Mara Army Le CDF Mara An Kap Aw

Mara Army Le CDF Mara An Kap Aw – Chin ramkulh Thantlang peng Ngaiphaipi khua kiangah Mara Army le CDF Mara pawl October 9, zanlam kauah an kap aw tin CDF Mara Europe pawlkom cun an sim.

Khuami pakhat cun “Mara Army (MDF ) le CDF mara an kap aw taktak ko. CDF Mara lamah CDF Lautu an tel tin kan thei. Cumi ruangah Mara Army pawl cu an umhmun khuarnak tlawnginn in an suak phah titu an um. Tutiang ih kan theih dan vek asile CDF Mara lam pakhat hriamhma a ngah. Thenkhat cun CDF Mara bawm dingin CDF Lautu pawl an feh an feh hngal nan, a hmun an thlen tikah an rak kap aw nawn lo. Reilote sung lawng kap aw duak an si ih,CDF mara lamin thu an suah bangin Mara army pawl ralrinpeknak hrang an kap si ko ding,” tin a sim.

Mara Army sungtel pakhat Michael cun “Khua humhimnak hrang Ngaiphaipi khuami pawl cu Mara Army hnenah raldo an zir. Raldo an zir theh tikah Mara Army 5 in khua ah an va thlah ih, Mara Army 5 pawl khal khua ah an umhrih. Culaifang ah CDF mara le CDF Lautu cun Mara Army pawl cu an kap ciamco. Curuangah mipi cu hmunhim ah fehter an si,” tin thu a rak suah ve.

Thenkhat cun CDF Lautu an tel lo, CDF lautu an thlen tikah an rak kap aw nawn lo titu an um nan, Mara Army sungtel thenkhat cun CDF Lautu an tel ko tin rak simtu an um ve ih zosawn an dik timi cu pawlkom in thu an suah leh tikah a fiang dingah ruah a si.

CDF Mara cun October 8 ah hitin thu an rak suah hmaisa zo, “Mara hmunram suahsan uh. October 9, nazi 8 caan netabik ah kan ret ih, Mara hmunram ihsin suak dingah thu kan lo pe. Thu kan suahmi nan thlun lo asile ralthuam hmangin kan lo kap ding. Cucu, netabik ralrinnak kan lo pekmi a si,” tin thu an rak suah.

CDF Mara le Mara Army an buai thoknak ih an relmi cu CDF mara an din hnuah Mara Army din a si ih, an zaten Mara Army ah lut thluh dingin an rak ti aw. Cumi ah CDF Mara lakin Mara Army ih lut an rak um. Asinan, CDF mara ih um hnget khal an um vivo ih, cutin an thu a hmun aw nawn lo thok. CDF mara hi Chin dothlengnak ralthuamkai pawlkom CJDC ah an um ih Mara Army sawn cu CJDC ah an um thu theih a si hrih lo. A hnuah Mara Army timi cu Maraland Defence Force tin hmin an thleng. Asinan, mipi fiangnak dingah Mara Army tin hman phah a si.

Dangdang ih an um hnuin 2022, March 25 ah CDF Mara le Mara Army an rak kap aw ih, CDF Mara lamin CDM palik a rak thih thlunah CDF Mara sungtel 3 hriamhma an rak ngah. Cumi hnuin an karlak boruak a se deuhdeuh ih, do aw taktak loin a hro aw rero. 2022, October 3 ahcun CDF mara le Mara Army an kap aw salih, an kahsawknak san an thusuahmi lawngte a bangaw lo.

CDF mara lam cun “CDF Mara sungtel pawl ralthuam keng loin an vak men cu Mara Army pawlin an rak kap ih, ralthuam an neih ve lo tikah an himnak hrang dung an sip. Curuangah kannih CDF Mara cun Mara Army pawl kan thungrul rori ding a si,” tin CDF Mara lam cun thu an suah.

