Khawlal Le A Rualpi Pawl An Kap That

Paletwa Hrang Bomnak Ralhrang In An Phit – Chin ramkulh thlanglam Paletwa ih Chin raltlan pawl hrang WFP cun bomnak fangfai dip thawng 2 an kuat nan, ralhrang pawlin phurh an siang lo ih, paletwa a thleng thei lo.

Buaipitu pakhat cun “Tu ah Paletwa ih raltlan hmunah ei ding an nei nawn lo. Paletwa ah doawknak a um ih, Rakhine ramkulh Kyaukdaw ihsin Paletwa ih phurh dingmi fangfai dip thawng 2 cu ralhrang in phurh an siang lo. Hivek ruangah raltlan pawl an harsa ngaingai a si,” tin’ a sim.

Chin ramkulh Paletwa peng sungah ralhrang ralkap le AA an do aw thoksal ih, Paletwa mipi hrang eiin phurhnak lamzinpi ah ralhrang pawlin eiin phurh an siang hrih lo. Paletwa ih um pawl cun Rakhine ramkulh Kyaukdaw ah tulsami phunphun an la theu. Cucu, ralhrang lamin an kharsak hrih.

August 20 in Paletwa peng sungah ralhrang ralkap le AA an do aw zo ih, Rakhine ramkulh Maungtaw lam khalah AA le ralhrang an do aw peh. Maungtaw myone khal ralhrang in eiin lut thei lo dingin phih an tum ih, AA lam cun Maungtaw ih ralhrang kuthnuai hnatuan pawl cu mipi hrang lamzin phit lo dingin ralrinnak an rak pe cih ve.

Hmainor Ralhrang 15 An Thi – Sagaing ramthen Kani myone Chiantar khua lamih feh ralhrang ralkap pawl cu Kani KLG PDF in lamlak ah an rak do ih, ralhrang 15 an thi tin’ thu an suah.

KLG PDF cun “August 23 zinglam nazi 8 hrawngah Kani in Chiantar khua lamih feh ralhrang ralkap mipum 70 hrawng cu Chiantar khua an thlen hlanah kannih KLG PDF, MPDF Demo pawlin bomb puah in kan rak kap. Nazi 2 sung tluk kan do aw ih, doawknak ah ralhrang 15 an thi. Mit hmutu pawl rel dan vek asile ralhrang thi pawl cu dip sungah an than ih, Chindwin tiva ah an hlon men. Doawknak ah kannih lam cu kan him.

“Sun nazi 2 hrawngah Mungzua fehlam lamzinpi ih umhmun khuar ralrhang mipum 120 hrawng cu kannih KLG PDF le pumpe aw pawl komkhawm cun bomb puah in kan do betih, ralhrang thi an tam ding nan, a zat kan fiah thei lo. Tuitum doawknak ahcun kannih lamin pahnih hriamhma ngah an um ih, pakhat cu a bese deuh a si,” tin thu an suah.

Ralhrang In KNU An Nor – Karen ramkulh myawaddy le Wawlay lamzin tlunah doawknak a sosang peh ih, ralhrang ralkap cun raldonak vanzam tlunah ralthuampi khal an hmang ciamco ih, KNU ralkap Cobra miraltha pakhat cun ram le miphun hrang a nunnak a hlan.

Cobra Column cun “August 23, zinglam nazi 9 hrawngah ralhrang tamtuk cun kan umhmun khuarnak lak tumin in ra nor. Zinglam nazi 10 hrawngah ralhrang ralkap cun raldonak vanzam 5 in bomb in thlak. Zanlam nazi 3 hrawngah ralhrang raldonak vanzam cun bomb in thlak betih nikhat sungah bomb 500 tluk in thlak. Sunvuten kan doawk hnuah zanlam nazi 4 hrawng cun doawknak thawm a reh.

“kan lakin miraltha pakhat cun ram le miphun hrang a nunnak a hlan. Kan miraltha lakin mi 3 hriamhma ngah an um ih, pahnih an bese lo nan, pakhat a besia. Ralhrang lamin thi an um rori nan, a zat kan fiah thei lo a si,” tin Cobra Column cun thu an suah.

A tufang ramsung buainak ah ralhrang ralkap cun raldonak vanzam an hmang nasa ih, mipi lam relhnak khur lai dingah theihter an si. Ralhrang ralkap cun Karen ramkulh, Kachin ramkulh le Sagaing ramthen pawl ih mipi ralkap donak ah vanzam an hmang rero. Tuitum cu a hlan hnakih tamin vanzam an hmang.

Khawlal Le A Rualpi Pawl An Kap That – Yangon ramthen Twantay myone Ziphyu Kung khualal le innza uktu cu August 22 zanlam nazi 5 hrawngah meithal in kah that an si ih, an hmanmi mawtaw mawngtu le tungbing mawng pakhat khal an thih phah.

Mithi pawl cu Ziphyu kung khualal Khin Ngyut , innza uktu Aye Myint, Win Zaw, Than Hty , mawtaw mawngtu le tungbing mawngtu pawl an si. Innza uktu San Lwin khal an kap ngah nan, hriamhma ngah dingin a tlansuak thei.

