Mizoram Cozah In Chin Raltlan Pawl Thlun Ding 11 An Suah – Ralhrang in rampi thuneihnak an lak hnuah ramri ih Chinmi tamzet cu Mizoram lamah an rak tlanih, raltlan buaipitu pawlih simdan vek asile , tui dinhmun Mizoram ah Myanmar raltlan thawng 40 hrawng an um tin an sim.
Myanmar raltlan pawl cu Mizoram cozah, NGO le pawlkom tinkim in theitawk in an tuamhlawm ih an buaipi ringring. Hivek dinhmun ah raltlan lak khalin daan pahbal an rak um phah theu ih, tu khalah Mizoram cozah cun Myanmar raltlan pawl thlun dingmi thu 11 an suah.
Mizoram cozah in Myanmar raltlan hrang thu an suahmi 11 pawl cu – Raltlan mithar zokhal raltlan buaipitu hnenah hmin nan pe tengteng dingih tuanvo neitu pawl buaipinak in raltlan sinak card tuahsak nan si ding. (hminsin himi card hi UN card tinak a silo ih, Mizoram sung hrang lawngih raltlan sinak men a si). Aizawl District sungih um ding raltlan zokhal siannak nan la hmaisa ding. Raltlan zokhalin dankalh thil nan tuah lo pei ih, cozah huatzawng hrimhrim nan tuah lo ding tlunah India daan nan thlun pei.
“Raltlan zokhalin dawr nan tuah lo pei. Raltlan umnak hmunin hmundang nan tthawn ding asile tuanvo neitu pawl nan theihter tengteng dingih an siannak lawngin nan thawn ding. Khualtlawng duh raltlan khalin siannak ca nan la tengteng ding. Raltlan sinak in innhmun le hmuan neih a thiang lo ih, nan nei asile daan pahbal nan si. Innhmun nan lei thei lo. Raltlan lakin mawtaw le bike nei pohpoh tlunlam ah nan theihter tengteng ding.
“Mawtaw mawn theinak ca felfai nei lo cu zokhal mawtaw nan mawng thei lo ih, mawn sian nan silo. Myanmar raltlan zokhal dankalh le thupthiar in Aadhar Card, Voter ID le Driving License pawl tuah sian nan silo. Mizoram sungih um raltlan zaten a tlunih daan le dun pawl thlun dingin theihter nan si. A tlunih tarlangmi daan le dun thlun lo pohpoh cu India daan vekin hremnak pek nan si ding,” tin Mizoram cozah cun Myanmar raltlan hrang thu an suah.
Mizoram Ah Myanmarmi Tlawngkai 6000 Leng An Um – India ram, Mizoram State sungih acozah tlawng ah siseh, bulpak tlawng ah siseh Myanmarmi tlawngkai 6,195 an um tin Mizoram cozah Fimthiamnak minister cun a sim.
Tlawngta 6,195 lak ihsin 5,221 pawl cu acozah tlawng ah an kai ih tlawngta 184 cu acozah ih bomnak pekmi tlawng ah an kai. A dang tlawngta 790 pawl cu bulpak tlawng ah an kai tin Mizoram cozah cun an thusuahmi ah an tarlang.
Mizoram cozah Fimthiamzung Director Dr. H Lalthlangliana cun “Myanmarmi tlawngta tam sawn cu Chinmi an si ruangah tong thawn pehpar in harsatnak an nei tuk lo. Ziangahtile mizoram thawn nunphung le phunhnam ih kan bangawk ruangah a si ih mizo tong khal an tong thiam ko” tin a sim.
2021-2022 cazir kum ah Myanmarmi tlawngta 68 pawl cu phun 10 camibuai hrang cazin an thunsak thu khal Fimthiamnak Department Director cun a sim.
Mizoram ih tlawngkai Myanmarmi tlawngta hrekkhat cu raltlan an si ih hrekkhat cu Myanmar ih tlawngkai a theih lo ruangah nu le pa in Mizoram ih tlawng an kaitermi pawl an si. Cumi tlunah tlawngta hrekkhat cu ramri kiangkap lai khua lam ih tlawngta nauhak pawl an si tin an sim.
