Midang Ramsung Buainak Ah Kan Tel Lo Titu China

Chin Ramkulh Ah Innsang Cazin An Cek – Ralhrang ralkap cun 2023 rampi hrilawknak an tuah tummi thawn pehparaw in Chin ramkulh sung myone hrekkhat ah innsang cazin ceknak an nei thok rero zo ih, thla 1 sungah cekfel thluh an tum tin mipi lam cun an sim.

Tutiang ahcun ralhrang ralkap in Chin ramkulh sungin Falam, Hakha le Matupi myone pawl ah innsang cazin (Inthawngsuh ) an cek thok zo. Neta ah Chin ramkulh sungin myone dang khal innsang cazin an cek vivo tumih, cumi ruangah Mindat le Kanpetlet ih Chin raltlan pawl khal khua ah tlung dingin an nor.

“Mipum 15 hrawng an si ih, nitin innsang cazin ceknak an nei zo. Lah-wah-kah cazin le innsang cazin a kaih maw timi an cek. Cumi tlunah hmatpungtin khal an zohfel vivo. Chin ramkulh sung myone zaten cek an tumih, thla 1 sungah cekfel thluh an tummi cu a si,” tin a sim.

Hakha Kiangah An Kap Aw – Chin ramkulh Hakha khawpi in Falam lam fehnak le Thantlang lam fehnak ah mipi cun July 26, zanlam nazi 4:30 hrawngah puak awn an thei ih, zanlam nazi 5:40 hrawngah puak awn a rehsal tin an sim.

Hakha khawpi kiangih puak awn ruangah Hakha ih ralhrang hmunpi cun ralthuampi an kapsuak ih, ralhrang mawtaw hrekkhat khal Hakha in an suak ih, puak awn lam an pan cih tin mit hmutu pawl cun an sim.

Hakha ih um pakhat cun “Puak awn cu kan thei rori , meithal puak awn le bomb puak awn a si. Doawknak thuhla cu khatlam khatlam in a than hrih lo ih, puak awn ruangah mithi an um maw timi cu mipi cun kan thei lo a si,” tin a sim.

Chinmi Hrang Delhi Pan A Him lo – Kan ram buainak ruangah Chinmi hrekkhat raltlan dinhmun in Delhi lamih feh an um hnuaihni ih hrekkhat cu beidong ruangah kirsal khal tampi an um. Curuangah, tuanvo neitu pawl cun a tufang Delhi ih Chin raltlan pawl dinhmun mipi theihternak an nei.

Tuanvo neitu pakhat cun “Kan ram a buai hlan ahcun Delhi ih Chin raltlan pawl ramdang kan feh phah rero ko. Ahleice in Australia kawhawknak a cakzet. Asinan, kan ram a buai hnu ahcun India cozah in Delhi ih Chin raltlan pawl cu ramang feh theinak visa an ngah asikhalle India ram suahsan theinak Exit permit in pe duh lo. Cutikah 2020 ihsin 2022 tiang Delhi Chin raltlan lakin zohman ramdang feh an um nawn lo.

“India cozah in ziangruangah Chin raltlan pawl Exit permit a pe duh lo timi a san cu rel dan phunphun a um ih, India cozah le ralhrang an tuantlang ruangah titu an tam. Cun, Myanmar ram a buai hnuih Delhi ih thleng Chinmi pawl khal a takin UN card ngah an um hrih lo. Tuih an pekmi cu Temporary card men a si ih, Refugee in remdang feh theihnak a silo. Ziangtikah thleng thar pawl card taktak an pe ding timi khal thu a um hrih lo.

“Cun, delhi hi hnatuan ding a harzet ih, innsak pawl khal hlawh an ngah that lo tlunah umnak ding hmun a tha lo ih, innsak in suak tampi an um. Company hnatuan hrangah thla 1 innsang man le eiin daih hman an hlawh lo. Cutikah mithleng thar hrang ahcun Delhi ih um cu a har tuk lawlaw. Innsan ding khal a har ih, veng hrekkhat ahcun Chinmi inn luah khal an duh nawn lo.

“Curuangah Delhi pan tum Chinmi pawl hrangih kan cah duhmi cu ramdang cawmtu neih lo ahcun a ol lo. Cumi tlunah kum 1 vek men ih, ramdang feh tum hlah haiseh. Card taktak hman ngah loin ramdang a feh theih lo. Card taktak ziangtikah an pe ding tikhal thu a um hrih lo. An pe lo lanta khal a si thei. Cucu, kannih tuanvo neitu pawlin Delhi pan tum Chinmi pawl kan simthei duhmi a si,” tin a sim.

