Malaysia Ah Chinpa In A Fale A That Ih,Amah khal A That Aw – Malaysia Kepong khua Desa Jaya traffic light kiangih highway ah Chinpa pakhat cun a fale pathum highway in hnuailam zin ah a hlonih amah khal highway zin in hnuailam ah a dawp that tin Malay Palik cun thu an suah.
Mit hmutu Malay pa cun “A fate pakhat a paw ih, a fate dang pahnih cu a kutin a hruai hai. A pawkmi a fate cu a hlon hmaisa bik ih, a kut ih a hruaimi a fale 2 khal highway in zin hnuai ah a hlon. Cumi hnuah amah khal highway in a hnuailam ah a dawp,” tin palik a simthei.
A hmaisabik a hlonmi a fate cu leinemnak hmunah a tla ngah ih, hliamhma naa tuk ngah cingin sizung ah tuamhlawm rero lai. Culo a fa pahnih le innsang pabik cu an nunnak a cem cih.
highway in a fate pathum a hlon hnuah amah khal highway in dawp that Chinpa cu Chin ramkulh Thantlang peng Meisakothla khuami a si. Malay an thlen hnuah a nupi sawn hnatuan in a fale a rak um theu. A nupi hna a tuansung ahcun a fate pawl lam a lenpi theu ih, tuitum cu thu a ruat sual pangih hivek a tuah pang siko ding tin thenkhat cun an sim.
Phun 7 Pate In Ralhrang A Dawt – Pago ramthen Pyi myone Hmawza khua Ah-Htah-kah tlawngih kilhim hnatuantu ralhrang pakhat cu phun 7 tlawngta pate in nam in a dawt ih, a tlan cih nan, ralhrang pawlin a kap ngah ih, an kai ngah.
Khuami pakhat cun “Ziang buainak an nei timi cu kan thei lo. Ralhrang pawlin tlawnginn kiltu an ret ringring ih, tlawnginn kiltu ralhrang pakhat cu tlawngta nauhak phun 7 kai lai cun nam in a dawt. Ralhrang pa cu a rak kham aw ngah ih, a kutah nam ih ahngahnak hriamhma a um.
“Tlawngta pate cu a tlan cih nan, ralhrang pawlin meithal in an kap ih, an kah ngah tikah a tlan thei nawn lo. Ralhrang pawl ih kah ngahmi tlawngta nauhak phun 7 pate cu sizung ah fehpi a si ih, a thih le thih lo kan thei bet nawn lo a si,” tin a sim.
Ralhrang Raldonak Vanzam Mawngtu Ih Inn An Urkang – Pago ramthen Taung Ngu khua ih ralhrang raldonak vanzam mawngtu ralbawi Thi Ha Htoo ih inn cu August 2, zan nazi 11 hrawngah Taung Ngu dothlengnak pawlkom pawlin an urkang sak ih, ralhrang bawi sungte pawl cu inn ah um ngam nawn loin an tlansuak thluh tin Taung Ngu ih dothlengnak pawlkom cun thu an suah.
Taung Ngu dothlengnak hotu cun “Ralhrang raldonak vanzam mawngtu Thi Ha Htoo ih inn cu August 2 zan ah kan nawk. A inn pumih kang dingin kan nawk nan, a kang thok veten an thei man ih, an mit thei. Inn hnuai lamin kan nawk. Innkang cu an mit thei nan, anmah ralhrang sungte pawl cu inn ah an um ngam nawn lo ih, ralhrang sakhan sungah an tlan thluh. Innkang ruangah mithi le hriamhma ngah cu an um lo. Ralhrang in Taung Ngu ih mino pawl an kaih rero ruangah ralbawi ih inn nawkkang kan si,” tin a sim.
Ralhrang in dothlengnak ruangah mipi ralkap donak hrang Russia raldonak vanzam MIG 29 an hmang rero zo ih, Russia raldonak vanzam mawngtu ralbawi 15 an um tin zingzoitu pawl cun an sim.
Ralhrang in Russia vanzam an leimi mawngtu 15 pawl cu ralbawi Ye Kyaw Thu, ralbawi Kyaw Ziya Soe, ralbawi Saw Htet Aung,ralbawi Ye Lin Myat,ralbawi Kyaw Sua Tin lay,ralbawi Thant Zaw Win,ralbawi Aung Hto,ralbawi Sai Twin Aung,ralbawi Ye Min Aung,ralbawi Phyu Oo Khant,ralbawi Wai Lin Phyu,ralbawi Ye Win HLaing,ralbawi Kaung Khant Soe,ralbawi Tin Soe Than le ralbawi Thi Ha Soe pawl an si.
Leave a Reply