A tufang thlanglam laitlang ah CDF pawlin nasaten ralhrang ralkap an do ih,Mindat ahcun khawpi sungah ralhrang an do.
Mindat khawpi sungih doawknak ahcun ralhrang 5 an thi ih, ralhrang 8 tlunin hriam a ngah tin Mindat CDf cun mipi an theihter.
Mindat CDF cun “June 14, tuizing zinglam nazi 7 hrawngah Mindat khawpi luhnak ih um ralhrang pawl cu kannih CDF Mindat in kan va kap ih, ralhrang ralkap thi an tam tlunah hriam ngah khal an tam.
“Ralhrang gate kan kah ruangah ralhrang pawl bawm dingin kan lamih feh ralhrang pawl cu Mindat Lah-wah-kah zung kiangah kan rak kap ih, ralhrang 3 an thih tlunah ralhrang 5 tlun hriam a ngah.
‘Zinglam nazi 9:30 hrawngah ralhrang ralkap thawn kan do aw peh ih, ralhrang 2 an thih tlunah ralhrang 3 hnakin mallo hriam ngah an um. Ralhrang ralkap pawl thi an tam tikah Kyauk Htuh ih ralhrang hmunpi le Mindat ih ralhrang hmunpi cun ralthuampi thawn in kap ciamco. Ralhrang pawl ih kahsuakmi ralthuampi cu lo lakah a tla ih, mipi thlai cinmi pawl an siat phah tuk a si,” tin mipi an theihter.
A tufang Chin ramkulh Kanpetlet peng sung khalah ralhrang ralkap le mipi ralkap CDF pawl nasa ten an do aw ih ,doawknak kiangih khua mipi pawl cu khua ah um ngam loin an tlan rero. Matupi khalah CDF matupi pawlin Paletwa lamzin tluanih um ralhrang pawl an rak kap phah ve ih, thlaglam laitlang in Mindat, Kanpetlet le Matupi pawl ah doawknak a sosang.
AA In Chinram Hrang Datsi Phurhmi An Long – Chin ramkulh Paletwa peng sung Tanphia Taung kiangah Paletwa hrang datsi phur lawng cu Rakhine ralkap AA pawlin an rak kai ih, a datsi phurhmi le lawng khal an laksak tin Paletwa mipi cun an sim.
Khuami pakhat cun “Tanphua Tuang khua cu Rakhine ramkulh Kyaukttaw in Chin ramkulh Paletwa khua karlak ah a um. Datsi phur lawng cu Kyawkttaw khua in Paletwa lam feh a si ih, June 11 ah AA pawlin an rak kai. Datsi neitu khal Rakhine miphun a si.
“A tufang Paletwa ah datsi liter khat thawng 5 a man. Hitluk in datsi man a tam nan, lei ding khal haidaih ka nei lo a si,” tin a sim.
Rakhine ralkap AA cun tuini June 14 ah media komnak an nei ih, cumi ahcun AA thuphuangtu Khai Thu Khah cun kan hnenah ralkap tlan tampi an um zo tin media pawl a simthei.
AA thuphuangtu Khai Thu Khah cun “Kan hnenih raltlan ralkap pawl cu minungpi duhtawk zangfah lainak thawn thaten kan rak zoh ih, umnak ding kan tawlrel sak tlunah ei ding khal kan pe. Kan hnenah ralkap ziangzat ciah an tlan timi cazik cekci cu rel a thiang hrih lo. Kan hnenih um ralkap cu an tam tuk zo.
“Hivek ruangah tlunlam pawl cu kanmah hnaihnok dingin Rakhine ramkulh sungah umhmun an khuar vivo. Rakhine tipi khalah tisung lut lawng hmuh ding a um phah ringring thlangih, ralkap lam raltho dingin timtuahnak an nei.
“Cun, kanmah khalin Rakhine ramkulh sungah ralkap kaihmi kan nei ve. Kan kaihzat cu kan phuang cuang lo ding. Ziagruangah ralkap kan kai ti asile ralkap pawlin AA sungtel pawl an kaih ve ruangah a si. Kan ralkap pawl an thlah lawngah kannih khalin kan kaihmi ralhrang pawl kan thlah ve fang ding. Ralhrag kan kaihmi pawl cu thaten kan kilkhawi.
‘Ralhrang pawl cun Rakhine mipi hahdam ten kan um ding an duh lo , buainak rori an hawl. Rakhine ramkulh sungah uknak kan fehpi tummi cu an duh lo ih, a phunphun’n in hnaihnok rero. Asinan, kannih cun mipi zawn kan ruah tuk ruangah ralhrang ih ngiarnak cu kan zoh khiokhi hrih. Asinan, ralhrang pawl an luarkai deuhdeuh asile kutsih in kan zoh men lo ding a si,” tin a sim.
Ralhrang In PDF Pawl An Hro – Ralhrang ralkap cun PDF pawl an hnenih pe aw dingin an leem hnuah pe aw lo PDF pawl cu kan zuah lo ding tin an hro cih.
Ralhrang in PDF pawl an hnenah pe aw dingin thu an rak suah hmaisa ih, PDF tamzet cun ralhrang ih thusuahmi an let cih. Cumi ahcun ralhrang hnenih pekawk an tum lo thu an rel cio. Hivekin PDF lamin ralhrang sawmnak an let hnuah ralhrang cun PDf pawl an hro cih ih, mipi khal an hnenah PDF pawl umnak simthei dingin thu an suah.
Ralhrang ralkap cun “NUG le CRPH ih dinmi PDF pawl cu mipi hrang an tha lo, mipi hrang tihnung an si. Tlawngkai an duh lo ih, tlawng phuan a si hnu cun tlawnginn siatsuah rori an tum. Curuangah, pe aw duh lo PDF pawl cu zuah ringring men ding an silo ih, an umnak theitu mipi cun kan hnenah in simthei tengteng dingin kan lo theihter duh.
“Kan hnenih PDF pawl umnak simtheitu laksawng tha tuk pek nan si ding. Dankalh pawlkom cu mipi lungrual in kan do a tul. Ziangahtile, mipi hrang thatnak zianghman an nei lo a si,” tin ralhrang cun thu an suah.
CRPH le NUG cun ‘Tlawnginn siatsuah kan duh lo ih, mipi tuar ding zawngih cangvaih khal kan duh lo. Kan kuthnuai ih PDF pawl cu mipi tuar ding zawngih cangvai lo dingin kan theihter tlunah tlawnginn siatsuah khal kan kham. Curuangah,tlawnginn siatsuahtu pawl cu kan kuthnuai ih um an silo,” tin mipi an simthei ve.
Leave a Reply