Kalay Ah Ralhrang 43 Tlun An Thi – Sagaing ramthen Kalaymyo thlanglam ih ni 3 sung doawknak ah mipi ralkap lamin mi pahnih an thi ih, ralhrang 43 an thi tin mipi ralkap lam cun thu an suah.
Doawknak thuhla ah CNDF cun “july 11 ihsin kalaymyo thlanglam ah kannih CNDF, Kalay PDF, CDF KKG, RKDF , UGF Kalay le Pah-khah-phah pawlin ni 3 sung ralhrang ralkap kan do. July 11 zingah Yankyi Aung ihsin ralhrang 120 hrawng an suak ih, Hakhalay khua an luh zawng sun nazi 12 hrawngah kannih mipi ralkap komkhawm cun kan do. Doawknak ah kanmah CNDF miraltha pakhat kan can.
“Ralhrang pawl cu Hakhalay phungki tlawngah an riak ih, July 12 zinglam ah Hakhalay in sitar khua lamah an feh. Sitar khua kiang khalah kannih mipi ralkap komkhawm cun kan do peh. July 13 ah ralhrang pawl cu Htauh Kyan lamah an feh ih, kannih mipi ralkap komkhawm in bomb puah in kan do. Ralhrang kahmi ralthuampi ruangah mipi lakin mi pakhat hriamhma a ngah ih, kalay PDF sungtel pakhat khal a thi. Ni 3 sung kan doawknak ah ralhrang 40 tlun an thi a si,” tin thu an suah ve.
Kalay PDF cun “July 10 in 13 tiang ralhrang ralkap pawl cu Kalaymyo thlanglam Yankyi Aung in Kalay thiamthil zirnak hmun lam cu ke in an pan ih, kannih Kalay PDF, CNDF, CDF KKG ,RKDF le Pah-khah-Phah pawlin lamzin tluanah vei tampi kan do ih, ni 3 sung doawknak a sosang.
July 11 ah Yangkyi Aung ralhrang hmunih suak ralhrang pawl cu zinglam nazi 9 hrawngah kalay le Falam zin Hakhalay an thleng ih, kannih mipi ralkap komkhawm cun kan rak do. Doawknak ah ralhrang 3 an thi ih, kannih mipi ralkap komkhawm lamin CNDF miraltha pakhat Salai Lal Biak San a thi ve. RKDF lam khalin mi pakhat hriamhma ngah a um.
“July 12 ah ralhrang pawl cu ke in an feh peh ih, Insein khua le Sitar khua karlak ah kannih mipi ralkap komkhawm cun zanlam nazi 3 tiang kan do. Doawknak ah ralhrang 5 an thi ih, kannih mipi ralkap komkhawm lam kan him. Ralhrang pawl ih meithalpi kahsuahmi cun nauhak pakhat a ngah ih,hriamhma a ngah. Ralhrang pawl cu Sitar khua ah an riak.
“July 13 ah ralhrang pawl cu hmailam an feh peh ih, Htauk Kyan le Tayakung khua karlak ah kannih mipi ralkap komkhawm cun zinglam nazi 9 in zanlam nazi 1 tiang kan do. Doawknak ah ralhrang 20 hnakin mal lo an thi. Kannih mipi ralkap komkhawm lamin Kalay PDF sungtel pakhat a thi ih, CNDF sungtel pakhat hriamhma a ngah. July 13 zanlam ahcun ralhrang pawl cu Tayakung khua in kalay thiamthil zirnak tlawnginn ah an lut. Cumi hnuah mithi phur mawtaw 2 cu kalay thiamthil zirnak tlawnginn sungah an lutih, ralhrang thi pawl ruang cu Kanpale thlanmual ah vei 8 rori an phursuak tiah felfai zetin kan thei a si,” tin thu an suah.
