Makui ramthen in Chin ramkulh thlanglam Mindat le Matupi lamih ralhrang mawtaw 100 hrawng an feh ruangah CDF Mindat cun Mindat le Matupi karlak lamzin an khar thu mipi theihternak an nei.
Mindat CDF cun “July 19 ihsin Mindat le Matupi karlak lamzin khar a si ih, zokhal feh lo dingin theihter nan si. Thu kan suahmi thlun lo nan um asile a tul dan vekin kannih CDF mindat cun hremnak kan lo pe dingih, cuvek caan ah zianghman kan lo buaipi lo ding a si,” tin thu an suah.
Makui ramthen pakukko in Mindat lamih feh ralhrang pawl cu Mindat ramri Kyauk Htuh lam an thleng zo ih, Mindat in Matupi lam feh vivo ding an bang tin CDF Mindat lam cun an sim.
CDF Mindat thuphuangtu Salai Ha-Awm cun “Mindat le Matupi karlak ah doawknak a um dingih, doawk tikah mipi tuar ding kan duh lo. Doawknak a umlai ah mipi pawl lamzinpi an zawh asile an tuar thei. Cumi ruangah mipi tuar lo dingin Mindat le Matupi karlak lamzin zawh hrih lo dingin kan theihternak san a si,” tin a sim.
Yangon Ah Gas An Harsa – Ralhrang ralkap in dollar man an danglamter ciamco ruangah Yangon ih Gas Company pawl cun duh vekin Gas an lalut thei nawn lo ih, Yangon ah Gas a har.
LPG Gas Company neitu cun “Tuih dinhmun ahcun Thailand ram Broda line ih Gas lut khal an phit. Lawng ih Gas phurh khal a remcanlonak a um. Khatlam ahcun dollar man danglam ciamco ruangah duh vekin Gas la thei lo khal kan si. Kan lak thei lo cun zuar ding khal kan nei lo ih, curuangah mipi lam khalin lei ding an harsat phah a si,” tin a sim.
Tufang ah Gas cuai 1 , thawng 8 in an zuar ih, a hlanah Gas dur 500 ih an rak zuar theumi cu , tu ah 1200 tiang a thleng tin Yangon ih um pawl cun an sim.
Ralhrang Mawtaw Bomb An Puah – Mandalay ramthen Nuathukyi le Tuangtar lamzinpi ah ralhrang ralkap mawtaw 2 bomb puah a si ih, ralhrang 5 an thi tin Nuathukyi PDF cun thu an suah.
Nuathukyi PDF thuphuangtu cun “Ralhrang mawtaw pahnih bomb kan puah hnuah meithal in kan kap bet. Zan nazi 11 hrawng ahcun ralhrang mawtaw dangin mithi ruang pawl an ra phur. Ralhrang mawtaw bomb kan puahmi ahcun ralhrang 5 an thi timi cu felfai zetin kan fiah thei. Ralhrang thizat kan fiah sung a rei deuh ruangah duh vekin thu kan suah theilonak a si,” tin a sim.
Mandalay ramthen ahcun Nuathukyi myone ah doawknak a sosang bikih, PDF lam cun ralhrang mawtaw bomb an puah tlunah ralhrang umhmun khuarnak khal an kap theu.
Pyu Saw Htee Pawlin Mipi An Thawi – Sagaing ramthen Wetlet myone ah ralhrang ralkap kuthnuai pyu saw htee pawl cun khuami pawl cu rothil hawl nawn lo dingin ralrinnak an pe ih, an vuak ciamco.
Wetlet myone ih ralhrang inn urkangmi mipi pawl cun inn saksal dingin an khua kiangkap ih rothil, hlanlai thilri hlun pawl hawlin lei a lai ih, rothil hmu taktak khal an um. Cucu, ralhrang lamtang Pyu Saw Htee pawlin an theih tikah mipi pawl cu rothil lai nawn lo dingin an theihter ih, an vuak.
Pyu Saw Htee pawl cun rothil lai khuami pawl cu khawitawk ah nan um, ziang khua na si tivek an sut ih, mipi pawl cun ralhrang ih inn urkang sak ding phangah an sim ngam tuk lo. Cutikah Pyu Saw Htee pawl cun mipi pakhat hnu pakhat an vua ih, phone keng pohpoh an phone khal an laksak thluh.
Pyu Saw Htee pawl cun feh tha thei lo siseh kum upa pitar khal an ren lo ih, mi pakhat ah vei 3 ciar an vua. Hrekkhat pitar cu Pyu Saw Htee pawl ih vuaknak ruangah feh tha thei nawn lo khal an um.
Ralhrang In PDF Sakhan An la – Sagaing ramthen Buh Talin myone ih PDF sakhan pakhat cu July 17, zinglam nazi 7 hrawngah ralhrang ralkap mipum tamtuk in an luhcilh ih,PDF sakhan an urkang thluh tin july 19 ah PDF lam cun mipi theihternak an nei.
Aung San Generation hotu cun “Ralhrang pawl cu hramlak in kan sakhan lamah an ra. Ralhrang tlan an um ruangah an hawl ih, ralhrang mipum 50 hrawng an si. Zinglam thawhhlam kan ei laifang caan a si ih, puak awn kan theih tikah ralhrang pawl in naih tuk zo. Ralhrang pawl cun hlaral in ralthuampi thawn in kap ciamco phah.
“Mipum le ralthuam kan thlauawk tuk ruangah kannih pawl cu sakhan ah umpeh loin kan tlan thluh. Sakhan ih um kan zaten kan tlansuak thluh thei nan, thuamhnaw zianghman lak ngahmi kan nei lo ih, kan kedam rori hman kan la ngah hai lo. Kan sakhan ih um thilri phunphun ralhrang pawlin an lak hnuah kan sakhan an urkang thluh.
“Kannih cu kan sakhan kan hloh ruangah kan beidong men lo ih, sakhan din theisal dingin kan zuam ding. Cumi caan ah mipi khalin in dinpi hrih uhla kannih cu ralhrang ralkap do in kan cangvai vivo ding a si,” tin a sim.
Leave a Reply