Ralhrang Mawtaw 82 In Chinram An Pan

Ralhrang Mawtaw 82 In Chinram An Pan – Makui ramthen Pukkukko in suak ralhrang mawtaw 25 pawl cun March 10 ah Puak myone an lan zo ih, Chin ramkulh lam an pan. Neta ah ralhrang mawtaw 57 an suak betih Kanmah khua an lan hnuah Chin ramkulh lam an pan thotho ti’n thuhla theitu pawl cun an sim.

Ralhrang mawtaw suak hmaisa le neta komkhawm cun ralhrang mawtaw 82 an si ih an zaten chin ramkulh pan an si ti’n an sim. Ralhrang mawtaw pawl hi Chin ramkulh pan ding an si ti’n thu a suak zo nan, thlanglam Chinram maw, saklam chinram an pan ding timi cu felfai in theih a si hrih lo.

Tu ah ralhrang pawl cun Pauk le Kyauk Htuh an pan ih Mindat lam an feh ding maw? Gangaw lam an feh ding timi theih a si hrih lo. Gangaw lam an pan asile Gangaw in Hakha feh a theih tlunah Gangaw in Kalaymyo , Kalaymyo in saklam chin ramkulh Tedim tin an feh theu. Mindat an pan asile Mindat in Matupi tin ralhrang pawl an feh theu.

Ralhrang in Chin ramkulh sungah ralkap hmunpi pahnih an nei ih, Hakha le Matupi an si. Tuih ralhrang mawtaw pawl hi eiin le thilri phur an si tlangpi nan,lamlak ah in kap ding timi an theih cia tikah mawtaw sungah ralhrang ralkap le Pyu Saw Htee khal an tel ti’n a hmutu pawl cun an sim.

2022 khalah ralhrang mawtaw 80 hrawngin Kyauk Htuh ihsin Chin ramkulh Mindat an rak pan zo ih Mindat in Matupi ralhrang hmunpi tiang an feh. Matupi ralhrang hmunpi ih an thilri an ret fel hnuah an kirsal. Mindat le Matupi lamzin tluan ahcun CDF pawlin theitawkin an rak do ih khatlam khatlam in thi an rak tam.

2022 kum thotho ah Ralhrang mawtaw 30 tlun cun Kalaymyo in saklam Chinram Tedim peng an rak pan ih, Tedim in Falam, Falam in Hakha tin an rak feh. Ralhrang pawl cu Falam peng sung an luh veten CNDF pawlin an rak kap ciamco ih Falam le Hakha karlak khalah ni repi sungah Chin ralkap komkhawm in ralhrang pawl an rak kap. Doawknak ruangah ralhrang pawl cun Lungpi, Rialti, Dokthek, Taal, Thlanrawn le tlangzar khua in mipi inn tampi an rak nawkkang zo.

Ralhrang pawl cu Hakha an thlen tikah an thil phurhmi pawl an retih Hakha, Falam, Tedim tin Kalay lamah an tlungsal. An tlunlam khalah Chin ralkap komkhawm in an rak kap thotho.

Chin ralkap hotu pakhat cun “Ralhrang mawtaw tamtuk le mipum tamtuk a si tikah lamzin tluanin theitawk kan do ih, kan kham rero nan kan kham thei dah lo. Ziangahtile kan ralthuam a thlau aw tukih kan mipum khal an thau aw tuk. Tuitum ah Chin ralkap komkhawm in ralhrang pawl kan do thok zo ih lamzin tluan khalah kan bawh.

“Online ih auko le bulpak ih ca thlah pawl kan sim duhmi cu pengtlang thu ah rak buai hlah uh. Kannih a hmunih ralhrang do pawl hi kan lungrual tukih tuitum khalah ralhrang kan dotlang. Zawngkawng lanah Chin ralkap komkhawm cun ralhrang kan bawh thepthep zo ih, Zawngkawng hmunram sungih ralhrang pawl bomb puah le kaptu khal Chin ralkap komkhawm thotho kan si,” tin a sim.

Tu ih Chin ramkulh Tedim peng sung lut ralhrang pawl cun lamzin tluanih khuami 30 hrawng an kai ih, ralphaw ah an hmang ti’n a hmunih um Chin ralkap pawl cun an sim. Ralhrang pawlin mipi 30 hrawng an kai ih ralphaw ih an hman ruangah Chin ralkap pawlin duh vekin ralhrang pawl an kap thei nawn lo khal a si thei. Cuvek caan khalah mipi lamin Chin ralkap pawl siseh kaihmi chinmi 30 hrawngih dinhmun kan theihthiam sak a tul zet dingin a lang.

March 1 zingah ralhrang mipum 70 hrawngin ke in saklam Chin ramkulh Tedim an rak pan ih March 9 zingah ralhrang mawtaw 30 cun saklam Chin ramkulh Tedim an rak pan bet. Ke ih feh ralhrang pawl cu an hnuih ra ralhrang mawtaw pawl hrang lamzin an sialsak in a lang.

March 10 ih Chin ramkulh pan ralhrang mawtaw 82 pawl cu thlanglam Chinram maw,saklam chinram an pan ding timi a fel hrih lo. Tamsawn cu thlanglam Chinram Mindat lam an pan men ding titu an um. Ziangahtile ,saklam Chinram ahcun ralhrang mawtaw 30 an lut zo. Thuhla theifeltu pawl cun ralhrang mawtaw 82 in March 10 ah chinram panin Pakukko an suahsan tin an sim. Chin ramkulh sungih ralhrang mawtaw tamtuk an luh tinten zamrang tukin an feh dah lo ih caan reipi sung lamzin tlunah an um theu. A san cu Chin ralkap pawlin an rak kham tlunah lamzin ah bomb kammi a um thei timi zoh phah in an feh ih an feh cak thei lo.

N.Korea In Missile An Kap – N.Korea cun US le S.Korea tihrimnak ah ramri ah Missile an rak kap suak ih ralthuam dang khal zohsinnak an nei cih.

S.Korea le US cun March 13 ihsin 23 tiang raldo zirtlangnak an nei ding. N.Korea cun S.Korea le US in raldo zirtlangnak an neih ding cu an duh lo tukih UN tiangah zual an ko. Asinan, N.Korea ruangah US le S.Korea cun raldo zirtlangnak an neih tummi cu an thulh tum cuang lo.

March 10 khalah N.Korea cun anmahten raldo zirnak an nei ih ahmun rori ah N.Korea president Kim Jong Un cun a buk. N.Korea president cun a ralkap pawl cu raldo man cia ih um ringring dingin a theihter hai.

Korea ram pahnih boruak hi dinhmun tha lam hnakin dinhmun sia an pan rero. N.Korea lam an sosangawter zetih Nuclear ralthuam hmang ngam vekin an rel aw zo. Asinan, US le S.Korea cun N.Korea ih hrosuannak an tih ve lo.