Doawknak ih tel Pah-kah Phah pawl khalin Kalay ih ni 3 sung doawknak thuhla mipi theihternak an nei ve ih, annih Pah-kah phah cun Kalay ih ni 3 sung doawknak ah ralhrang 43 an thi tin mipi an simthei.
Matupi Ah Ralhrang Pawl An That Aw – Chin ramkulh Matupi peng sungah ralhrang pawl anmah le mah an that aw ih, an ruang khal phum tha paih loin lamzin sirah an hlon men. Cucu, CDF Matupi pawlin an hmuh tikah thaten an vuiliam sak.
CDf matupi cun “July 6 le 7 ih doawknak ah ralhrang thi pawl cu anmah ralhrang nungdam pawlin an phum paih loih an ruang pawl cu lamzin sirah an hlon men. Cupawl cu kannih CDF Matupi pawl in kan vuiliam sak.
“Doawknak ih hriamhma ngah ralhrang pawl cu nungdam lai an rualpi ralhrang pawlin an tuamhlawm paih lo ih, lailenpi le Asho khua karlak ah ralhrang hriamhma ngah pahnih an that. Amlai khua kiang khalah ralhrang hriamhma ngah pahnih cu anmah ralhrang nungdam lai pawlin an tuamhlawm paih loih an that men a si,” tin thu an suah.
Tamu Pyu Saw Htee Pawl Ralhrang Hnenah An Beu – Sagaing ramthen Tamu khawpi ih India rammi pahnih thattu Tamu Pyu Saw Htee pawl cu anmah ten an um ngam nawn lo ih, ralhrang pawl hnenah an beu tin Tamu mipi cun an sim.
India rammi pahnih cu July 5 ah Tamu Pyu Saw Htee pawlin an that ih, ralhrang pawl cun thuhla fel suak thei lo dingin India rammi pahnih ih ruang khal an urkang lohli. Hivek ruangah India mipi an lungawi lo ih, ramri ah duhphorhnak an neih phah.
India mipi lungawi lo cu India cozah in a leem hai ih siattong innsang hnenah sumpai an pe. Cun, ralhrang pawl khalin mithi pahnih ih rukro an kuat tin Tamu ih um pawl cun an sim.
Tamu ih um pakhat cun “Pyu Saw Htee pawl cu India rammi an thah hnuah anmahten an um ngam nawn lo ih, ralhrang pawl hnenah an beu. Cun,buainak reh dingin India cozah cun siattong innsang hnenah tangka an pe ih, ralhrang pawl khalin ruhro an kuat ve. Anmai ruhro taktak a si maw ti cu kan thei ban lo a si,” tin a sim.
Hivek a si hnuah a hlan bangin ramri a zalen hrih cuang lo ih, thilri an kuat phahphah thei thlang nan,mipum cun duh vekin an sukso ngam hri lo thu Tamu mipi cun an sim.
Ralhrang In UK Palai An Dawisuak – Ralhrang ralkap cun Myanmar ram sungih ramdang palai pawl cu anmah dinpi dingin an sawm , an lem rero ih, an sawm thei lomi pawl cu Myanmar ram in dawisuak vivo an tum.
Tu ah Myanmar cun UK Embassy ih hotu Pete Vowles khal anmah dinpi dingin an sawm rero ih, Vowles in a duh lo ruangah Myanmar ah um an siang nawn lo ih, an phunphun in an nor ruangah Vowles khalin Myanmar a suahsan.
UK palai Vowles cun “Ralhrang ralkap cun Myanmar ah um thei lo dingin in hnaihnok rero ih, Myanmar ka suahsan thei dan ding hlir an tawlrel. Cumi ruangah Myanmar cu ka suahsan phah. Asinan, anmah ralhrang pawl ka tuanpi lo ruangah kan lungawi tuk. Myanmar ka suahsan nan, tuih Ka tantami pawl khalin diknak, zalennak le daihnak lawng duh Myanmar mipi hrang theitawk an zuam vivo ding a si,” tin a sim.
Leave a Reply