Mara Army sungtel pakhat cun “Riahsiat thlakzet a sinan, kan humhimawk a tul ve. CDF mara sungtel 8 pawl cu bike 4 in an phur aw ih, Mara Army umnak khua ah an feh. Kannih Mara Army cun an rak cek tumih an duh lo. An feh lan tum ruangah tlunlam ah meithal 2 kan kap puak ih, an tlan thluh. Asinan, kan kosal ih CDF Mara sungtel 5 lawng an ra kirsal. Cumi CDF Mara sungtel 5 pawl cu nun kan sim hnuah tisa kan inpi ih thla ka camsak hnuah kan thlahsal.

“Asinan, CDF mara in thu an suah tikah danglampi ah a suak. Pawlkom pakhat le pakhat kan buai tikah a sung thu theifiang loin in mawhthluk ciamco hlah uh. Thudik lamah ttang uh. CDF hminbun pohpoh CDF an si ruangah ttan thluh ding an si cuang lo,” tin a sim.

CDF Mara lamtang pakhat cun “Mara Army cun veikhat hman ralhrang an do hrih lo ih, CDF Mara lawnglawng an tibuai. Curuangah kannih cun theithiam har kan ti. Ziangmi hrang pawlkom ding an si? Ralhrang do tum loin CDF Mara do dingah pawlkom an din sipei maw? CDF mara cun ralhrang an do rero a si,” tin a sim ve.

Khatlam ah ZZLMS timi pawlkom khalin October 7 ah thu an rak suah zo ih, CDF Mara lamtang hlir an si ih,ZZLMS ahcun CDF Zotung, CDF Zophei, CDF Lautu , CDF Senthang le CDF Mara pawl an um. An thusuahmi cu “October 3 ah ralthuam keng lo CDF Mara sungtel pawl cu MDF mara Army pawlin an rak kap ih, kan thinnuam lo ngaingai. Mara Army cun ralhrang do loin 2022, March 25 ah CDF Mara pawl veikhat an rak kap zo ih, 2022 October 3 ah avei hnihnak Mara Army cun CDF Mara pawl an rak kapsal. Neta ah Mara Army in CDF Mara an kapsal asile kannih CDF Zotung, CDF Zophei, CDF Lautu le CDF Senthang pawl khal CDF Mara lamah kan tel thlang ding a si,” tin thu an rak suah zo.

An buainak hi a sosang zetin a langih CNO GS in mah le mah ralthuam hmangin thungrulawk a tha lo tin a sim hai tikah Mara unau lam cun “Rak tong tam hlah, ralthuam in pek ding le in pe, in bawm ding le in bawm aw. Kannih cu kan sup aw thei nawn lo ih, kan kap taktak thleng ding,” tin CNO GS lettu an um. Tuitum khal CDF Mara in ralrin peknak hrang Mara Army an kapmi a si ih, Mara Army in hmunram an luah vivo thotho asile an remawk thei lo cun an kap aw ciamco thei in a lang.

PDF 11 An Thi – Sagaing ramthen Yi Oo le Tase karlak ih doawknak ah ralhrang 6 an thi ih, PDF 3 an thi ve tin SSTF cun thu an suah. PDF dang 4 khal an umnak hmun an thei hrih lo.

Mipi ralkap SSTF cun “Ocotober 7 ah ralhrang pawl thawn do aw kan si ih, ralhrang 6 an thi rori. Ralhrang thi pawl cu anmah ralhrang nungdam lai pawlin an phur. October 8 sun nazi 12 hrawngah ralhrang pawl kan kap betih, tuitum ahcun kanmah lamin miraltha pathum kan can.

“Tuitum ih PDF 3 thi cu Yi Oo PDF pakhat le Tase PDF pahnih an si. Tu khalah Taze PDF lamin mi 4 umnak kan thei hrih lo. Dung kan sip zawngah bomb kan kammi phelh dingin an feh ih,ralhrang pawlin lamzin ah an rak kap that. PDF dang pahnih cu ralhrang pawlih kasuahmi ralthuampi in a ngah. Ram le miphun hrang nunnak hlantu PDF pawl ih ruang cu felfai zetin ka vuiliam thluh zo a si,” tin thu an suah.

Sagaing ramthen Wetlat myone Phaya Lay khua kiangih doawknak khalah ralhrang ralkap cun raldonak vanzam in bomb an thlak cioamco ih, PDF 8 an thi tin khuami pawl cun an sim.

