Min Aung Hlaing in Chinram A Hmuhdan Rel – Ralhrang ralkap hotu Min AUng Hlaing cun a tufang ram sungah remdaihnak zianghman a um hrih lo ih, Myanmar ram sungih remdaihnak umding cu a hla tuk lai. Chin ramkulh khal ram nuamzet le ram mawizet a sinan, buainak hlir in a khat ve ti’n Chinram a hmuhdan a sim.
Min Aung Hlaing cun “Theitawkin rampi thansohnak hrang kan zuam rero nan ramsung pawlkom dang le ramleng pawlkom dangih hnaihnoknak ruangah remdaihnak kan hla tuk lai. Chin ramkulh khal ram nuam zetih, ramsung thilri suak thawn ram mawituk a sinan, tu ahcun buainak hlir in a khat. Hivek cu rampi hrang khalah a tha lo tuk a si,” ti’n a sim.
Ralhrang in rampi thuneihnak an lak hnuah ralhrang uknak duh lo ruangih lamzawh duhphorhnak nei mipi ummen cu ralhrang in meithal in an kap ih, ralthuam rinsan in thuneihnak fehpi vivo an rak tum.
Ralhrang uknak duh lo ruangah Chin ramkulh Mindat KHawpi sungih lamzawh duhphorhnak nei Chin mipi pawl khal ralhrang in meithal in an kap. Curuangah Mindat mipi cun meithal phorhsuak in 2021, April thla ihsin khawpi sungah ralhrang pawl an kap thok.
2021, Myanmar ram buainak ah Mindat mipi hi ralhrang rak do hmaisabiktu an si ih, cumi hnu ihsin Myanmar rampi huap hmun tinkim ah mipi khal ralthuamkai in theitawk ih ralhrang do rero a si.
Chin ramkulh hmun tinkim khalah doawknak a sosang ih cumi ruangah Chin ramkulh sung myone 9 lakin Myone 8 pawlah ralhrang in Martial law an phuang phah. Hivekin Chin mipi in lungrual zetih dothlengnak kan tuahmi cu ralhrang hotu Min Aung HLaing khalin a helhkam zetin a langih ,Chinram sung buainak cu Myanmar rampi tiang a buaiter thei tin a tongsuak phah.
USDP Party In Russia Palai An Bia – USDP party cun February 20 ah Russia palai pawl an ton thu mipi theihternak an nei ih thu an suah.
USDP party ih thusuah cu hitin a si, “USDP Party hotu U KHin Yi cun February 20 ah Russia palai a tongih thureltlangnak an nei. Tonawknak ahcun ram pahnih rualremnak, ram pahnih pehtlaihawknak le Russia party pawl pehtlaihawk dan ding tivek pawl an rel. Russia palai tongtu lakah Party hotu Khin Yi, Myat Hein, HLa Tun, Myo Zaw Thein, Taung Aye pawl an tel ve a si,” tin thu an suah.
USDP party ih ralhrang bawi hlun Thein Sein ih rak dinmi a si ih, tu ih party hotu Khin Yi khal ralhrang in rampi thuneihnak an lak hnuah vuanci ah an rak hmang nan, USDP party ah an thunlut. Ralhrang in tui kum sungih rampi hrilawknak tuah an tummi ah nasaten USDP party hman tangkai an tum ih, USDP party hmangin thuneihnak lak peh vivo an tum tin’ thu a suahnak a rei zo.
Biden In Thupten Ukraine A Tlawng – US president Biden cun zianghman rel cia loin February 20 ah Ukraine ram sungah a lutih Ukraine president Zelensky thawn an tongaw.
Ram pahnih president cun Ukraine le Russia doawknak ruangih Ukraine ralkap thi pawl phumnak hmun khal an feh ih ram hrangih thi Ukraine raklap pawl upatnak an pe. Ukraine President Zelensky cun Biden parih a lungawi tuk thu a sim ih, Ukrane ram sungah lutin in va vehvaimi hi Ukraine mipi hrang thazang thar a si tin a sim.
US president Biden cun “Putin in Ukraine a do pekah Ukraine ram cu cak lo tuk, lungrual lo tuk, bawmtu nei lo vekin a hmu ih a neh lohli a rak zum. Asinan, Putin a dik lo zia a lang. Kannih US cun theitawkin Ukraine kan thuamtha, theitawkin kan bawm ih, leitlun ramdang khal Ukraine bawm dingin kan sawm. Hmailam khalah Ukraine ralkap lam siseh sum tuahnak lam khalah kannih US le kan tuanpi pawl cun Ukraine kan bawm vivo ding a si,” ti’n a sim ve.
January thla khalah US ramdang palai le US tlangsuak upa pawlin Ukraine an rak tlawng zo ih, Ukraine preisdent Zelenskyi khal 2022, December thla ah US a rak lut ve ih, tlangsuak thurelnak hmunah thusimnak a rak nei ve.
Russia cun 2022, February 24 in Ukraine a rak do thok ih,2023, February 24 ah ram pahnih doawknak kum 1 a kim fel thlang ding. Ram pahnih kum 1 zik an doaw zo ih, UKraine lam cun an tuar tuk nan, Russia kutah pekawk men an tum ih, an ram humhim vivo an tum. Russia khalin Ukraine an domi an bansan hrih lo ih, ram pahnih remawknak a um hrih lo tikah an do aw peh vivo hrih dingin a lang.
Leave a Reply