Yangon Ih Court Bomb An Puah – Yangon ramthen Shwe Pita myone ahmat 6 vengih Shwe pitar myone Court cu July 26, zan nazi 7:50 hrawngah bomb an puak.

A kiangih um pakhat cun “Zopawl in Court ah bomb an denglut timi cu kan thei lo ih, thusuah khal an um lo. Asinan, bomb a puak rori timi cu kanmah kiangkap ih umpawl in kan thei fel. A hnu reilo ah ralhrang pawl ralthuam famkim thawn an thleng cupco ih kiangkap ceknak an nei ciamco.

“Court hmunpi sungih bomb puak ah ziangtluk a siat phah tikhal kannih cun kan zohfel ngam lo ih kan thei lo. Zan sim hnu a si tikah Court ih lutsuak an um lo caan a si ih, minung thi le hriamhma ngah tivek an um lo ding a bang. Asinan, innpi sung thilri siat phah cu a um ko ding,” tin a sim.

July 26 zan thotho ah mipi cun Hlaing Taya veng hmun 2 ah puak awn an rak thei ve ih, neta ah Idol Beer Dawr kiangih bomb puak a si tin an sim. Idol Beer cu ralhrang beer an zuar tel ruangah ralrinnak pek zomi an si.

NUG In Poimawh Meeting An Tuah – Ralhrang in dothlengnak ruangih an kaihmi mi 4 pawl an thlaithat hnuah NUG cozah cun July 26 ah poimawh meeting an nei ih, ziangtin ralhrang pawl caksin in kan do thei ding, ziangtin Min Aung Hlaing hremnak a tuar thei ding timi pawl an rel.

Thlatin meeting an tuah țheumi siloin a tufang ralhrang pawl cangvaih dan ruangah meeting nei an si ih, lailak president Duwa Lasila, Prime Minister Man Win Khaing Than, rampi vuanci le vuanci dang pawl khal an tel thluh.

Meeting ahcun ralhrang in dothlengnak miraltha 4 pawl an thlaithat ruangah dothlengnak ruangih thawngtla dang pawl an him nawn lo ih, ziangtin an suah theinak ding kan tawlrel ding,ziangtin dothlengnak khal hmailam kan pan thei ding tikhal an rel.

NUG cun “Duhtawkin mipi thattu, duhtawk in mipi dekcoktu, Democracy duh ruangah dothlengnak mino pawl kai ih, that mentu ralhrang ralkap hotu Min Aung Hlaing le a kuthnuai pawl ziangtin hremnak an tuar thei ding timi cu kan thurelmi thupibik a si. Leitlun daan vekin hremnak an tuar theinak dingah kannih NUG cun theitawk kan suah vivo ding. Mipi hrang khal thu felfai a suak cih ding a si,” tin mipi an simthei.

Midang Ramsung Buainak Ah Kan Tel Lo Titu China – Ralhrang in dothlengnak tuah ruangih an kaihmi mi 4 an thlaithat hnuah leitlun ramdang tampi cun ralhrang mawthluknak ca an suah rero nan, China cu daiten an rak um menih ralhrang an mawhthluk duh lo. Cutikah, China in ziangkimah ralhrang an bawm siko tin thu a suak.

Cumi thuhla ah China cun “Kannih China cu ramdang ramsung buainak ah kan tel lo ding timi thupi kan neih bangin kan thupi kan fehpi vivo hrih. Myanmar ram buainak ahcun anmah ramsung pawlkom zaten mipi zawnruat in relremnak nei ding an si ih, ram buainak an tifel lohli dingmi cu kan duhsak bikmi a si,” tin a sim.

US cun “Myanmar ram a buai hnu ahcun ralhrang dinpitu China in ziangkimah Myanmar thunun thluh an tum. Cucu, ralhrang an tuanpi dan le an cangvaih dan in a theihtheih tuk. Myanmar mipi hnakin China cun an hlawknak sawn an ruat a si,” an tive.

Ralhrang in rampi thuneihnak an lak hnuah leitlun ramdang tampi cun ralhrang mawhthluknak ca an rak suah cio ih, cuvek lai caan khalah China cun ralhrang an mawhthluk duh lo. Cumen siloin China cun ziangkim ah ralhrang an tuanpi ih ,palai an tlawng aw , thu an reltlang, tuantlang dan ding tiang remawknak an nei.

Myanmar Politics thiam pakhat cun “Kan ram Myanmar buainak ah China le Russia cu bulhram pakhat an si. China le Russia in ralhrang pawl an dinpi sung ahcun ralhrang pawl an puarthau peh ringring hrih ding. China le Russia in ralhrang an dinpi ruangah ralhrang pawl khal leitlun ramdang tih lole ngaihsak lo vekin an um phah. Cucu, leitlun theih khal a si,” tin a sim ve.