Chin ramkulh Matupi in Mindat lamih feh ralhrang ralkap mawtaw 70 tlun cu lamzin tluanah Mindat CDF in theitawk in an do peh rero ih, may 12 an doawknak ah ralhrang 10 an thi tin Mindat CDF cun may 13 zingah mipi theihternak an nei.
Mindat CDF cun “Matupi in Mindat lamih feh ralhrang ralkap mawtaw pawl cu kannih CDF Mindat in lamzin tluanah theitawk in kan do peh ih, May 12 khalah paditar bomb 2 in ralhrang pawl kan rak puah. Bomb puak ahcun ralhrang 10 hnakin mal lo an thi ih, hriam ngah tampi an um a si,” tin ca an suah.
Ralhrang pawl cu Matupi le Mindat karlak ah zarh 2 tlun caan an hmang thlangih an duh vekin hmailam an pan thei lo. Hivekin lamzinpi ih an buai laiah Mindat Khawpi sungih um ralhrang pawl cun Mindat ah nauhak pawl tlawngkaiter an tum ih, tlawnginn thianfainak an nei rero tin mipi cun an sim.
Ralhrang pawl cu Chin ramkulh hmun 2 ah mawtaw tamzet thawn an vak rero ih, lamzin tluanih mipi inn pawl an nawkkang vivo phah. Hakha in Ralhrang mawtaw 20 tlun cun Kalay an pan bangin Matupi in ralhrang mawtaw 70 tlunin Mindat an pan ih, Makui ramthen sungah lut ding an si.
Leave a Reply