Kalay Ah Ralhrang 10 An Thi – Sagaing ramthen Kalay peng thlanglam Kyuanchuang le Tayakung khua karlak ah kalay PDF cun August 8 sun ralhrang ralkap an do ih, ralhrang 10 hnakin mal lo an thi tin Kalay PDF sungtel cun media a simthei.
Kalay PDF sungtel pakhat cun “August 8, sun nazi 12 hrawngah ralhrang pawl cu Tayakung khua le Kyuanchaung khua karlak ah kan rak bawh ih kan kap. Ralhrang pawl cu tikawng ah an dawp hngal ih, an phurhmi bawm pawl khal lamzin ah an tan. Neta ah an cerek a cem si ding bawm an tanmi an lasal ih,an tlan. Cumi laifang ah kannih cun rem zetin kan kap. Ruah a sur ih, kan hrang a remcang deuhdeuh.
‘Ralhrang ralkap mipum 20 hrawng an si ih, nazi 1 sung tluk kan kap aw. Kannih mipi ralkap lam cu thi le hriamhma ngah um loin kan him. Ralhrang pawl cun Tayakung khua in mipi inn 52 An urkang ih, khuami pahnih an that. Ralhrang pawl cun August 2 in Tayakung khua an rak luhcilh zo. Curuangah khua mipi pawl cu hmundang ah an tlan thluh ih,harsa ngaingai an si,” tin a sim.
Mindat Ah Pastor Theihpinak Lawngin Fangfai An Lei Thei – Chin ramkulh Mindat khawpi ahcun ralhrang ralkap in mipi pawl duhduh in fangfai leiter an siang lo ih, Pastor theihpinak nei lawng fangfai an leiter tin Mindat ih um pawl cun an sim.
Mindat ih um pakhat cun “Kan duhtawk fangfai cu kan lei thei ko,Asinan inn ih ret in siang lo. Kan leimi pawl cu biakinn ah in retter ih, suan ding a cem tikah Pastor theihpinak in kan leimi fangfai cu kan va la theifang. Ralhrang ralkap cun August 6 in Mindat khawpi sungah fangfai dip khat thawng 40 in an zuar thok a si,” tin RFA a simthei.
Ralhrang ralkap in rampi thuneihnak an lak hnuah Kalay mipi ralkap dunthlun in Mindat khawpi sungah Mindat CDF cun ralhrang an rak do cih ve ih, doawknak sosang tuk a rak suak. Cumi hnuah ralhrang cun Mindat khawpi an la ih, CDf Mindat sawn khawpi in an rak suak.
Cumi hnuin Mindat CDF pawl cu Mindat Khawpi leng hlirah an um ih, ralhrang ralkap pawl sawn cu Mindat khawpi sungah an um. Curuangah Mindat khawpi sungih ukawk dan ah ralhrang pawl thu an nei ciamco ih, mipi fangfai tiang an suan khop lawng kolter an siang. Mindat ahcun ralhrang ih zuarmi fangfai lei lole duh vekin fangfai a thleng thei lo tin an sim.
Pyu Saw Htee An That Aw – Sagaing ramthen Tamu khua myomah veng Pahe Lilawn ih ruang pahnih an hmuhmi cu felfai zetin zingzoi fel a si tikah khua mipi siloin Pyu Saw Htee pahnih kap that aw an si tin zingzoitu pawl cun an sim.
Tamu ih um pakhat cun “A thok ahcun ralhrang pawlin PDF pahnih an si tin thu an suah ih, mipi thenkhat cun mipi an si tin an sim ve. Curuangah kannih thuhla felfai thei duhtu pawl cun zingzoinak kan nei ih, an hmin le sinak tiang kan thei thluh zo.
‘Ruang pahnih cu August 7 zingah ralhrang pawlin an va phur. August 6 zan ah zuri ih buai Pyu Saw Htee pahnih kap that aw an si. Pyu Saw Htee pahnih cu myomah veng ih um Aung Zaw Lin le Myo Min Htun an si. Myomah veng cu Pyu Saw Htee veng tiah kan ko ih,mipi hrang a him lo tuk a si,” tin a sim.
Shan ralkap RCSS In An Kaihmi 24 An Thlahsal – Shan ralkap pakhat RCSS cun SSPP le TNLA sungtel an kaihmi 24 pawl cu August 6 ah an thlahsal zo tin mipi an theihter.
Shan ramkulh sungih umhmun khuar thluh Shan ralkap RCSS, SSPP le TNLA pawl cu anmah le mah an do aw theu ih, doawknak ah khatlam khatlam kaihmi an nei theu. Tuitum ih RCSS pawl ih thlahmi 24 pawl khal mi 23 cu SSPP ralkap an si ih, pakhat cu TNLA ralkap a si.
