Manipur In ZRA An Dawi – Manipur State sungih buainak ruangah Manipur cozah cun Manipur state sungih Zomi Army ZRA pawl umsiannak an rak pekmi cu March 10 ni ah an thiatbal ih ZRA pawl cu Manipur State sungah an um thei nawn lo tin an theihter.
March 9 ahcun Manipur state sungih tlangmi pawl cun tlangmi pawl nautat hmuhsuam kan tong tin lamzawh duhphorhnak an nei. Tlangmi pawl lamzawh duhphohrnak an neih tikah Manipur palik pawl nasaten an buai ih, cumi hnuah Manipur cozah cun ZRA le Kuki Chin Armuy thawn remawknak an neihmi Manipur state sungih um siannak an pekmi an bal thu an sim.
Manipur CM cun “ZRA hi Manipur an silo ih Myanmar lammi an si. Myanmar lammi an si tlunah Manipur ah bing an cing ciamco ih ,buainak phunphun an tuah. Kan state sung buaitertu men an si,” tin a sim.
India cozahpi ih rem tinak in Manipur cozah le ZRA cun 2008 kum ah kap aw nawn lo dingin remawknak an rak tuah ih cumi ihsin ZRA pawl khal Manipur state sung Myanmar ramri ah ramri kil dinhmun in an rak um.
Manipur cozah cun “ZRA le Kuki pawl hi ramri lantu, cozah ram ih um, hramlak ti ih hmunram retmi ah um an si ih,Manipur daan hrampi thawn mil aw lo hrimhrim an si. Curangah ramri lan pawl thianfainak kan nei dingih bing cing pawl khal kan siatsak thluh ding a si,” tin thu an suah ve.
Manipur ih kiki pawl cun Manipur ah kuki hmunram an dil ve ih Manipur cozah thawn biakawknak an nei man rero zo nan, tu ah buainak a suak ih, an dinhmun simtheih a si ve lo.
NUG President In Chinlung Chuak Artist Pawl A Lawm – Myanmar buainak pholang phah in We Are The World timi hlasaktu Chinlung Chuak Artist pawl cu NUG president Duwa lashila in lungawipinak a hlan.
NUG president Duwa Lashila cun “Tui dinhmun ah leitlun huap theih dingih thil pholang hi thil harsa zet a si. Hivek caan ah kum 2 sung kan buaipimi Myanmar ram buainak hi leitlun theihter dingah thupi tuk a si timi kan theifiang tuk. Kannih ralhrang dotu pawl hin ziangkimah leitlun bomnak kan tul tuk.
“Hivek caan ah chin miphun lakin hlasakthiam Chinlung Chuak Artist pawl cun zaihla hmangin Myanmar ram buainak cu leitlun theih ah an ausuahpi thei. Chin tube ih an suahmi Chinlung Chuak Artist pawlih sakmi We Are The World hla cu tu ah zohtu 1.8m a kim zo. A saktu pawl an aw a that tuk tlunah a sak dan an thiam ih Myanmar ram buainak thuhla khal an telh tikah thinlung a tham tuk lawlaw.
“Leitlun Youtuber lar pawl khalin Chinlung Chuak Artist pawl ih sakmi We Are The World cu Reaction an pe rero ih leitlun ih Myanmar ram dinhmun tampi an theih phah. Curuangah leitlun in Myanmar ram buainak an theih phah zet bangin bomnak khal tampi kan ngah phah ding timi zumnak ka nei. Hivek suahtu mino pawl khal dothlengnak ah ro sunglawi pakhat nan sersuak ngah.
“Netabik ahcun Chinlung Chuak Artist pawl ih sakmi We Are The World timi hla cangsuak dingih tawlreltu le a teltu nan zaten nan zuamnak cu dothlengnak tuahtu Myanmar mipi aiawh in lungawithu ka lo sim duh a si,” tin NUG President Duwa Lashila cun thu a suah.
Chinlung Chuak Artist pawlih sakmi We Are World timi hla ruangah leitlun mi tampi cun Myanmar ram buainak an theih phah ih thenkhat tla cu video reaction an tuah laiah tap rero khal an um.
