Mizoram In Tlung Chin Raltlan Pawl An Harsa – India ram Mizoram State sungin Chin ramkulh Paletwa ramkulh sungih tlung Chin raltlan mipum 50 hrawng cu an tlunnak Paletwa ah an harsa tuk ti’n anmah in an sim.
Palewa peng Myeik Wah khua ih mipi 500 hrawng cu ralhrang in tlunzuang raldonak in khua kiangkap bomb an thlak ruangah khua mipi pawl cu 2022, September 2 ah an khua suahsan in Mizoram lamah an rak tlan. Mizo tong an thiam lo tikah Mizoram khalah an hrang um ringring a rem lo ih, 2023 February thlacem hrawngah an khua lam panin an tlungsal. Khua an tlun hnu ahcun a hlan vekin an khua kiangkap an vaktawi ngam naw lo ih an harsat phah.
Raltlan pakhat cun “Thla 7 hrawng raltlan in Mizoram kan um ih, kan tlunsal tikah zianghman kan nei nawn lo. Ka lo thlai cinmi pawl khal a rak siat thluh. Hramlak ih thing lak ding le lo ram tuah ding khal bomb kammi a um thei ti’n kan vak suak ngam lo. Ziangahtile, kan khua kiangkap ah an rak do aw rero zo ih, vanzam tiangin kan khua kiangkap ah bomb an rak thla.
“Inn thar kan sak ih, lo hna kan tuanmi pawl a hramin ka thoksal a tul. Kan harsat tuk ruangah Paletwa lam ahcun bomnak kan dil zo. Tu ah mipum 500 hrawng khua ah kan tlung zo ih mipum 200 hrawng cu Mizoram lamah raltlan ni an umlai. Kan tlunnak san cu khua ah doawknak a um nawn lo. Mizoram lam khalah tong kan thiam lo zetih kan harsa tuk. Curuangah tlung kan si,” tin a sim.
Mizoram ahhin Chin raltlan thawng 40 tlun an um ti’n buaipitu pawl cun an sim ih, Mizoram cozah, pawlkom le kawhhran tin tlunah khua tinih hruaitu pawl cun Mizoram ih Chin raltlan pawl cu theitawkin an buaipi, an zoh ih, umnak tiang tawlrel sak an si.
CDF Mindat In Ralhrang An Sawm – Chin ramkulh Mindat peng sungih cangvai CDF Mindat cun ralhrang pawl an lemih ralhrang sunglam thu an hnenah sim dingin an theihter.
CDf Mindat cun “Ralhrang pawl hi dan nei lo an si bangin duhtawkin mipi an that rero zo. Curuangah ralhrang lakin CDM tuah thei lo nan, ralhrang sunglam thu relsuaktu khal tampi an um. 2021, August thla ah kan hnenih CDm tuah pawl laksawng ting 50 kyats kan pek ding thu kan rak than zo. CDm tuah ralkap pawl cu khawi khalah laksawng pek rero an si.
“Curuangah ralhrang lakin CDM tuah thei lo ruangah ralhrang lakih um nan zaten mipi nan tanpinak pakhat si ve dingin ralhrang sunglam thu pawl kan hnenah in simthei dingin kan lo sawm. Kan hnenih ralhrang sunglam thu in simtheitu cu a thu umdan ih zir in laksawng kan lo pe ding a si,” tin thu an suah.
CDF Mindat cun Chinram lam pan ralhrang mawtaw 80 thuhla khal mipi theihternak an nei cih. CDF Mindat cun “Pakukko in Chin ramkulh lamih feh ralhrang mawtaw 80 pawl cu March 13, sun nazi 12:5 hrawngah Kyauk Htuh an thleng zo. Ralhrang pawl cu Mindat le Matupi feh peh thei an si ih, mipi pawl Kyauk Htuh, Mindat le Matupi lamzin pawl zawh hrih lo dingin kan lo theihter a si,” tin thu an suah.
India Ralkap Pawl Chinram Ah An Lut – India ramri kil ralkap pakhat Assam Rifiles pawl cu March 13 ah Chin ramkulh Paletwa peng sungah an lutih, meithal an hmet puak ciamco bet.
Khuami pakhat cun “Ramri hminsinnak kan zoh ding ti’n India ralkap pawl Paletwa peng sungah an lutih, Chin ramkulh ih khua sung tiang an lut lan. Khua an luh hnuah tlawnginn le kiangkap inn pawl an zuk.
“Kannih khuami pawl cu kan mangbang tukih a tih khal kan tih. Kan mit hmuh rori a si ih, an suah zawngah meithal an hmet puak ciamco bet. Kan khua hi inn 10 hrawng kan si ih mipum 600 hrawng kan um. India ralkap 10 tlun an si. Ramdang ralkap an si ih, duhduh in kan ram sungah an lut men cu theithiam a har tuk lawlaw,” tin a sim.
Naypidaw Ih Ralhrang Hmunpi An Kap – Naypidaw hmunram Lewi myone , Aung Nan Cho khua kiangih ralhrang hmunpi cu March 13 ah Naypidaw PDF in Ralthuampi thawn kan kap ti’n mipi theihternak an nei.
Naypidaw PDF cun “Ralthuampi kan kahsuakmi pahnih cu ralhrang pawl umnak sungah a tla fuh tuk. A dang Ralthuampi pahnih kan kahmi cu ralhrang pawl umnak kiangah a tla. Naypidaw hi ralhrang hmunpi a si bangin ralhrang umnak hmun pawl kan bat.
“Dothlengnak caan a rei thlang bangin dinhmun sangsawn ih cangvaih vivo kan tum. Naypidaw ih um ralhrang pawl khal hahdamten an um thei nawn lo ding. Ralthuampi pakhat in ralhrang pawl umnak hmun kan kap fuh tuk nan, ralhrang thizat cu kan fiah thei lo a si,” tin mipi theihternak an nei.
Israel Mipi Tingtel An Pungkhawm – Israel cozah in an ram daan remthat an tummi cu Israel mipi in an duh lo ih,Israel ram khawpi tinkim ah Israel mipi pawl pungkhawm in duhphorhnak an nei.
Israel mipi pungkhawm hi ting 5 tlun an si ding tin an sim ih khawpi pakhat ah mipi ting 2, ting 3 tivekin an pungkhawm. Mipi pungkhawm cun Israel cozah in daan thar remthat an tummi cu duhlonak an langter.
Israel cozah cun Supreme Court tlunah cozah thuneitu sangsawn member 120 umnak ret an tum ih an ret hlawhtling asile Supreme ih thuthen catmi khal a tlunih um member 120 pawlin zohfel salnak an nei thei cingih tamsawn duhdan in thu a then bet thei ding. Cuvek cu Israel mipi in an duh lo lawlaw ih lamzawh duhphorhnak nei rero an si.
Leave a Reply