Chin ramkulh Kanpetlet peng sungah ralhrang ralkap le CDF Kanpetlet pawl ni 5 sung an do aw thlang tin CDF Kanpetlet cun mipi theihternak an nei.
Kanpetlet peng sungah CDF Kanpetlet cun June 9 in ralhrang ralkap an do thokih, June 13 tiang an do aw peh hrih. June 9 ih an doawknak ah ralhrang ralkap 9 an thi ih, mipi ralkap lam an him. June 10 ih an doawknak ah khatlam khatlam in thi an um lo.
June 11 ih an doawknak ah CDF kanpetlet cun an sakhan pakhat an suahsan phah nan, ralhrang ralkap 6 an thi. June 12 ahcun CDF Kanpetlet sakhan ih um ralhrang pawl cu CDF kanpetlet le an tuanpi pawl in an do ih, ralhrang cun CDF Kanpetlet sakhan pakhat an nawkkang nan, doawknak ah ralhrang 11 an thi ih, Kanpetlet khawpi sungih doawknak khalah ralhrang 5 an thi. June 13 khalah CDF Kanpetlet cun ralhrang ralkap an do peh nan, ralhrang thizat an fiah thei hrih lo thu mipi theihternak an nei.
Doawknak a um tinten mipi tuar ding zawngih cangvai ralhrang ralkap pawl cun kiangkap khua ih mipi inn an bauh ih, mipi thilri duhtawk in an fir phah.
Chin ramkulh Mindat khalah Mindat khawpi in suak ralhrang ralkap pawl cu CDF mindat in June 13, zan nazi 8:18 hrangah an do ih, doawknak ah ralhrang ziangzat an thi timi an fiah thei hrih lo tin mipi an theihter.
Chin ramkulh Falam khawpi Cinmual veng ih um Ah-htah-kah 2 tlawnginn kiang khalah June 13, zan nazi 10 hrawngah bomb a puak ih, ralhrag ralkap pawl cun kiangkap an kap ciamco hngal tin Falam ih um pawl cun an sim.
CNA Camp Ih Khummi Ralhrang 3 An Tlansuak – Chin ralkap CNA camp ih khummi ralhrang 3 pawl cu thupten CNA camp an suahsan ih, an tlanhlo tin CNN cun a tarlang.
Ralhrang ralkap pawl cu 2022, June 10 ah Hakha peng Chuncung khua an luh laiah kaih an si ih thu an suh tikah CDM tuah duh ah kan tlan tin an sim. Ralhrang 3 cu CNA camp ah ret an si ih, thupten an rak tlansuak thluh.
CDF in ralhrang 3 an kaih dan cu Hakha in ralhrang 3 pawl an tlansuah lai mipi in an hmu ih, CDF hnenah an theihter. CDF pawl cun ralhrang 3 pawl ih dungin an thlun vivo ih, Chunchuang khua kiangah an kai ngah. Kaih ngah an si tikah CDm tuah dingin tlan kan si tin an rak simthei.
Cutikah, CDF pawl cun ralhrang an kaihmi 3 pawl cu Chin ralkap CNA hmunpi Camp Victoria ah an hruai ih, an zan khatnak ah an tlan cih hgal tin CNN cun mipi theihternak an nei.
Khua Nawkkangtu Ralhrang An That – Sagaing ramthen Khin Oo myone Minito lamzin ah ralhrang ralkap cun mi 2 an kai ih, lamzin hruaitu ralphaw ah an hmang. An duhnak hmun hruaitu ih an hman hnuah ralhrang cun anmah hruaitu mi pahnih an that ih, mipi cun thi cia in an sar.
Cumen duhtawk loin ralhrang ralkap cun kiangkap ih mipi inn an nawkkang vivo phah. Mipi inn nawkkang ih,mipi thilri rutu ralhrang pawl cu Khin Oo PDF in lamlak ah bomb puah in an rak do ih, ralhrang 18 an thi tin Khin oo PDF cun thu an suah.
Ralhrang ralkap cun mipi inn 35 an nawkkang man. Ralhrang ralkap lak ah Pyu Saw Htee pawl an tel ih, ralhrang thi 18 khalah Pyu Saw Htee an tel ve tin PDF lam cun an tarlang.
