A tufang Chin ramkulh Mindat peng sungah ralhrang ralkap pawl ral an tho nonsal ih, CDF Mindat pawl thawn an pel aw rero. June 29 ih an doawkak ah ralhrang lam 4 an thi ih, CDF Mindat lamin 3 an an rak thi ve.
July 2 zing ahcun doawknak ciamco a um lo nan, ralhrang pawlin Mindat peng sungah raldonak vanzam an hmangih, khua pahnih an kap. Ralhrang cun Mindat peng sungih khua pahnih in biakinn le tlawnginn cu vanzam in bomb an thlak ih, mipi pahnih an thih phah zo tin CD Mindat thuphuangtu Salai Yaw Mang cun mipi theihternak a nei.
CDF Mindat khalin “July 2 zinglam nazi 11 hrawngah ralhrang ralkap raldonak vanzam pahnih cun Mindat peng sungih mipi umnak khua pahnih ah bomb an thlak. Hivek cu mipi tuar ding zawngih cangvaih hrimhrim a si ih, leitlun ralkap daan pahbal an si. Ralhrang vanzam a zamsuah hlanah tlunlam in an zohfel hmaisa ih, ziangkim an tawlrel hnuah cangvai an si.
“Ralhrang ralkap in bomb an thlakmi cun khua sungih tlawnginn a tlak ih, mipi pahnih an thih phah zo. Hivekin mipi tuar ding zawng le mipi thi dingih cangvai ralhrang pawl cangvaih dan cu kannih CDF Mindat in kan dokalh lawlaw.
“Ralhrang ralkap cun June 29 ,zinglam nazi 10 hrawng khalah Mindat peng Madat khua le Kyarli Hlaing khua cu ralthuampi in an rak kap ciamco zo ih, Madat khua in kum 14 nute cu ralhrang kahmi ralthuampi in a ngah ih, a thi. Kyarli Hlaing khua sungih inn pahnih khal ralhrang kahsuahmi ralthuampi in a ngah ih a siat. Ralhrang pawl cun Paling Tie khua khal an luhcilh ih,mipi thilri tampi an siatsak a si,” tin thu an suah.
Palaw Ah Ralhrang 10 An Thi – Tanintharyi ramthen Palaw myone sungah ralhrang ralkap le mipi ralkap pawl ni 4 peh in an do aw ih, ni 4 peh in doawknak ah ralhrang 10 an thi tin Palaw PDF cun mipi theihternak an nei.
Palaw myone Nantaung, Cekga, Cuangnik le macinkung pawl ah June 27 in JUne 30 tiang ralhrang ralkap le mipi ralkap pawl do aw an si. Doawknak lai ahcun mipi ralkap lamin thuhla an suah thei lo tikah ni 4 sung an doawknak thuhla cu July 1` zan ah mipi theihternak an nei.
Doawknak ah ralhrang ralkap cun ralthuampi an hmangih, an duhduhnak hmun an kap tikah mipi inn 3 a siat ih, inn 13 a kang. Doawknak ah PDF lamin pakhat a thi ve ih, innkang pawl cu ralhrang ralkap ih urkangmi a si tin PDF lam cun an sim.
Ni 4 sung an doawk zo tikah ralhrang ralkap cun Palaw myone ah ralkap an kuat bet rero ih, July 1 khalah lamlak ih ralhrang pawl cu Palaw PDF lamin bomb an rak puah bet. Asinan, July 1 ih, ralhrang mawtaw bomb an puahmi ah ralhrang ziangzat an thi timi cu an fiah thei lo.
Hivek ruangah kiangkap khua mipi pawl cu khua ah um ngam loin an tlan ih, mipi 2000 hranwg raltlan an um zo. Hrekkhat cu boruak a that tikah tlungsal thei cih an sinan, mipi 2000 hrawng cu tlung thei hrih lo an si.
