Mara Army In CDF Mara An Kap

Mara Army In CDF Mara An Kap – Myanmar ram a buai hnuin dinthar salmi Mara Army (Maraland Defense Force ) le Mara CDF an rem aw thei hrih lo ih, October 3, 2022 khalah an kap aw.

An kahawk thu ah CDF mara cun “October 3 ah CDF Mara hmunpi in fawm hruh lo ih tlung rakthuam keng lo CDF Mara pawl cu MDF Mara Army pawlin an rak kap. CDF mara pawl cu ralthuam an ken lo ruangah an himnak hrang an tlan.

2021, March 25 khalah MDF Mara Army pawl cun ralthuam keng lo CDF Mara sungtel CDM palik an rak kap that zo ih, CDF Mara sungtel mi pathum hriamhma an ngah phah. Tu khalah MDF Mara Army pawlin CDF Mara sungtel pawl an rak kap lala ih, kannih khalin a tul dan vekin ka thungrul ding a si,” tin thu an suah.

CDF mara le Mara army thuhla hi a hnok zetih hmunkhat ah um thei lo an si. An rel dan vek asile Myanmar ram a buai hnuah CDF mara tin an dingih, an hotu pawl tawlrelnak in MDF Mara Army tin an thlengawk tlunah CDF mara zaten MDF Mara Army ah lut thluh dingin an rak sawm. Cumi ihsin rem aw lo thok an si ih, Mara Army ih lut duh lo pawl cu tuini CDF Mara ah an um.

CDF Mara hi CJDC ah an tel tin an sim ih, MDF Mara Army sawn hi CJDC ah an tel hrih lo tin an sim bet. Mara mipi lak khalah an tanpi le an dinpimi a bangaw vivo lo ih, anmah Mara karlak ah an buai tuk lawlaw. Tu khalah mah le mah kap aw dingin an hro ih, mara mipi thinhar in an um. A thok ahcun Mara Army tin hmin an rak nei lawk nan, tu ahcun Maraland Defence Force MDF timi hmin an pusawn thlang. CDF Mara le MDF Mara Army buainak cu CJDC lam khalin an rem that sak thei hrih loin a lang.

Ralhrang In Lamzin An Siat Bet – Ralhrang ralkap cun October 4 ah Mungzua le Chuang Oo fehnak lamzin JCB in an rak huatsiat zo ih, October 5 ahcun ralhrang in Mungzua myone Lezin sanpia luhnak khua JCB in an huatsiat bet.

Ralhrang ralkap pawl cu October 5, zinglam nazi 10 hrawngah Lezin Sanpia khua an thlengih, Sun nazi 12:14 hrawngah lamzin an huatsiat theh tikah an kirsal. Lezin khua kiang ahcun Ralhrang ralkap mawtaw pakhat le JCB pakhat an feh ih, lamzin tha rori an huatsiat.

Hivek cu ralhrang in rampi thuneihnak an lak hnuah thilthar an tuah thokmi a si ih,bomb puah an ton tamnak lamzin pawl cu an huat siat vivo tum tin khuami pawl cun an sim. JCB in lamzin tha tuk rori mawtaw feh thei lo dingin an huat siat ih, zohman tuah an siang lo bet.

Ralhrang ralkap cun Lezin khua lamzin an huat siat hnuin Mungzui Cimung khua an luhcilh ih, khua sungin inn 5 an urkang sak zo.

CDM Ralbawi Ralhrang Hnenah A Kirsal – Ralhrang in rampi thuneihnak an lak hnuah ralhrang ralkap le palik lakin CDM tuah tamzet an um ih, cumi lakah ralbawi Myo Min Htun khal a tel ve.

Myo Min Htun hi 2022 March thla sungah CDM tuah in ralhrang hmun a rak suahsan ih, CDM buaipitu pawlin Thailand ram raltlan umnak hmunah an rak kuat. Thailand ram a thlen hnuah Australia ram feh dingin a dil ve nan,a ngah thei lo. Cumi beidong ruangah Myanmar ah a kirsal ih, ralhrang kutah a pe awsal.

Ralhrang hnenih Myo Min Htun a pekawk thu cu anmah ralhrang pawl khalin thu an suah zo ih, Myo Min Htun cun ralhrang pawl hnenah PDF siatnak pawl a rel ciamco ih, CDM tuah pawl khal a takin Australia ram feh taktak an um lo,thuphuan hlir tin a rel.

CDM pawl buaipitu pakhat cun “CDM tuah lakin Australia ram feh dingin diltu tampi an um. An dil ruangah an feh cih hngal lo,Interview an tuah thluh. Anmah Australia lamin CDM tuah lakah kawh duhmi an nei ih, CDM tuah pohpoh an ko lo. Cutikah Interview an tuah dan ih zir in an duhmi cu Australia feh theinak an pe.

