Chin ramkulh Mindat peng sungih khua pahnih ralhrang lamin raldonak vanzam thawn bomb an thlak hnu ahcun CDF Mindat cun Mindat peng sungih um mipi pawl cu relhnak ding khur lei cia dingin an theihter hai.
CDF Mindat cun “July 2, zinglam nazi 11 hrawngah ralhrang ralkap cun Mindat peng sungin khua 2 pahnih cu raldonak vanzam thawn bomb an thlak ih, mipi umnak inn, tlawnginn le biakinn pawl an bat. Ralhrang in raldonak vanzam thawn bomb an thlakmi ruangah kan miraltha pathum khal ram le miphun hrang an nunnak an hlan.
“Ralhrang thlakmi bomb puak cun inn, biakinn le tlawnginn pawl a tlaksiat. Hivekin ralhrang pawl an cangvaihnak ah dalan simtheihnak a um tin thuhla kan thei ih, dalan siseh ralhrang pawl khal an phutawk hremnak kan pe ding.
“July 2, zanlam nazi 5:15 hrawngah peng 4 ih um ralhrang pawl check gate kan kap ih, ralhrang thi an um rori ding nan, a zat kan fiah thei lo. July 3, zanlam nazi 5:45 hrawng khalah Mindat peng sungah ralhrang ralkap raldonak vanzam a zamsal.
“Ralhrang pawl cu mipi parah rapthlak zetin an cangvai vivo thei ih, cuvek a thlen tikah relh hngal thei dingin relhak khur lai cio dingah mipi kan lo theihter duh a si,” tin a sim.
Yangon Ah An Kap Aw – Yangon ramthen Kamayuat myone hledan ah an kap aw ih, nunau pahni hriam an ngah tin BBC cun a tarlang.
July 4 zingah kap aw an si ih, kiangkap mipi pawl cun meithal puak awn vei 5 hrawng an thei. June 30 ah hledan ih mipi thil zuarnak pawl cu ralhrang ralkap in an rak siatsak ciamco ih, cumi ruangah hivekin kahawknak a suak siko ding tin mipi cun an sim.
Thuhla theitu cun “Meithal puak awn vei 5 hrawng kan thei ih,nunau 2 hriamhma an ngah. Pakhat sawn cu upa deuh lam a si tikah seherh a um. Nauhak sawn khal a hmunah a thi ti’n thu a suak. Kan dungah ralhrang pawl cun Hledan ih mipi thilri zuarnak pawl an rak siatsak ciamco ih, tuvekin kahawknak a suak sipei maw tin kan ruat. Asinan, a san felfai cu mipi lamin kan thei lo a si,” tin a sim.
Yangon ih mipi ralkap pawlkom pakhat cun “Hledan ih nunau pahnih cu ralhrang hnenih thuhla simthei ringringtu an si ruangah rettha lawlaw kan si,” tin thu an suah zo. Nunau hriamhma ngah le thi cu USDP party sungtel an si tlunah ralhrang hnenah mah le mah humhimawknak tiang zir an si tin thuhla theitu pawlin an sim ve.
Shan Ralkap Fawm Thawn Mopuai Hmang Thin Zar Wint Kyaw – Myanmar Model le lemcangthiam Thin Zar Wint cu tufang ah Shan ramkulh thansohnak hrang lemcang in caan a hmangih, cumi laifang ah Shan ralkap pakhat sawn SSPP ralbawi ih fanu pasal neih puai ah caan a va hmang ve.
Thansohnak hrang zuknung cang rero lai an si tikah zuknung an can theh veten thuamhnaw khal thleng loin mopuai hmun cu a pan cih hngal. Zuknung an cannak ahcun Shan ralkap SSPP fawm a hruh ih, mopuai khal Shan ralkap SSPP fawm thawn a hmang cih.
Cumi thuhla ah SSPP cun “Shan ramkulh thlanglam thansohnak ding timi hmangin zuknung tuah dingin Thin Zar Wint Kya kan sawm ih, July 3 in zuknung kan cang thok. Nikhatnak lem kan can theh tikah lemcangnak Shan ralkap SSPP fawm thawn Thinzar Wint Kyaw cu Mopuainak hmun a ra thlengih, mopa le monu khal an lungawi tuk.
“Lemcangthiam Thinzar Wint Kyaw cu thildang politics tel loin thansohnak, fimthiamnak, harhdamnak le lamzin tuah thatnak timi pawl ruangah kannih SSPP in lemcang dingin kan sawmmi a si,” tin thu an suah.
A tufang Shan ralkap SSPP le ralhrang karlak boruak a tha lo zetih, July thla thok khalah an kap aw. Ralhrang cun SSPP ih sakhan 3 tthawn dingin thu an pe ih, SSPP lamin an hmunram a si ruangah an tthawn thei lo thu an sim , doawknak picang suak thei a si tin SSPP lam cun an sim.
Hivek dinhmun ah SSPP dinpi in lem rak cangtu Thinzar Wint Kyaw cu mipi hrekkhat in an seherh zetih ralhrang pawlin an kai men ding titu an tam. Thinzar Wint Kyaw cu ralhrang uknak dokalh in lamzawh duhphorhnak khal rak nei rero zotu a si.
Ralhrang In PDF Sakhan An La – Kan ram buainak ah PDF le mipi ralkap pawlin ralhrang sakhan an la timi cu thutheih nuam le mipi theih duhmi a si ringring nan, ralhrang lam khalin PDF sakhan an rak la ve theu ih, PDF hrang le mipi hrnag theih nuam lo zet a si.
Tanintharyi ramthen Launglung myone khalah ralhrang pawl cun June 30 ah mipum tamzet le ralthuam phunphun thawn PDF sakhan an luhcilh ih, ralthuam le mipum an thlauawk tuk ruangah PDF cun an sakhan an suahsan ih,thilri tampi ralhrang pawlin an laksak tin July 4 ah Launglung PDF cun thu an suah.
Ralhrang pawl cun dalan hnenin Launglung PDF pawl umnak an thei ih, ralthuam picang le mipum tamzet thawn PDF sakhan an pan. PDF lamin an sakhan humhim tumin theitawk ralhrang pawl an rak do nan, ralthuam le mipum an thlauawk tuk ruangah PDF pawl dung an sip ih, hriamhma ngah PDF pakhat cu ralhrang pawlin an kai ngah.
Launglung PDF pawl cun an sakhan sungih an retmi meithal, bomb le ralthuam dangdang khal an la man lo ih, ralhrang pawlin an laksak thluh. Ralhrang pawlin PDF pawlih ralthuam phunphun tlunah fangfai dip 4 le rawl hmeh an lei khawlmi phunphun khal an laksak thluh tin PDF cun thu an suah.
Leave a Reply