Chin ramkulh Matupi in Mindat peng sungih lut ralhrang ralkap pawl cu CDF Mindat in lamzin tluanah cawl loin an do peh rero ih, May 9 an doawknak ah ralhrang 10 an thi tin CDF Mindat cun mipi an theihter.
CDF mindat cun “Peng 25 hminsinnak ah zinglam nazi 11 in sun nazi 1 tiang ralhrang kan do ih, ralhrang pawl cu meithal le RPG in kan kap. Doawknak ah ralhrang 10 hrawng an thi. Doawknak laiah ralhrang 20 hrawng fuh tukin bomb kan puah ngah ih, ralhrang thi an tam ding.
“Peng 24 hminsinak khalah ralhrang 30 hrawng cu bomb khur sungah an lut ngah ih, fuh zetin bomb kan puah ngah tikah thi an tam thotho ding tin kan ruat. Theitawk in ralhrang ralkap pawl do rerotu CDF Mindat hrang thla in camsak vivo hram uh tin kan lo dil duh a si,” tin mipi an sawm.
Matupi in suak ralhrnag ralkap pawl cu CDF Mindat in May 4 in an do thokih, May 7 an doawknak khalah ralhrang 7 an thi tin Mindat CDF cun thu an suah zo.
Chinmi An Dot That Aw – Chin ramkulh matupi peng Pha Naing khua ah innsangpa pahnih zuri sabah tongkam an el aw ih, tongkam elawk men ah duhtawk loin an sual aw ih nam an hman tikah pakhat sawn a thi.
Chinmi pahnih cu may 5 ah zuin tlangin tongkam el aw an si ih, an rit hnuah khat le khat tongkam el aw in an sual aw ciamco ih nam an man tikah hriam naa tuk an ngah. Hriam ngah bese sawntu cu Matupi sizung ah tuamhlawm tum a sinan, a remcan lo ruangah Makui lam fehpi a si ih, lamlak ah a thi.
lamlak ih thi cu May 9 tiang khalah inn lam an thlenpi thei hrih lo. Zuri ruangih buai chinmi pahnih cu innsang din veve zo an si ih, thi sawntu cu fate 3 ih pa a si.
PDF 8 An Thi – Sagaing ramthen Myintmu myone Baku khua kiangih PDF sakhan cu May 9 zingah ralhrang ralkap pawlin an luhcilh ih, PDF 8 an thi tin Mipi ralkap cun mipi an theihter.
PDF hotu cun “Ralhrang pawl an ra timi kan theihnak cu ni 4 lai a si zo. Myotmu myone ah PDF a phunphun kan um ih, ralhrang pawl cun Black Eagle sakhan pakhat an luhcilh. May 9, zinglam nazi 6 hrawngah an luhcilh. A hmunih doawknak ah PDF 8 an thi ih, ralhrang cun PDF pawl umnak hmunah an urkang thluh,” tin RFA a simthei.
Black Eagle pawl cu Myintmu myone sungah nasa ten ralhrang ralkap dotu an si ih, ralhrang tampi an that zo. Cutikah, ralhrang pawlin Black Eagle umnak hmun an zingzoi ih , dalan hmangin an umnak hmun an theih hnuah an luhcilh.
Ralhrang thuthang cun “PDF sakhan kan siatsak thei ih, a hmunah PDF 8 kan thianfai. Kuttuah meithal zun 4, kuttuah bomb 5, phone 15 le thilri dangdang kan laksak thei a si,” tin an pholang.
KNU, CNF Le KNPP In Lungrual Ten Thu An Suah – karen ralkap KNU, Chin ralkap CNA le Kaya ralkap KA pawl cun lungrual ren ca an suah ih,ralhrang ralkap in remawknak an duh taktak asile doawknak bansan hai sehla pawlkom zaten sawm thluh haiseh tin an theihter.
Min Aung Hlaing cun tlangpar ralthuamkai pawl hmaiton ih biak a duh thu a rak simthei ih, dothlengnak pawlkom pawl a sawm tel lo. Cucu, CNA , KNU le KA pawlin rem an tilo.
Pawlkom 3 cun “April 22 ah ralhrang hotu Min Aung HLaing cun tlangpar ralthuamkai pawl lakin hotu ciar ton a duh thu MRTV hmangin a relsuak ih,kannih khalin kan rak thei ve. Ram buainak cu hmaiton ih rel dingin le remnak tuah dingin timi cu tlangpar ralthuamkai pawlin kan rak dil reromi khal a si.
“Asinan, a tuvek ramsung buainak ah khat le khat thurel in ramsung buainak tifel kan tum asile ramsung buainak ih teltu zaten sawm thluh ding a si. Cumi tlunah UN le ramleng khalih theihpimi khat le khat thurelnak le remnak a si a tul. Cuvek ih thurelmi le remnak cun Federal Democracy ukan a din cih ding khal a si.
“Ralhrang ralkap in biakawk an ti asile ram sung hmun tinkim ih mipi an do reromi cu cawl hngal ding an si ih, ton tulmi zaten tong dingin le biak dingin lamzin an hawl a tul. Cumi tlunah raltlan pawl khal zalen zetin bomnak pek sian ding an si,” tin thu an suah.
Ralhrang Fapa an kaihmi an Thlahsal – Ralhrang ralkap hotu pakhat ih fapa cu PDF in an kai ngah nan, kum kim lo a si tlunah ralhrang uknak sawn dotu kan si tin ralhrang fapa cu an thlahsal.
Kachin ramkulh Pata Oo ih ralhrang bawi fapa cu Milat PDF in hmunram thianfainak an neih caan ah an kai ngah ih, ni 2 sung thuhla an suh fel hnuah an thlahsal.
