Chin ramkulh Mindat khawpi ah ralhrang pawl anmah le mah tongkam el aw in , meithal thawn an kap aw ih, ralhrang 3 an thi tin CDF Mindat cun June 30 zingah mipi an theihter.
CDF Mindat cun “June 29, zan nazi 10:30 hrawngah ralhrang pawl tongkam an el aw ciamco ih, meithal phorhsuak in an kap aw. Ralhrang pawl anmah le mah an kahawknak ahcun ralhrang 3 an thi ih, hriamhma ngah tampi an um. Mindat peng ahmat 1 lam khalah kannih CDF Mindat le ralhrang ralkap pawl kan do aw peh rero lai.
“June 29 ih ralhrang thawn kan doawknak ah kannih CDF Mindat lamin miraltha pahnih an hlo ih, June 30 sun nazi 12 ah an pahnih thi ruang kan hmu zo. Ralhrang pawlin an rak kai ih ,rapthlak tukin an rak that. Ram le miphun nunnak hlantu miraltha pahnih cu upatnak kan pe a si.,” tin’ thu an suah.
A tufang Mindat peng sungah ralhrang pawl ral an tho ciamco ih, CDF Mindat le ralhrang pawl cu June 29 in Mindat peng sungah an do aw zo. June 29 ih an doawknak ah CDF Mindat lamin miraltha pakhat cun ram le miphun hrang a nunnak a hlanih, ralhrang 4 an thi ve tin CDF Mindat cun mipi theihternak an rak nei zo.
Tahan Ah Ralhrang An Kap That – Sagaing ramthen Kalaymyo Tahan veng A group ah ralhrang palik sakhanhmu datsi thun lai cu June 30 sun nazi 1:30 hrawngah meithal keng hrekkhat in an kap ih, a hmunah a thi cih.
Ralhrang palik sakhan hmu cu a fawm hruh loin a suak ih, mask a bun nan, amah kaptu pawl cun ralhrang palik a si timi an theifiang tukih, a cawlhnak hmunah an kap that. Ralhrang palik kah that a si hnu sun nazi 2 hrawngah Agape Hospital lamin meithal puak awn a thang cih tin Tahan ih um pawl cun an sim.
Tahan ih um pakhat cun “Tuizan cu puak awn a tam leh nasa ding,ziangahtile ralhrang palik kah that a si tikah a ruang buaipi dingih ra ralhrang pawl hro an suang ciamco ding. Curuangah, mipi kan fimkhur a tul ih, ralhrang palik thihnak kiang lamah vak lo sehla a him ding.
‘Zopawl in ralhrang palik an that timi cu felfai in kan thei hrih lo ih,ralhrang palik cu an hmun rori ah an kap that a si,” tin a sim.
Sakhan Cuh Aw In An Do Aw Peh – Karen ramkulh Myawaddy myone Wawlay myone ih ralhrang sakhan cuhaw ih doawknak cu ni 5 kim tiang a fel thei hrih lo ih, an do aw peh rero lai.
KNU ralkap KNLA le KNDO cun Wawlay ih ralhrang sakhan kan luah zo tin mipi an simthei nan, ralhrang lamin an sakhan luahsal tumin nasaten an do ruangah sakhan lafel ti ih phuan ding cu a cang hrih lo tin an sim.
KNLA le KNDO cun June 26 in Wawlay ih ralhrang ralkap an rak do thok zo ih, June 27 ah ralhrang pawl cun an sakhan an suahsan. Asinan, dung an sip rualin ralhrang dang pawl thawn lamzin an tongaw ih, an sakhan luahsal dingin an kir.
Cutin, ralhrang sakhan kiangkap ah nasaten do aw an si ih, ralhrang lam cun an sakhan laksal duh ah raldonak vanzam tiang an hmang. Tuini JUne 30 zing khalah ralhrang ralkap cun Wawlay ih an sakhan laksal tumin raldonak vanzam an hmang peh ih, doawknak a sosang hrih tin KNU lam cun an sim.
KNDO ralbawi cun “JUne 30 zinglam nazi 7 hrawngah ralhrang lam cun raldonak vanzam thawn in ra kap. Sakhan kiangih hrantang mipi lakin ralhrang pawl cun mipi 5 an kap ngah. An lakah nauhak pakhat cu ralhrang lamin an kah ngah ruangah a thi. Nauhak thi ih nulepa khal ralhrang pawlin an kap ngah ih, hriamhma an nei veve a si,” tin a sim.
Pyu Saw Htee 3 An Thi – Sagaing ramthen Khin Oo myone ih doawknak ah Pyu Saw Htee 3 an thi tin Khin Oo PDF cun thu an suah.
June 29, zinglam nazi 10 hrawngah Khin Oo myone Mindaung khua ih bazar kai ralhrang ralkap le Pyu Saw Htee pawl cu Khin Oo PDF pawlin lamlak ah an rak kap ih, Pyu Saw Htee 3 an thi. Doawknak ah PDF lam an him nan, ralhrang pawl cun duhtawk in kiangkap an kap ciamco ih, kum 3 mi nauhak pakhat an kap that ngah.
Nauhak kum 3 mi cu a nulepa thawn hmuan thianfai dingin feh an si ih, ralhrang pawlin a hngawng ah an kap ngah. Hriamhma ngah ralhrang ralkap le Pyu Saw Htee pawl cun mipi thilri an laksak phah vivo ih, tangka fai ting 5 tlunah suithi le sui zunghruk khal an laksak tin PDf cun an thusuah ahcun an tarlang tel.
