Matupi Ah Tlawngkai Pawl An Hrem Thok Ding

Ralhrang ralkap in June 2 in ramsung hmun tamsawn ah tlawng an phuan zo ih, Chin ramkulh sung khalin myone 7 ah tlawng an phuan ve. Matupi khalah ralhrang ralkap in tlawng an rak phuan ve ih,a takin tlawngkai khal an um. Tu ahcun a takih tlawngkai pawl hremnak an pek ding thu Matupi CDF cun thu an suah.

Matupi CDF cun “Ralhrang thuneihnak latu Min Aung HLaing le a kuthnuai pawl cun rampi a fehtluang timi langter tumin ramsung hmun tinkim ah tlawng an phuan. Ralhrang in tlawng an phuanmi cu rampi a fehtluang tin leitlun an hmuhter duh ruangah a si.

“Ralhrang phuanmi tlawngah zohman tlawngkai lo dingin Matupi peng mipi zaten kan theihter zo nan, hrekkhat CDm tuah lo pawl ralhrang hnuaiah hna an tuan ih, nulpe hrekkhat khal an fale pawl ralhrang hnuaiah tlawng an ap.

“CDM tuah lo zirhtu pawl cun anmai hamthatnak lawng zoh in ralhrang hnuaiah hna an tuan ih,cumen duhtawk loin nulepa pawl cu an fale tlawngkaiter dingin an hro. Cutikah nauhak hrekkhat khal tlawng an kai phah timi kan hmu. NUG cozah ih kaihhruainak in Matupi khalah mipi uktu lamin zamrang ten tlawng phuan an tum. Curuangah, nulepa pawl ralhrang hnuaiah nan fale tlawngkaiter loin mipi uktu pawlih phuanmi tlawngah nan fale tlawngkaiter dingin kan lo sawm.

“Ralhrang hnuai ah hnatuan CDM tuah lo zirhtu pawl le ralhrang hnuaiah fale tlawngkaiter nulepa pawl cu kannih CDF Matupi in a takin hremnak kan pe thlang ding a si,” tin thu an suah.

June 5 khalah Matupi ih nauhak pakhat cu inn ah thi cia in an sar. Nauhak 12 hrawng phun 6 kai lai cu a nulepa an khawm sungah amah ten inn ah a rak um ih, a nulepa inn an thlen tikah ihkhun parah thi cia in an hmu.

Matupi ih um pakhat cun “Zinglam ah Sunday School tla a kai. Sunkhawm ah amah lawng a nulepa in an tan ih, an khawmsan. A nulepa an tlun tikah ihkhun ah thi cia in an hmu. Nauhak cu datsi rim ngaina tuk a si ih, ihkhun ahcun datsi palang a rak um. Datsi a hnim rero lole a in khal si thei. Cucu, a thihnak san si thei ih, kan ruahmi a si,” tin a sim.

CDF Thantlang Pakhat A Thi – Chin ramkulh Thantlang khawpi sungih kilhim hnatuantu Salai Van Lawmh cu may 6,zinglam nazi 4 hrawngah ralhrang ralkap pawlin an kap that.

CDF Thantlang cun “Miratha Van Lawmh, ram le miphun hrang thutiamnak na neih bangin tu ahcun ram le miphun hrang na nunnak na pe ih, upatnak kan lo pe. Kannih khal na sungte pawl rualin kan riahse tuk ve. Kannih pawl cu ralhrang uknak a cem hlanah nanmah ruatin ralhrang pawl kan do vivo ding a si,” tin thu an suah.

Thantlang khawpi sung ahcun mipi zohman an um nawn lo ih, ralhrang ralkap le mipi ralkap pawl umhmun an cuh aw rero lai. Thantlang ih ralhrang umnak cu a him tukih dawisuak thluh an har tin mipi cun an sim zo. Asinan, CDF Thantlang le an tuanpi pawl cun Thantlang khawpi sungih ralhrang pawl cu theitawk in an do phah ringring.

Tamu le Mohre Karlak Mohre Lam An Ong – Covid 19 natnak a suah thok ihsin an rak phihmi Tamu le Mohre ramri gate pakhat sawn cu India lamin June 4 in an ong zo.

Tamu le Mohre karlak ah gate pakhat a um ih, Gate pahnihnak sawn cu mipi in pursumleilawnnak ah nasa ten an hmang. Gate pakhatnak sawn cu mipi in an hmang tangkai tuk lemlo. Tu ah India cozah ih onmi cu Gate pakhatnak sawn a si.

Tamu ih um pakhat cun “Tuih India lam onmi cu mipi hman tangkaimi a silo. Culawng siloin India lam lawng an ong ih, Tamu lam cu ralhrang pawlin an ong ve hrih lo. Gate an on hlan ihsin mipi cun fehnak kan nei. Asinan, Gate pahnihnak an on thei ahcun a tha tuk ding.

“Khatlam ah kan phan zetmi cu Myanmar lamin gate an ong asikhalle Pyu Saw Htee le ralhrang pawlin siah tam tuk an dil pang ding timi cu a si. Mipi hrang sumpai hawlnak a si tikah gate pahnihnak an on ding cu kan hngak hlap tuk rori a si,” tin a sim.

KIA in Ralhrang Sakhan An la – Kachin ramkulh Shwegu myone Pankhongyan kiangih ralhrang sakhan pakhat cu KIA in June 5 ah nasa ten an do ih, an lafel thei tin media an simthei.