PDF In Misual 15 An Kai – Ayeyarwaddy tipi tluanih suamhmang hminthang pawl cu Shwebo PDF pawlin a kai ngah ih, misual pawlkom ahcun mipum 15 an um. Suamhmang misual pawl cu Mandalay ramthen Mat Taya myone sungih Ayeyarwaddy tipi tlunah mipi thilri fir ih cangvai an si.
Misual pawl umnak PDF in an theih tikah an luhcilh ih, misual mipa 14 le nunau pakhat, an zaten misual 15 an kai. Anmah PDF lam cu an him. Misual an kaihmi hnenin hriamhrei le mipi thilri a rukmi pawl khal an kaih tel thluh.
Suamhmang misual pawl cun mipi thilri phunphun an rak ru ih, tangka le phone tivek cu mipi an hro hnuah an laksakmi a tam. Shwebo PDF cun an kaihmi misual 15 pawl cu tlunlam ah an ap ih,tlunlam PDF in a tul dan vekin an tuah ding tin an tarlang.
Myanmar ram a buai hnuah khawilam khawilam khalah ttang cuang lo, rukru, suamhmang le misual an rak um vivo ve ih, ralhrang lamin an ngaihsak lo tikah mipi le mipi ralkap pawlin suamhmang, misual le rukru pawl an kai rero zo.
Ralhrang Lawng An Kap – Chindwin tiva tluanih feh ralhrang lawng pawl cu September 30 ah PDF komkhawm in an rak kap ih, doawknak a sosang tin Mungzua PDF cun thu an suah.
Mungzua PDF cun “Nikhat sungah ralhrang lawng 2, ralhrang mawtaw 3 tin kan rak kap. Lawng parih um anmah ralhrang pawl khalin in rak kap ve ih, nazi 1 sung tluk kan kap aw. Nazi pakhat sung ralhrang kan kahmi ah ralhrang thi an um thei nan, ralhrang thizat le hriamhma tuar tivek kan fiah thei lo.
“Tuitum cu kanmah lawng siloin Aung San Force, Salinkyi PDF le Fire group pawl thawn ralhrang lawng le mawtaw rak kap kan si. Hmailam khalah ralhrang ukak feh tluang lo dingin le ralhrang uknak cem rori dingin kannih cun ralhrang kan do vivo ding a si,” tin mipi an theihter.
Vanzam Sungih To Ralhrang Senthum An Kap Ngah – Kayah ramkulh Loikaw khawpi Airport ih ralhrang vanzam kah ngah a si thu ah thudik a suak vivo ih, ralhrang lam an mualpho deuhdeuh.
A thok ahcun ralhrang in mipi tonak vanzam tin thu an rak suah ih, mipi ralkap pawl cu mipi kap vekin sual an rak puh. Asinan, Loikaw ahcun mipi in vanzam an tolonak a rak rei thlangih,khualtlawng phurtu vanzam khalah anmah ralhrang le ralhrang lamtang lawng an to tlangpi.
Vanzam sungih to a kah ngahmi khal ralhrang senthum Thein Soe Ngyunt a si tin an fiah zo ih, cerek in a hmai a ngah ruangah ralhrang sizung ah an tuamhlawm rero lai.
Hriamhma tuar ralhrang buaipitu cun “Vanzam sungih an kah ngahmi cu ralhrang senthum a rak si ih, ralhrang sizung ah an tuamhlawm rero lai. Vanzam ahcun anmah ralhrang lawnglawng a rak to ih, mipi ralkap pawl sual an puh duh tuk ruangah khualtlawng phur vanzam tin ralhrang lam cun thu an rak suah. Mipi le mipi ralkap buai haiseh timi an duh ruangah siko. Tu ahcun thudik tamsawn kan thei zo a si,” tin a sim.
September 30, zinglam nazi 8:45 hrawngah Naypidaw in Loikaw ih ttum vanzam cu meithal in kah a si ih, cerek cun vanzam sungih to mi pakhat hmaiah le midang pakhat ke ah a ngah. Hmai ih hriamhma tuarsawn a besia ih, ke ih hriamhma tuar cu malte lawngin an sim.
Leave a Reply