RCSS ralbawi pakhat Sairi cun “Kan thlah zalenmi pawl cu ziang remnak hman kan tuahter lo ih, thutiam khal kan neiter lo. An khua ciar ah zalen zetin an tlung thei ih, a tul ahcun kan ralkap pawlin lamzin tluan khalah an bawm lam ding a si,” tin a sim.
RCSS thuphuangtu cun “Kan dung April thla khalah dalan ti ih kan kaihmi Yi Oo khawlal le a fapa telin mi 15 pawl khal kan rak thlah thluh zo. Midang kan kaihmi pawl khal thlah vivo kan tum a si,” tin a sim ve.
Shan ralkap RCSS, SSPP le TNLA pawl cu 2018 kum in 2022 tiang mah le mah doawk hmang an si ih, mah le mah an doawk theu ruangah an umnak kiangkap ih khua mipi tamzet cu khua ah um loin raltlan tampi an um phah ve.
Mungzua PDF 3 An Thi – Sagaing ramthen Mungzua myone Tapipinsuh khua kiangih PDF sakhan pakhat cu August 8, zinglam nazi 6 hrawngah ralhrang ralkap in an luhcilh ih, PDF 3 an that tin Mungzua peng PDF thuthang cun mipi an theihter.
Mungzua sipuazi phunsang tlawngih umhmun khuar ralhrang mipum 40 hrawng cun Kai’taw khua khal an luhcilh ih khuami pakhat an kaih hnuah lamzin hruaitu ralphaw ah an hmang. Cutin, Tapipinsuh khua an pan ih, PDF sakhan luhcilh an si.
PDF thuthang cun “Ralhrang pawl cun PDF sakhan pakhat an luhcilh hnuah sakhan an urkang sak thluh. An kaihmi 3 cu naa zetih an hrem hnuah an that. PDF sakhan kiangkap khal an urkang tel.
“Ralhrang pawl cun PDF sakhan an urkang hlanah PDF sakhan sungin kuttuah meithal le bomb 200 hrawng an la ih, Tapipinsuh khua sungin, fangfai dip , bike 8 le solar pawl an lak hnuah an suak. Nunnak hlantu PDF pawl cu upatnak kan pe a si,” tin an tarlang.
Caw In Ralhrang Pawl A Dawi – Mandalay ramthen Wandwin myone Kala khua ah ralhrang ralkap pawl cun mipi inn urkang hnuah cawcang khal urkang an tumih, culai fang ah cawcang pakhat cun ralhrang pawl khik tumin a dawi ih, ralhrang pawl an sakhan ah an tlung thluh.
Khuami pakhat cun “August 7 ah ralhrang ralkap pawl cun kan khua in inn pakhat le bike 2 an urkang. Inn hmaiih um caw pahnih khal urkang that an tumih caw cun ralhrang pawl a rak khik tum tikah ralhrang pawl cu an tlan ciamco.
“Cutikah ralhrang pawl cu an sakhan ah an kirsal ih , neta ah cawi neitu cu a cawcang ralhrang sakhan ah fehpi dingin an theihter. Cutikah caw neitu khalin a cawcang cu ralhrang sakhan ah a fehpi ih,ziangtin an rak tuah ti cu felfai zetin kan thei lo nan, tangka an kuanter hmel.
“Ziangahtile ,a tufang kan khua kiangkap ah ralhrang ralkap le Pyu Saw Htee pawl sual an suah ciamco ih, lamzin sukso vak pawl tangka an dil tlunah sui thilri tivek an hmuhmi tla cu an lonsak hluhhlo. Curuangah mipi hrang vahsuah a him lo ngaingai a si,” tin a sim.
Israel Le PIJ Kap Aw Lo Dingin An Rem Aw – August 5 in do aw thok Israel le PIJ cu lailak ah Egypit in remnak a tuahpi hai ih, kap aw nawn lo dingin an lungkim thei.
Khat la khat an kahawknak ah mi 44 an thi man ih an lakah nauhak an tel. Hriamhma ngah 360 tlun an um. Remawknak an tuah bangin Israel cun PIJ an kaihmi pawl an thlah ding.
Palestine ram Gaza ramthen sungih Muslim misual hruaitu pakhat cu Israel in August 4 ah an rak kap that ih, cumi ruangah Muslim misual pawlkom PIJ cun August 6 in Israel ram cu Rocket in an kap ciamco.
ISrael cun PIJ pawl ih kahsuakmi rocket cu tlunsang ah an kap tla vivo ih, ISrael sawn in Gaza ramthen sungih PIJ pawl umnak an kah ve tikah PIJ lamin an rak kham thei ve lo. Cutikah inn tampi a siat phah ih, mi tampi an thih phah. Cuvek a thlen hnuah kap aw nawn lo dingin remawknak nei thei an si.
Leave a Reply