ASEAN Palai Le Tlangpar Ralthuam 7 An Tongaw Ding – A tufang Myanmar ram sungih um ASEAN palai Prak Sokhonn cun July 1 ah tlangpar ralthuamkai 7 pawl a tong ding tin a teltu ding pawl cun an sim.
KNLA PC ralbawi Saw Kyaw Ngyut cun “ASEAN palai tong dingin pawlkom ziangzat an sawm timi cu ka thei lo,Asinan tu ahcun pawlkom 7 in ASEAN palai kan tong ding timi cu a fel zo. Kannih NCA hminkhen ngan pawlkom 7 pawl cu kan dung khalah Min Aung Hlaing rak be zotu kan si. Cumi ruangah tuitum ah ASEAN palai thu kan relpi thei ding.
“Tuitum cu pawlkom pakhat tetein a si nawn lo dingih, a bur in ASEAN palai kan kawm ding. Kannih cu NCA hminkhen ngan kan si bangin, ram buainak cu biakawk in relfel ding, biakawknak ah zaten tel thluh ding timi le mipi tuar lo ding zawngin lamzin hawl ding timi cu kan hmuitinmi a si ruangah biakawknak kan fehpi vivo ding.
“Tuitum ah tlangpar ralthuamkai pawl le ASEAN ziangtin kan tuantlang thei ding, ziangtin mipi kan bawm ding ,ziangtin mipi kan humhim ding tivek pawl khal kan rel ding. Kan tumtahbikmi cu Myanmar ram a buai nawn lonak ding a si,” tin a rak sim.
Ralhrang ralkap hotu Min Aung Hlaing in tlangpar ralthuamkai hotu pawl kan tong duh a timi ah pawlkom 10 cun Min Aung Hlaing an rak tongih, pawlkom 10 lakah NCA hminkhen tlangpar ralthuamkai pawlkom 7 an rak tel. Cupawl cu KNLA PC,RCSS, PNLO, ALP, DKBA, NMSP le LDU pawl an si.
Tuitum cu ASEAN palai Myanmar a tlawn vei hnihnak a si ih, tuitum Myanmar ram a tlawnnak ih a tumtahbikmi cu ralhrang thawn remnak 5 an neihmi pitlin dan ding rel ding le Myanmar mipi harsa pawl bom dan ding a si.
Pagan Ah Ralhrang Pawl An Fehkhawm – Ralhrang ralkap in rampi thuneihnak an lak hnuah avei khatnak si dingin ramdang palai 6 pawl cu Pagan ah meeting an nei dingih, cumi pawl kil dingin ralhrang ralkap pawl pagan lam an pan supso.
Pagan ih um pakhat cun “Pagan luh thoknak ihsin ralhrang pawl an khat thluh zo ih, pathian be dingih feh pawl khal an cek. Thusuh ciamco cu an nei lo,Asinan ralthuam an cekbik in a lang. Tuitum ramdang palai pawl tonkhawmnak ah buainak thleng lo dingin kiltu an tam nasa,” tin a sim.
Mekhuang tivapi ih sum tuahnak ding thuhla thawn pehpar aw in, Myanmar, China, laos, Thailand, Cambodia le Vietnam pawl cu meeting nei ding an si ih, ram 5 pawl cu ralhrang thawn tuantlang dan rel ding an si.
Myanmar Hnenum Thattu Ih Dilnak Court In A Hnong – Myanmar hnenum a thah ruangah Court in kum 30 sung thawngtla dingin hremnak an pekmi Singapore innteknu cun Court ah a thawngtlak kum tthumsak dingin a dilnak cu Singapore Court sangsawn in an rak hnonsak ih, kum 30 sung thawngthlak taktak a si thlang ding.
Innteknu cun Myanmar hnenum Paing Ngaih Don cu ka hremthat ko, Asinan khami lai caan ah thinlung buainak ka rak nei ih ,thu felfai ruat thiam loin rak cangvai pang ka si. Curuangah in ngaithiam uhla kum 30 thawngtla dingin hremnak in pekmi cu kum 12 lole 15 ah in tthumsak uh tin Court ah a dil. Innteknu ih dilnak cu Court lamin an zohfel tikah a thawngtlak kum tthumsak rem an tilo ih, hremnak an pek bangin kum 30 sung thawngtla dingin nemhnget sak sawn a rak si.
Myanmar hnenum Piang Ngaih Don cu a lu , a hngawng le taksak dangdang ah hremnak naa tuk um in 2016, July thla ah a umnak inntek tei inn sungah a thi. Inntek tei cun thla 14 sung rori rawl pe lo, hridai kit, vuak, thirsa in em, thuamhnaw nawtnak sa in a taksa nawtsak tivekin an rak hrem ciamco.
Thla 14 sung cuti an hrem tikah Chinnu Piang Ngaih Don cun a tuarsuak nawn lo ih, inntek tei innsung rori ah tlu in a thi. A thok ahcun inntek tei an pha ciamco nan, Court ah thudik a langsuak ih, innteknu cu kum 30 sung thawngtla dingin hremnak an peknak a rei zo. Cumi cu inntek lamin a kum thumsak dingin dilnak an neihsalmi a si ih, Court in inntek tei ih dilnak an hnonsak fel.
Leave a Reply