhrang ralkap le BGF pawl cun in do peh ih, kannih lamin miraltha phnaih le mipi pakhat an thi. Doawknak ah ralhrang mipum 7 hrawng hriamhma ngah an um. July 10 khalah anmah ralhrang lamin thupten in do peh ih, kan miraltha PDF 5 an thi ih, ralrhang lam 9 an thih tlunah hriamhma ngah 3 an um. July 15 khalah kan do aw peh ih, doawknak ah ralhrang ralthuam hrekkhat kan laksak thei a si,” tin Tanintharyi PDF cun thla 2 sung an cangvaihnak July 24 zan ah mipi theihternak an nei.

AA In Ralhrang Bawi An Kai – Rakhine ramkulh Kyauk Phyo palik sakhan ih palik bawi pakhat cu July 24 ah AA pawlin an kai ih, an thlahsal hrih lo.

Ralhrang palik bawi cu bazar kai dingin suak a si ih, lamlak ah AA pawlin an rak kai. Kaihmi palik bawi cu Kyaw Zin Win a si ih, Kyauk Phyo ralhrang palik sakhan ah sakhanhmu a si.

Khuami pakhat cun “Zinglam nazi 8 hrawngah AA cun palik bawi pakhat an kai. Thuhla a darh hnu reilo ah ralhrang ralkap pawl an thleng cupco cih ih, kiangkap ceknak an nei ciamco nan, tutiang cu mikaihmi an nei hrih loin kan thei. Asinan, mipi cu leng kan suak ngam lo phah. Dawr nei pawl khal an dawr an ong ngam hrih lo,” tin a sim.

AA cun June 16 ah ralhrang ralkap pakhat, June 20 ah palik 3, June 21 ah palik 3, June 22 ah palik 2, June 23 ah ralhrang ralkap 2 tinan rak kai zo. Hivek ruangah ralhrang khalin mipi 30 hrawng an kai ih, hrekkhat cu thubuai an tuahsak cih. AA in July 17 ih an kaihmi Punma Kyuan peng uktu Hla Shwe le mawtaw mawngtu cu July 23 ah an thlahsal zo thung.

Ralhrang In ICJ Court An Sanglet – ICJ Court ih ralhrang thubuai rel rero laimi ah ICJ Court cun ralhrang pawlih thiamthu relnak zaten an hnonsak thluh ih, daan vekin ICJ Court ah ralhrang thubuai rel peh a si ding tin thu an nemhmget zo.

Cucu, ralhrang pawl an lungawi lo tukih, ICJ Court cu felfaiten lairel dingin le thuthennak nei dingin an theihter ih, ca an kuat. Ralhrang in ICJ ca an kuatmi ahcun kan thu in hnonsakmi pawl kha daan ih um thluh , felfai zetin daan vekih kan tuahmi a si tin an tarlang bet.

ICJ Court ih ralhrang thubuai rel rero laimi ah ralhrang cun thiamthu an rak rel ih, Gambia in thubuai in tuahsak theinak an nei lo, Gambia ram thawn buainak kan nei lo ih, ICJ Court khalin kan thubuai rel theinak an nei lo tin an sim. Cumi zaten ICJ lamin an rak hnong thluh ih, ICJ Court ah daan vekin nan thuhla kan rel peh ding a si tin ralhrang an simthei.

Hivek ruangah ralhrang pawl cu ICJ Court parah an lungawi lo. Felfai zetin thuthen uh, ttanmi nei hlah uh,thudik zetin nan fehpi kan lo beisei a si tin ralhrang pawl cun ICJ an theihter.

2017 kum ih ralhrang ralkap le Rohingya buainak ah ralhrang pawl cun Rohingya mipi tamtuk an rak that ih, cucu miphun pakhat cimit tumnak sual a ti tin Gambia ram cun 2019 kum ah ralhrang pawl cu ICJ Court ah an rak hek.

A thok ahcun Daw Aung San Suh Kyi cu ralhrang pawl humhim in ICJ Court ah a rak feh nan, ralrhang pawlin anmah humhimtu Daw Suh Kyi an kaih hnuah anmah ralhrang sung ihsin ICJ ih an thubuai reltu ding pawlkom thar an dinsal. Cutin, thubuai cu ICJ Court ah rel peh rero lai a si ih, ziangtikah an rel theh ding timi cu theih a si hrih lo.