Milat PDF cun “Ralhran bawi fapa kan kaihmi cu kum kim lo a si tlunah ralhrang uknak sawn dotu kan si ih, NUG ralkap dan vekin thusuhnak kan neih fel hnuah kan thlahsal. Ni 2 sung kan kaih caan khalah tirawl thaten kan pe. Hivekih kan tuahmi cu hmailam ih mipi do rerotu ralhrang pawlin rak thei hram uh,” tin thu an suah.
Kaya Ah Ralhrang 44 Tlun An Thi – Kaya miphun humhimtu KNDF cun may thla zarh khat sungih ralhrang ralkap thawn an doawknak thuhla felfai cu may 9 zan ah mipi theihternak an nei ih, doawknak ah ralhrang 44 an thi tin an tarlang.
KNDF cun “May thla zarhkhatnak ah ralhrang ralkap mawtaw 30 lenglo cu pruso in Bawla khe myone lamah Bawla khe in Pruso lamah tin thilri an phur rero ih, Pruso le Bawla khe lamzin tlunah nasa ten kan do aw. May 1 in 7 tiang Demoso, Pruso le Bawla khe pawlah vei 13 kan do aw ih, ralhrang mawtaw 30 lenglo kan domi ah ralhrang 44 an thi. Ralhrang mawtaw 8 kan siatsak thei ih, ralhrnag pahnih nungdam in kan kai. Doawknak ahcun meithal zun 15 khal kan laksak thei.
“Doawknak ah kannih KNDF , Kareni Army KA le PDF pawl kan tangtlang ih, May 4 khalah ralhrang mawtaw 3 kan siatsak thei. May 6 ih kan doawknak ah kannih KNDF lamin pakhat ram le miphun hrang a nunnak a hlan.Tu ah ralhrang ralkap pawl cu Demoso myone le a kiangkap ah umhmun an khuar ih doawknak um thei ringring a si,” tin mipi an theihter.
Min Aung Hlaing Tong Ding pawlkom 9 – Ralhrang ralkap hotu Min Aung Hlaing in tlangpar ralthuamkai hotu pawl ton a duh thu a sim tlunah May 9 tiang caan apek thu a reltel ih, tu ahcun Min Aung Hlaing tong dingih hminpe tlangpar ralthuamkai pawlkom pawl an fiang thawkhat thlang.
Min Aung HLaing tong dingin hminpe tlangpar ralthuamkai pawlkom 9 an um ih, pawlkom 9 lakah 6 cu NCA hminkhen ngan tlangpar ralthuamkai le 3 cu NCA hminkhen ngan lo tlangpar ralthuamkai an si. NCA hminkhen timi cu khat le khat kap aw lo dingin lungkimnak ngan an rak si.
Ralhrang hotu Min Aung Hlaing tong dingin hminpe NCA hminkhen ngan tlangpar ralthuamkai pawlkom 6 pawl cu Karen budish army DKBA, KNLA PC, Mon Party MNSP, Shan ralkap RCSS, Rakhine party ALP le palawng ralkap PNLO pawl an si ih, NCA hminkhen ngan lo tlangpar ralthuamkai lakin ralhrang hotu Min Aung Hlaing tong dingih hminpe tlangpar ralthuamkai pawlkom 3 pawl cu Wa army UWSA ,Kokang ralkap tenau sawn NDAA le Shan ralkap SSPP pawl an si.
Khatlam ah KNU, KIA, CNA, KA, ABSDF le KNPP pawl cun ralhrang hotu Min Aung Hlaing an ton lo ding thu mipi an theihter zo. AA, MNDAA le TNLA pawl cun boruak kan thlir hrih ding tin an sim.
Ralhrang hotu Min AUng Hlaing tong dingin hminpe tlangpar ralthuamkai pawlkom 9 pawl cu tlangpar ralthuamkai lakah thazang cak ti ih rel hlawh an si lemlo ih, ralhrang hotu Min Aung Hlaing tong lo dingin thu felfal suahtu KNU le KIA cu tlangpar ralthuamkai lakah thazang cak ti ih felmi an si.
Putin In Nato A Mawhthluk – Russia president Putin cun Ukraine an donak san ah Ukraine sawn siloin NATO pawlkom a mawhthluk ih, kan ram humhimnak hrang Ukraine do lo thei lo dinhmun ah ding kansi tin a sim.
Putin cun “NATO pawlkom in Russia ih kan relmi an ngai poimawh lo. Tum an nei timi cu kan rak hmu thluh ve. Russia ram kulh thluh dingin cangvaih an tumih, kannih Russia sawn cu NATO cangvaih hlanah kan cangvai hmaisa. Tuih doawknak cu kan ram Russia humhimnak hrnag a si. NATO le an ruanpi pawlin Ukraine hnenah ralthuam thatha le phunphun an pe ih, kanmah do dingin an forh rero tikah kan ram hrang khalah a him ve lo ih, do lo theih loin Ukraine do kan si,” tin a sim.
Russia cun 2022 February 24 in Ukraine ram a rak do thokih , tu ah thla 2 le hrek zik tluk Russia cun Ukraine an do thlang. Tuini May 10 zing tiang ram pahnih buainak a fel thei hrih lo ih, remawknak zianghman an nei hrih lo.
Ukraine nisuahnak lamah an do aw peh rero lai. Russia ralkap pawl sawn hi Ukraine ram sungih lut ansi tikah Ukraine mipi in an tuar ih an khawpi khal tamzet a siat phah zo. Hivek dinhmun khalah Ukraine lam pekawk an tum men lo ih, theitawk in Russia ralkap pawl an do rero ve.
Leave a Reply