Ramleng Mindat pawlkom in Mindat raltlan hrang ting 2000 kyat tlun an kuatmi cu Mizoram, Aizawl ih um Pu Mang Lian in a la thluh ih, a tlanpi tin tuanvo neitu pawl cun social ah media pawl an thanter.
Media ih than a si hnuah Pu Mang Lian a lang cih ih, Mindat raltlan hrang tangka ting 2000 kyat tlun cu amai lak siloin Mindat peng NLD palai le a rualpi 2 ih hmanralmi a si tin a rel aw.
Pu Mang Lian cun “2021, March thla ah Mindat NLD palai Aung Than khal ram buainak ruangah Mizoram a thleng ve. Aizawl a thlen hnuah ramdang in sumpai lut ding a neih thu i sim ih, bomnak i dil. Keikhal ram le miphun duhtawknak ruangah U Aung Than cu inn ah ka umter ih, ziangkim ka buaipi.
“NLD palai U Aung Than in sumfai in ting 10 Rupee a la ih, mawtaw pahnih leinak hrang ting 13 le thawng 80 a la bet. Cumi hnuah U Aung Than, U Ni Lin Aung le Ngai Tam Maung pawl cun sumfai in ting 22 le thawng 50 rupee an la. A tlunih mi 3 cun a hlankhan ih in pektermi ting 50 rupee a um ih, keimai pekkmi ting 12 rupee a um. Curuangah, hmansuahmi zaten ting 236 le thawng 20 ruppe a kim. Sumsuak zaten ah keimai sumpai ting 12 rupee ka pek sungmi a um ih, sumpai daih lo ruangah ka rualpi pahnih hnenin ting 6 le thawng 50 tlun ka cawimi a um.
“U Aung Tan cu Delhi ah a thleng zo tin ka thei ih, ka phone rero nan, pehtaih a theih lo. Kannih cu Aizawl ah kan um hrih ko. Tu ah U Aung Than le a rualpi pahnih ih thuhla cipciar ka rel hrih lomi khal a tam. Cucu ,a duh cun in sut peh thei ding a si,” tin simfiangnak a nei.
Tuanvo neitu pakhat cun ‘Thuhla umdan kan zoh rero tikah Pu Mang Lian khal a him cuang lo dingin a lang. Cun, Mindat raltlan hrang tangka latu khal midang 3 hmin a lang betih, an zatel relfiangawknak nei sehla thuhla a fiang bik ding. Tu ah mi pakhat a relfiang aw zo ih, midang 3 khalin thil umdan an relfiang leh dingah kan ruat. Thuhla a fel tikah a tul vekin kan cangvai ding a si,” tin a sim.
Mizoram Ah Ralthuam Thawn Chinmi 2 An Kai – Mizoram, Saiha ramsung ah chinmi (2) cu meithal le cerek thawn June 1, 2022 ah ramri kil pawl in an kai tin thu an suah. Ṭuanvo neitu pawlin thuhla an theih veten Zawngling khua ah zingzoinak an va tuah ih meithal pahnih le 70 mm bullets 20 thawn a neitu Chinmi pahnih an kai cih.
An kaihmi pahnih cu daan vekih hremnak pe dingin an thilri bungrua thawn Tuipang palik sakhan ah an ap. May 1 ihsin Mara (MTP), Mara Student’s Organislzation , General Headquarters – Siaha pawl tangtlang cun ramri ah thilṭha lo phurtu an um le um lo an check ding thu an tarlang.
India-Myanmar ramri a si mi Siasi, Shapi, Kaki, Khaikhy le hmundang gate pawl ah nazi 24 sung zohdiknak an nei thlang ding.
Pawlkom cun , “Ralhrang in Myanmar ramsung thuneihnak a lak hnuah mipi pawl parah diklo zetin a cangvai, mipi pawlin lamzawhnak, CDM tuahnak tlunah ralthuam kai in an do ve.
“Mara ramsung ah miphun, sakhua thleidang loin Myanmar raltlan pawl cu kan cohlang. Asinan, ramri ah zu, ritheihsii le thildang daan pahbalmi phurluttu an um ṭheu ruangah kan thin a nuam lo zet. Himi ruangah buainak kan tong zo ih mipi pawl hnaihnoknak a suak.
“Curuangah daankalh thilri phurtu pawl cu kan lo kai asile daan vekin hremnak pek nan si ding. Meithal le cerek nei tla cu vei 3 kan kaihnak a si zo. India cozah in a duh lomi thilri bungrua phurluttu cu kannih khalin kan cohlang lo a si” tin an tarlang.
Yangon Ih Bomb Puak Ah Chin Mino Hriam A Ngah – Yangon khawpi laifang Bus cawlhhmun ah, May 31 ah bomb a puak ih Chinmi pakhat Cin Sian Suum (kum 23) khal bomb puak kiangah a rak um ve ih a pum ah hriam a tuar.
Chin mino cu bomb puak ruangah a thin le a cuap ah hriamhma a ngah ih Yangon senpi sizung ah a thin operation an tuah hnu a cuap khal operation tuah dingin an hngak rero lai.
Cin Sian Suum hi Kalaymyo ih um a si ih June thla ahkhan Singapore feh dingin Yangon ah a rak suk ih, Yangon in Singapore feh theinak hngak rero laitu pakhat a si.
Yangon mipi tamnak hmunih bomb puak ah mi 9 in hriamhma an ngah ih mi pakhat a thi. Bomb puahtu cu SAC ralhrang lole Pyu Saw Htee an si ding tin mipi lam cun an rel nan, ralhrang thuphuangtu Zaw Min Tun cun NLD ih kutneh, NUG palai pakhat ih forhnak ruangah thleng a si tin a rel ve.
NUG lam cun mipi tuar ding zawngih cangvai cu mipi ralkap lam an si theilo,mipi ralkap mawhsiat duh ah ralhrang ralkap pawl cangvaihnak a si tin Yangon ih bomb puak thu ah ralhrang an puh ve.
Yangon khawpi laifang, Anawrahta lamzin ih motor cawlhnak hmunah May 31 ,zanlam nazi 3 hrawngah bomb a puak ih mipi hriamhma ngah an tam tlunah mi pakhat a rak thi.
A kiangih um pakhat cun “Khawpi sungah a puak ring tuk lawlaw. Anawrahta lamzin bus cawlhnak ah a puak. Bus hngaktu mi 10 bomb in a ngah ih, an lakin pakhat a thi zo.
“bus cawlhhmun ah mipi siatsuah dingin bomb an kam hrimmi a si. Hivek cu PDF le dothlengnak ih cangvaitu mino tete an silo dingih, ralhrang in mipi ralkap an puhnak ah an tuahhrimmi si ding. Ralhrang , Pyu Saw Htee lole tuitauh pawl ih tuahmi a si hrimhrim ding.
“Ziangahtile, Mipi siatsuah duhnak thinlung neitu cu ralhrang le an kuthnuai tuanpi Pyu Saw Htee, tuitauh tivek siar lo cu zohman an um lo. Mipi zawn ruattu PDF pawl cu an si hrimhrim lo ding,” tin a sim ve.
Leave a Reply