Ralhrang In Khuami 30 An That – Shan ramkulh, Pinlong peng, နမ်းနှိမ်ရွာ khua phungki tlawngih relh khua mipi 30 le phungki 3 pawl cu ralhrang ralkap in rapthlak zetin an that ti’n KNDF cun thu an suah.
KNDF cun “Ralhrang ralkap cun march 11 ni ah Nanning khua phungki tlawngih relh mipi pawl cu a bur in an that. March 11, zanlam nazi 4 hrawngah ralhrang ralkap cun Nanning khua kiangkap cu tlunzuang raldonak in an kap ciamco ih, leihnuai ih um ralhrang pawl cun Nanning khua an luhcilh. Ralhrang ralkap cun Nanning khua an luhcilh hnuah phungki tlawngih relh khua mipi 30 le phungki 3 pawl cu lengah an suakter ih phungki tlawng leng ahcun rapthlak zetin an that.
“Ralhrang in khua mipi 30 le phungki 3 an that laiah hlaral in kannih KNDF le kA pawl cun kan hmu nan, kan mipum le ralthuam a thauawk tuk tikah kan cangvai thei lo. March 12, sun hnu lawngah kannih KNDF le KA pawl cu khua sungah kan lut thei ih, ralhrang ih thahmi pawl ruang kan hmu. Mithi ruang pawl cu kan phurh hnuah cekfelnak kan nei ih an sungte pawlin biaknak daan vekin an vui theinak dingah kan tawlrel sak.
“Kannih KNDF, KA, Shan PDF, Phekung pDF, Moebe PDF le Memoso PDF pawl komkhawm in Ralhrang ralkap pawl cu theitawk kan kap rero phah. Tuitum thilthleng thawn pehparaw in ralhrang pawl phuba la dingah theitawk kan zuam rero a si,” tin thu an suah.
Pinlaung ahhhin zarh 3 tluk mipi ralkap le ralhrang pawl an do aw thlangih ralhrang lam thi an tam tikah ralhrang ralkap cun tlunzuang raldonak an hmang ciamco ih ,phungki tlawngih relh mipi pawl a bur in an that men. Thahmi pawl cu meithal ih kah that an si ti’n ruang buaipitu pawl cun an sim.
Pinluang hi ralhrang hmun thupi zet a si ih, Naypidaw thawn nai aw te, ralhrang in Shan le Kaya an luhcilhnak ah nasaten an hmang. Curuangah mipi ralkap komkhawm in Pinluang i um ralhrang pawl an kap. Pinluang ahhin ralhrang pawl lawng an um lo ih, Paluang pituhsit PNO pawl an um ve. PNO pawl hi ralhrang lamtang an si ih,doawknak ahcun ralhrang siseh PNO lam khal thi an tam ti’n mipi ralkap lam cun an sim.
A tufang Shan le Kaya ramri pawl hi ralhrang in nasaten an kap ih ,doawknak a sosang. Ralhrang pawl cu hmun 12 ah an then aw Shan le Kaya ramkulh Demoso myone, Siataw myone, Pinluang myone pawl an hrut.
Siataw myone ih KA sakhan cu March 12 ah ralhrang pawlih lak tumin an kap nan, mipi ralkap pawl an rak tanrual tikah ralhrang pawl an tuarna sawn ih, ralhrang pawl dung an sipsal hrih. Doawknak ah ralhrang thi an um ih ralthuam laksakmi khal kan nei. Siataw ih KA sakhan an kap rualin ralhrang pawl cun Demoso myone khal ralhrang mipum 300 hrawngin an rak luhcilh ve.
KNDF hotu cun “Demoso myone ahhin ralhrang pawlin in luhcilh caan ni 9 hrawng a si zo. Doawknak a sosan tikah ralhrang pawl cun tlunzuang raldonak duhtawkin an hmang. Ralhrang pawlin siataw le Demoso myone an luhcilh rualin Pinluawng khal an luhcilhl. Pinlung ahhin phungki tlawngih relh mipi le phungki pawl cu ralhrang in lengah an suakter ih an kap that thluh men. A rapthlak tuk lawlaw. Hmun 3 ih doawknak ahcun ralhrang lam khal thi an tam nan, a zat kan fiah thei lo a si,” tin a sim.
Leave a Reply