Palik Sakhan An Kap – Sagaing ramthe Wetlet myone Shingmaka palik sakhan cu June 12 ah PDF in an kap ih, ralhrang ralkap lamin raldonak Helicopter an hmang phah tin PDF lam cun thu an suah.
Wetlet PDF hotu cun “Palik sakhan lafel ding rori in kan kap nan, reilo ah ralhrang cun raldonak helicopter an hmangih, sakhan cu lafel loin dung kan sip phah.
“Wetlet cu Saing ramthen sungah ralhrang in tlunsang ,tipar le lamzin an hman tangkainak hmun a si ih, curuangah kannih cun theitawk in kan do rero. Asinan, ralhrang lamin raldonak Helicopter an hman tik ahcun kan hrangah tingaihnak a um lo.
“Zanlam nazi 4 in kan do thokih, nazi 6 hrawngah ralhrang cun raldonak Helicopter an hmang. Reizet palik sakhan kan kap man ih, ralhrang 3 cu an thifel in kan hmu. Kannih lam khal ralhrang in raldonak Helicopter an hman tikah hriam ngah an um ve. Tuhrih ahcun boruak kan ngaicang hrih a si,” tin a sim.
Ralhrang Ruangah Danthiam A Awk That Aw – Mandalay ramthen Patheinkyi myone UngChaw khua ih danthiam Phyo Phyo Khaig cu ralhrang ralkap in a nunau 3 an kaih ruangah a a awk that aw.
Ralhrang ralkap cun danthiam Phyo Phyo Khaing cu dothlengnak ah na tel ih, PDF pawl na somdawl tin June 8 an va pan ih,kaih an tum. Asinan, Phyo Phyo Khaing a rak um lo tikah ralhrang cun Phyo Phyo Khaing ih nau 3 an kai.
Phyo Phyo Khaing cun ralhrang ih kaihmi a naule 3 cu theitawk in pehtlaih a tum nan, a pehtlaih thei lo ih, an umnak a theih lo ruangah June 12 ah a nun beidong tuk cu amah le mah a awk that aw.
Buaipitu pakhat cun “Pangang sii a in ih,theitawk in an tuamhlawm rero zo nan, a nunnak a celfel zo a si,” tin a sim.
Rakhine Party le Min Aung Hlaing An Tongaw – Ralhrang ralkap hotu Min Aung Hlaing cun tlangpar ralthuamkai hotu pawl hmaiton in ka be duh tin may thlasung ah nasa ten a rak aupi ih, tlangpar ralthuamkai le pawlkom 10 pawl cun Min Aung Hlaing tong dingin hmin an rak pe.
Ralhrang hotu Min Aung Hlaing cun amah hmu duhtu tlangpar ralthuamkai le pawlkom 10 pawl cu a bur in a tong lo ih, pawlkom pakhat tetein a be hai. June 13 ahcun ralhrang hotu Min Aung Hlaing in Rakhine party ALP hotu pawl a tongih, thureltlangnak an nei.
Thu an reltlangmi ahcun Rakhine ram thansohnak hrang ALP lam cun an dil ih, Min Aung Hlaing cun tu khalah Rakhine ramkulh hrang nasa ten hna kan tuan ih, hmailam khalah Rakhine ramkulh thansohnak hrang theitawk kan suah vivo ding tin a rak tiam hai.
ALp le ralhrang tonawknak ahcun ralhrang lamin hotu Min Aung Hlaing, ralbawi Mya Htun Oo, ralbawi Moe Myint Tun le ralbawi Zapih pawl an telih, Rakhine party ALP lamin hotu sang Daw Saw Mya Zalin, Central sungtuan Khaing Soe Me le Khaing Pawlin pawl an tel ve.
Tonawknak an neih thluh hnuah ralhrang ralkap cun ‘Rampi pakhat thangso ding cun khatlam khatlam in kan zuam a tul ih, remdaihnak um ram din dingah kan zaten kan zuamtlang a tul a si tin thu an suah.
Ralhrang ralkap hotu Min Aung Hlaing be dingin hminpe tlangpar ralthuamkai le pawlkom 10 pawl cu ALP, RCSS, KNLA PC, DKBA, NMSP, PNLO, UWSA, NDAA le SSPP pawl an si.
Leave a Reply