Khuami pakhat cun “Ralhrang sakhan cu June 4 ihsin ralhrang hrekkhat in an suahsan thok zo. KIA cun June 5 ah ralhrang sakhan do dingin an feh ih, sakhan ahcun ralhrang pawl an rak um nawn lo. Cutikah, KIA cun sakhan an nawkkang fel thluh zo. Sakhan thianfainak an neih tikah sakhan an lafel tinak cu a si.

Ralhrang sakhan ahcun ralhrang mipum 30 hrawng an um. Eiin an phurnak lamzin pawl cu KIA lamin an phihsak tikah sakhan ah eiin ding an nei nawn lo ih, an tlan a si thei. Ralhrang pawl cangvaih dan thuhla a darh tikah KIA in ralhrang sakhan thianfainak an nei fel. Kannih Shwegu myone sungah ralhrang cun an sakhan 3 an suahsan zo.

“Phakhan khalah KIA le ralhrang karlak boruak a tha lo zetih, Shan ramkulh khalah MNDAA le KIA cun tangtlang in ralkap pawl an do. Kachin ahcun Pata Oo lamzin tluanah doawknak a um theibik a si,” tin a sim.

Tlawng Sayamah Gyi An Kap That – Sagaing ramthen Monywa myone, Sithar khua ah tlawng Sayama Gyi Daw Soe Myat Min cu tlawnginn a feh lam,June 5 zingah an kap that. Kum 44 mi Soe Myat Min cu lailak tlawng ah Sayam Gyi ṭuanlai a si.

Hmin tarlang rem tilo mi pakhat cun, “Myothit vengsung lamzin ah an kap that. Non-CDM sayamakyi a si. Ralhrang in tlawng an phuan hnuah khuasung mipi pawl tlawngkai dingin a fial. A hlan ihsin tlawng saya/sayama pawl cu CDM tuah lo dingin ralrinnak an rak pe zo. Cuvek ruangah hivek a tong siko ding” tin a sim.

Ralhrang pawl cun Sayama Gyi Daw Soe Myat Min cu PDF pawl ih kah thatmi a si tin thu an rak suah. Ralhrang ralkap cun June 2 ihsin ramsung hmun tinkim ah tlawng an rak phuan ih, Mungzua khalah tlawngkai an um ve.

Ralbawi Fanu Inn An Nawkkang – Sagaing ramthen Mungzua District Buh Talin myone Chuang Wah Kyi khua cu ralhrang ralkap pawl June 6 ah avei hnihnak an nawkkang betih, ralbawi fanu inn khal an nawkkang.

Chuang Wah Kyi khua cu Sagaing Prime Minister hlun ralbawi Thar Aye khua a si ih a fanu khal Chuang Wah Kyi khua ah a um lai. Ralhrang pawl cun Chuang Wah Kyi khua in inn tamzet an nawkkang zo ih, ralbawi hlun Thar Aye fanu Ngyin Thet Naing ih inn khal an nawkkang.

Khuami pakhat cun “Zanlam ah ralhrang pawl cun kan khua an nawkkang bet. Khuami pawl cu an tlan thluh ih, innkang mittu khal an um lo. Curuangah, inn ziangzat ciah a kang tikhal rel a theih lo. Ralhrang in kan khua sungin inn an nawhkangmi ah ralbawi Thar Aye fanu ih inn khal an nawkkang zo.

“Curuangah, ralbawi Thar Aye ih fanu khal kan hnenah a um ih, a tlansuak ve. A tufang kan khua ahcun doawknak a um lo. Asinan , lamzinpi cu ralhrang lamin ralkap tampi phurhnak ih an hman tikah lamzin tluan ahcun doawknak a um theu a si,” tin a sim.

US Ih Kahawknak Ah Mi 3 An Thi – US ram Philadelphia khawpi ah meithal kahawknak a thlengih mi 3 an thi tin palik pawl cun thu an suah. June 4 ah kahawknak thleng a si ih, mithi 3 an um tlunah mi 11 hriam an ngah.

A tufang US ah mipi lakin duhduh meithal kap ih thi an tam tuk ruangah US cozah le palik pawl cun mipi lakin meithal kahawknak thleng lo dingin theitawk an zuam rero nan, hivek a thlengsal.

Palik cun “mi 1 hnakih tam meithal keng pawl cu mibur lakah an lutih, meithal an hmet puak rero men. Cumi ah,Mipa 2 le nunau 1 an thi. Hriam ngah 11 an um ih, sizung ah phurh cih an si.

Zan sum hnuah palik pawl khawpi kilhim hna an tuan ih khawpi an hel rero laiah meithal puak awn an thei ih an va feh cih.

Palik bawi pakhat cun meithal keng mi pakhat a kap ih a kut ihsin meithal a thlak hnuah a tlansuak. A tlansuaktu hi palik in a kah ngah le ngah lo a theihfiang lo tin a rel. Tutiang , mipi lakah meithal phorh ih mipi kaptu pawl kaih an si hrih lo ih, ziang duhsan in an cangvai timi khal theih a si hrih lo.

A hmunah meithal pahnih palik pawl in an laksak zo ih minung lawngte kaihmi an nei theih hrih lo. A kiangkap dawr ih CCTV zoh in misual pawl an hawl peh rero hrih tin mipi an simthei.

Be the first to comment

Leave a Reply

Your email address will not be published.


*