Twantay ih um pakhat cun “Mawtaw in an thlun ih, a sungah mi 5 hrawng an um ding. Khawlal le innza uktu pawl hi tom mawtaw an kah siat thluh hnuah anmah cu mawtaw in an tlan thluhsal. Khawlal tonak ih to mi 5 an thi ih, tungbing mawng khal a thi ve. A hnuah ralhrang pawl an thlengih kiangkap an cek ciamco. Ralhrang an tam ngaingai a si,” tin a sim.

Twantay PDF cun “Khawlal le innza uktu pawl cu kanmai thianfaimi an si. Ralhrang thawn hna an tuantlang ih meeting an theh an tlunlam ah kan rak kap. Ralhrang hnenah thuhla an simthei ringring ih, anmah ruangah ralhrang pawlin mino tampi an kai zo. Lo theih lo ih kan tuahmi a si,” tin thu an suah ve.

KIA le Ralhrang An Do Aw Peh – Sagaing ramthen Indaw myone ah ralhrang ralkap le KIA pawl August 19 in an do aw zo ih, August 23 tiang an do aw hrih. KIA le PDF tangtlang an si ih, doawknak ah ralhrang thi an tam.

Indaw Revoluiton hotu cun “August 19 in kan do aw zo ih, tuini tiang kan do aw hrih. Netabik kan doawknak thuhla cipciar cu theih a si hrih lo. August 20 ih kan doawknak ah kanmah lamin miraltha 4 cun ram le miphun hrang an nunnak an hlanih, ralhrang ralkap lam 6 an thi ve.

“Zinglam nazi 9 in sun nazi 2 tiang do aw kan si ih, KIA miraltha pakhat, Indaw PDF pakhat le Pumpe aw pahnih , an zaten miraltha 4 cun ram le miphun hrang an nunnak an hlan. Tu khalah ralhrang pawl cu khua sungah umhmun an khuar hrih ih,boruak a felfai thei hrih lo.

“Doawknak ruangah khua mipi pawl cu khua ah um ngam loin hmunhim lam an pan. Doawknak a um tinten ralhrang ralkap pawl cun duhtawk in ralthuampi an kap ih, mipi tuar ding zawngin an cangvai. Cutikah mipi pawl khal an himnak hrang tlansung an si,” tin a sim.

KNU In BGF Sakhan An la – Karen ramkulh Phapon myone Bawcungh htar ih BGF sakhan pakhat cu KNU pawlin August 22 ah an do ih, sakhan an la thei tin August 23 ah thu an suah.

BGF cu Karen ralthuamkai pawlkom pakhat an sinan, ralhrang hnuaiah ramri kil in um an si ih, ram a buai hnuah ralhrang lamtang in KNU pawl do theutu an si ve. Cumi ruangah KNU cun BGF pawl khal anmai phunpi an sinan, ralhrang lamtang an si ruangah an do a ttul thu mipi an rak theiher zo.

BGF sakhan ih doawknak ah BGF 4 an thi ih, hriamhma ngah 2 an um. M16 zunhnih, AK 47 zunkhat, biaknak cet 2, kutden bomb 6, RPG 4 le cerek pawl kan laksak thei tin KNU cun thu an suah.

KNU cun “BGF ralbawi Bo Hlacaing cu August 20 ah an sakhan kiangkap ih um mipi 500 hrawng hmatpungtin an tuahter ciamco ih, mi pakhat ting 3 ciar rak diltu a si,” tin an thusuah ahcun an telh.

KNU cun an hmunram pakhatnak Kyaik Hto myone Letpan Pin khua kiangih doawknak ah ralhrang 13 an thi tin’ thu an suah bet. Letpan pin khua kiang ahcun August 19 lamah rak do aw an si ih, ralhrang 13 an thi tin August 23 lawngah thu an suah.

Russia In Ukraine An Donak Thla 6 A Kim Fel – Russia cun 2022, February 24 in Ukraine ram a rak do thok ih, tuini August 24 ahcun ram pahnih doawknak thla 6 a kim.

Russia cun ramdang pawl Ukraine ih umhmun an khuar ruangah le Ukraine in US le NATO a tuanpi tum ruangah Ukraine kan do. Cucu, kan ram humhimnak hrang kan tuah dingmi hrimhrim a si tin thu an rak suah rero zo. Russia cun Uraine ramsung ih ramdang ralthuam hmunpi le ramdang thilri pawl siat thluh an tum nan, an tum bangin thil an fehpi thei lo ruangah zalennak an rak pe zomi Ukraine nisuahnak lam sawn ah an tthawn in Donbas ramthen sungah nasaten an do aw hrih.

Ukraine lam dungsip an tum lo nam, an ram tuahtha sal dingin le remtha sal dingin ram pakhat lawngin a remtha nawn lo ding ,leitlunpi ih remthat a ttul ding tin’ Ukraine president a tongsuak zo. Ukraine ram sungih doawknak ah Ukraine lamin Russia ralkap pawlih tuar ding zawngin an cangvai thok ve thlangih , Crimea ih Russia ralkap hmun vei 2 an kap zo.

August 24 cu Ukraine in Russia ramin zalennak an rak ngah ni a si ih, Russia in nasaten Ukraine an kap thei tin’ thuhla a suak. Curuangah Ukraine lam khal nasaten ralrinnak an nei ve. US cun Ukraine ih um US milesa pohpoh Ukraine suahsan dingin an rak theihter ve. Ram 2 thla 6 sung an do aw thlang nan, an thuhla a fel thei hrih lo ih, remawknak zianghman an nei thei hrih lo.