Ralhrang le Shan Ralkap An Do Aw – Shan ramkulh moemik ah ralhrang ralkap le Shan ralkap pakhat sawn SSPP an do aw ih, doawknak a sosang vivo thei tin SSPP lam cun an sim.
SSPP thuphuangtu cun “Ralhrang pawl ramri an lan tikah kan do aw. Tuhrih ahcun doawknak a sosang hrih lo nan, doawknak a sosang vivo thei. Ralhrang pawlin kan sakhan 3 tthawn dingin thu in pe ih, kannih cun kan hmunram a si ruangah kan thawn thei lo tin kan sim zo. Curuangah, doawknak picang a suak thei.
“Tui dinhmun ahcun Myanmar mipi zatein ralhrang an dik lo timi an thei thluh ih, hmun tinkim ah doawknak a um. Hivek a si tikah ralhrang pawl khal an daih aw lo zetih, tuitum ah nasaten in nor asile a hlan vek a si nawn lo ding. A tul a si ahcun an hmunpi tiang kan va kap sawn ding a si,” tin a sim.
Ralhrang ralkap le Shan ralkap SSPP cu July 1 ah doaw an si ih, an doawknak boruak a reh hrih lo ruangah doawknak ah ziangzat an thi ih,ziangzat in hriamhma an ngah tivek an fiah thei hrih lo thu an sim.
Mipi Inn Nawkkangtu Ralhrang An Kap – Makui ramthen Yesakyo myone sungih mipi inn pawl nawkkangtu ralhrang ralkap fehkhawm cu mipi ralkap komkhawm pathum in lamlak ah bomb puah in an rak do ih, ralhrang 5 an thi tin thu an suah.
PDF hotu cun “Ralhrang ralkap mipum 70 hrawng an si ih, hmun 2 an thek aw. Khua sungah an lutih,ziangthu um loin mipi inn an urkang men. Curuangah, kannih mipi ralkap pawlkom 3 komkhawm cun lamzin in kan rak bawh ih, bomb kan puah hnuah kan kap bet ciamco. Doawkak ah ralhrang 5 an thi ih, hriamhma ngah tampi an um a si,” tin a sim.
Mipi ralkap komkhawm pathum pawl cu Yesakyo PDF,Myaing PDF le Salinkyi PDF pawl an si.
June 24 khalah Yesakyo myone Aung Tapi khua kiangah Yesakyo PDF in ralhrang ralkap an rak do zo ih, doawknak ah ralhrang ralkap 4 an thi ih, mipi ralkap lamin miraltha pakhat kan can tin Yesakyo PDF cun mipi theihternak an rak nei zo.
Kokang Ralkap In Ralhrang An That – Shan ramkulh Mong Ko ah ralhang ralkap le Kokang ralkap MNDAA pawl an do aw ih, doawknak hrang ralkap 3 an thi tin MNDAA cun thu an suah.
MNDAA cun “Ralhrang lamin kan sakhan cuhbuai tumin in ra nor ih, nazi 1 sung tluk kan kap aw. June 30 ah doaw kan si ih, hmunram thianfainak kan neih fel tikah ralhrang 3 an thi. June 26 khalah ralhrang ralkap cun Muse myone ih kan sakhan pakhat in rak do. Cumi tum khalah thupten lamzin in kan rak do khelh ih ,ralhrang thi an um rori ding nan, a zat kan fiah thei lo a si,” tin thu an suah.
June 26 le 30 ah do aw an si nan, doawk lai ah thuhla an suah thei lo ih, tuini july 2 lawngah doawknak ih thilthleng pawl mipi theihternak an nei.
Thailand In Ralhrang An Ngaithiam – Ralhrang lamtang Thailand cun an daan kelte vekin ralhrang pawl an ngaidam thu anmah thusuttu Media pawl an simthei.