“Cutikah CDM zaten Australia ah an feh thluh lo. CDM ka tuah timi hi Australia ram feh duh ruangah a silo, ralhrang uknak kan duh lo ruangah sawn a si. Ralbawi Myo Min Htun cu Australia feh duh ruangah a lem menin CDM rak tuah a si ih, a feh thei lo tikah ralhrang hnenah a kirsal men. Tu ihsin thokin CDM tuah pawl khal fimkhurten kan zoh a tul thlang a si,” tin a sim.

Tuitauh In NLD Milai 11 An That – A tufang Mandalay ah ralhrang lamtang tuitauh pawl an cangvai ciamco sal ih ni 2 sungah NLD milai 11 an that zo.

Mandalay ih tuitauh pawlkom pawl cun October 2 le 3 ah Mandalay ramthen sungin NLD milai 11 an that ih,an lakah nunau pahnih an tel. Tuitauh pawl cun mi an thahmi ruang parah tuitauh timi hminsin an ret vivo.

Tuitauh pawl ih thahmi NLD mailai 11 pawl umnak cu Nathokyi ah 5, Ngio Oo ah 4, Kyauksi ah pakhat le Taungtar ah pakhat tipawl an si. Tuitauh pawl cun an duhmi NLD malai pawl inn an pan ih, mikhual cazin kan cek dingin an hruaisuak hnuah lamlak ah an that vivo men.

Tutiang cu tuitauh pawl Mandalay le Yangon lawngah an cangvai hrih ih, Mandalay ah mi an that tambik. Kan dungah tuitauh pawl mi an that ciamco ih, reizet an reh lawk nan, tu ah tuitauh pawl a suaksal. Annih tuitauh pawl cun NLD milai, NLD party tantu le NLD sungtel pawl lawng an that ve thung.

Pyu Saw Htee Hotu An Kap That – Ayeyarwaddy ramthen Maw Kyuan khua ih Pyu Saw Htee hotu pakhat cu October 5, zanlam nazi 4 hrawngah PDF pawlin an kap that.

Ayeyarwaddy PDF cun “Ralhrang in ralthuam an pe ih, Pyu Saw Htee le Pituhsit hotu a si. A hmin cu Khin Maung Kyi tin an ko. Meithal a neih tikah hro a suang zetih duhduh in mipi a hro. Curuangah kannih PDF pawlin ka ret tha lawlaw a si,” tin thu an suah.

Ralhrang ralkap cun langpang zetin ram sung hmun tinkim ah pituhsit an din rero ih,pituhsit pawl khal ralthuam an pe. Pyu Saw Htee thuhla ahcun anmah ralhrang pawl an pha rero nan, ralhrang lamtang Pyu Saw Htee pawlkom an um roro timi cu mipi mit hmuh a si ve thung.

Philippines In ASEAN Meeting Ah Ralhrang Tel An Duh – 2022 Novemer thla ah ASEAN meeting an neisal dingih, cumi ahcun nasaten Myanmar thuhla rel an tum.

ASEAN meeting an neih ding thuhla ah anmah ASEAN sung lak khalin pomdan le ruahdan a bangaw thei nawnlo ih, Malaysia cun ralhrang ralkap siloin NUG sawn be thlang sehla tin thu an bur. Tu ah Philippines President Marcos cun ASEAN meeting ah ralhrang palai an tel le a tha ding tin a tongsuak ve.

Philippines president Ferdinand Marcos JR cun “Myanmar ram buainak ah lungrualten thu kan rel a tul thlang. Myanmar ram thubuai kan rel asile anmah ralkap lai pawl an tel a tulih, thu kan relpi thei ding. Anmah tel loin an buainak thurel in san a nei lo ih, amah an tel lawngah an thuhla rel thei ding. Curuangah ASEAN meeting ah Myanmar ralkap lam palai tel dingin thu kan bur ve ding a si,” tin Media a simthei.

ASEAN meeting ahcun veikhat Min Aung Hlaing an rak sawm dah zo ih, Myanmar ram buainak ah remnak um dingin thu 5 lungkimtlangnak an rak tuahpi. ASEAN le ralhrang ih remawknak 5 cu tuini tiang ralhrang lamin an tuahsuak thei hrih lo ruangah ASEAN sungtel tamsawn an ning tuk thlangih NUG biak an duhsawn thlang.

Asinan, Philippines cun ASEAN meeting ah anmah ralhrang palai tel ve sehla Myanmar ram buainak thuhla kan rel thei dingih,hmaiton in duhdan kan sim aw thei ding an ti ve. ASEAN sungtel pawl khal Myanmar ram buainak thu ah nasaten an buai ve.