Khuami pakhat cun “Ralhrang pawlin ziangkim an thei cia thluh ih, dalan thusimtu an nei rori in a lang. PDF sakhan bomb an thlak ih mi tamzet an tlan man nan, pDF 8 an thi tin thuhla kan thei. Dalan ruangah a siko. Tutiang ahcun PDF ruang 8 kan hmu zo. Ralhrang pawlin Jet Fighter pahnih in bomb an thlak ih, MI 35 in raldonak vanzam pahnih cun naiten an kap ciamco bet. Cumi hnuah ralhrang Helicopter cun ralhrang mipum an thlah bet. Cutikah ruang kan hmuh hrih lomi PDF thi khal an um thei a si,” tin a sim.

KIA Le PDF In Ralhrang 11 Kap That – Sagaing ramthen Bamaw ih ralhrang palik sakhan cu KIA le PDF tangtlang in an kap ih, palik 11 an thi tin Bamaw PDF cun thu an suah. An doawk caan cu October 4 ah a sinan, ralhrang in Internet an phit ruangah a caan ih thu an suah thei lo thu an tarlang.

Bamaw pDF cun “Ralhrang palik sakhan kan kah tikah reizet kan do aw peh ih, ni 2 hnu ahcun ralhrang pawlin raldonak vanzam an hmang. Curuangah khua sungah mipi an um ngam lo ih an tlan. Palik sakhan kap ih kan doawknak ahcun palik 11 an thi ih, ralhrang pawl cun thupten an vuiliam. Kiangkap mipi theihter an duh lo lawlaw a si,” tin a sim.

Bamaw khuami pakhat cun “Ralhrang pawlin Bamaw hmunram uk thluh an tum nan, an duh vekin zianghman an fehpi thei lo. KIA le PDF an tlang tlang ih, doawknak a sosang tuk. Tu ahcun doawknak a rei tikah khuapi khal a siat thluh thlang. Internet lawng siloin phone khal hman a tha nawn lo a si,” tin a sim.

Dubai Ih Myanmar Nunau 12 An Khum – Mandalay ramthen Natokyi myone in Dubai ih feh Myanmar nunau 12 pawl cu Dubai an thlen veten room pakhat ah khum an si ih, an passport le phone pawl an laksak thluh tin an sim. Myanmar nunau 12 pawl cun Dubai feh dingin Myanmar puaisa hnenah ting 10 le thawng 50 an pek thu an sim.

An lakin pakhat cun “Dubai kan thlen veten room pakhat ah in khum ih, kan phone le Passport pawl in laksak thluh. Dubai ih puaisa khal Myanmar mi a si ih,amah’n room ah in khum. Milian an rat tikah in cei awter ih, Milian cun a duhmi a hruai theu. Milian ih hruai kan duh lo asile room ah khumbet kan si. Room sungih khummi khal thla khat leng um zo khal an um.

“Thupten phone hman theimi kan nei ih, Yangon puaisa kan biak khalle zianghman in ngaisak lo ih, nan ra tlunsal asile ting 45 nan kuan ding in ti. Kan zaten tlun duh hlir kan si,” tin a sim.

Dubai ih puaisa an timi cun “Yangon ih kaungset timi thawn tuantlang kan si. An zaten inn hnatuan dingin ra an si ih, a tluangmi khal tampi an um. Myanmar ah ttuan ding a um lo ruangah ra an si. Inntek duhmi an neih lo cun puaisa in a cawm thluh ve. Inntek an hmuh hlan cu lengsuah a ngah lo hrimhrim ih inn hnatuan hawltu an rat tikah thianghlimten um dingin kan sim menmi a si. Nikhat ah minute 30 phone kan hmangter ko ih, Passport cu inntek ih kol ding hrimhrim a si. Inntek an hmuh khalle inntek in kum 2 sung Passport a kol thotho ding. Tu ah an tlun duh asile anmahten vanzam man le thutiam an tuahzat sumpai an pek thluh a tul ve a si,” tin a sim.