Karen ramkulh Myawaddy myone Wawlay hmunram sungih sakhan cuh doawknak ah ralhrang ralkap cun raldonak vanzam an hmang rero ih, Thailand lamah an zamsual pang. Ramri lanin Thailand lamih ralhrang raldonak vanzam a zam tikah a hnuai ih khua in Thailand mipi pawl an tlan ciamco man ih, Thailand raldonak vanzam pahnih khal tlunsang ah an zam cih ve.
Hivek ruangah ralhrang lam cun zamrangten Thailand hnenah ngaithiam an dil cih ih, neta ah ramri lanin Thailand lamah kan zam nawn lo ding tin an simthei. Ralhrang pawl ramri lan thuhla ah Thailand Prime Minister Prayut Chan Ocha cu media pawlin thu an sut ih, hitin a let hai.
Prayut Chan Ocha cun “Thilthleng ruangah Myanmar ralkap lamin ngaithiam in dil zo. Ngaithiam in dil ruangah kannih khalin kan ngaidam ve. Thil picang ciamco a silo ih,hahdamten kan ruat men. Kannih ram pahnih tuantlangnak le pehtlaihnak cu a hlan bangin a tha ringring ko a si,” tin a sim.
Myanmar ramri Thailand hi ralhrang in rampi thuneihnak an lak hnuah ralhrang dinpitu le tuanpi rerotu ram pakhat an si. Karen ramkulh ih doawknak ruangah ralhrnag pawl Thailand lamih an tlanluh khalle thaten an rak hmuak ih, Myanmar lamah thaten an kuatsak sal theu. A caan le Thailand ramri ih ei ding nei nawn lo ralhrang sakhan hrang eiin khal an rak kuat dah zo.
Biden In Nauthlak Duh Pawl Zawn A Ruat – US Supreme Court cun rampi huapin nauthlak sianak daan an rem fel zo ih, rampi huap daan um nawn loin State tin anmai tha tidan a si tin thu an suah.
A hlan ahcun US rampi huap in nauthlak rak sian a si ih, nu pakhat humhimnak, nui’ duhhrilnak theihsak, nunau ih nunnak humhimnak a si tin nauthlak duhtu pawl an ttang. Asinan, US court sangbik Supreme Court cun rampi huapin nauhak sian a si nawn lo, State tin thuthu a si tin thu an suah hnu ahcun mipi in mai umnak State ih thusuak an thlun a tul.
Hivekin Supreme Court in thu an suah hnuah US ramsung State 13 pawl cun nauthlak an kham thu mipi an theihter cih ve. Supreme ih thusuak a um veten Biden cun nauthlak duh pawl a rak ttan hngal ih, nan umnak State in nauthlak an kham asikhalle nau nan thlak duh a si ahcun State dangah feh theih a si. Cuvek ah buainak nan tong asile in sim uh theitawk in ka lo buaipi ding tin thu a rak suah cih ve.
Tu ah Biden a umnuam thei lo, nauthlak duh pawl ttan in a tongsuak betih, State tin thuneitu pawl cu nauhak duh ruangah State dangih feh pawl tibuai lo dingin a sim hai.
Biden cun “Nunau pakhat in an duhdan le an harhdamnak thu ruangah State an suahsan ih, State hotu pawlin nan kai asile mipi pawl mangbang ko nan tuah ding timi thei uh. Asinan, hivek lawmmam cun State hruaitu pawl nan cangvai lo ding tiah ruahsannak ka nei. Rak khamtu nan um pang asile nanmah in nan tuar thei ve a si,” tin a sim.
Biden in US president a tuan hnuah US rampi cu nitin an tlasia ih, thilri man a kai tlunah thahawknak a tam tuk. Leitlun pabik ih ruah ringringmi an sinan, Biden san ahcun leitlun ramdang khalin ziangah an siar lo deuhdeuh. Amah Biden khal rampi thansoh hnakin Human Right sawn nasaten a buaipi ruangah soisel rero a si.
Leave a Reply