Oman Feh Tum Chin Fala Thawnginn In Suak Thei Hrih lo – Chin ramkulh Mindat in Oman feh tum Chin Fala ( kum 20 ) mi cu Thailand khawpi bangkok ah a passport scan a theih lo tin Thailand palik pawl cun August 31 ah an rak kai ih, tuini tiang amah buaipitu pawlin an be thei hrih lo.
A thok ahcun Thailand palik pawlin thawnginn sungah covid 19 daan vekin ni 21 sung amahten a um hrih a tulih, biak le ton a theih hrih lo tin amah buaipitu pawl an rak simthei. Asinan, ni 21 sungt a dangten an ret hnu khalah thawnginn tuanvo neitu pawl cun biak a theih hrih lo, ni 16 sung a dangten a um hrih a tul tin an rak simthei.
Buaipitu pakhat cun “Thailand ah covid 19 daan an tuah tharmi cu ni 21 sung a dangten ret ding timi a si ih, tu ah ni 21 sung a um kim zo nan, ni 16 sung a dangten a um hrih a tul tin in rak simthei. Cutikah kannih hrangah amah biak a theih hrih lo ih, buaipi dan ding kan harsat a si,” tin a sim.
Mindat Chin fala cu nulepa nei nawn lo a si ih, Mindat ihsin Oman feh tum a si ruangah Yangon Passport zungin a passport scan theih loin an rak tuahcia sipei maw tin thenkhat cun an ringhlel. Tukhalah a passport scan a theih lo ruangah passport lem hmangin Thailand palik pawlin an rak kaihmi a si.
NUG Humhimnak Vuanci In Mipi Ralkap Thu A Cah – NUG humhimnak vuanci U Yee Mon cun facebook fehtlang in mipi ralkap pawl thucahnak a nei ih, mipi ralkap pakhat ih dinhmun le tuan ding awm a timi pawl a simthei hai.
U Yee Mon cun “Mipi ralkap pawl hi mipi ih dinpimi le mipi ralkap taktak nan si bangin ralhrang donak khalah hmunram kan la vivo ih, cumi rualrual in mipi phurrit pe lo ding khalin kan cangvaih a tul ve. Mipi doral si ding zawngin kan cangvaih lo a tha.
“Ralhrang kan do tikah mipi tuar lo ding zawngin kan cangvaih thiam a tul dingih ,mipi eiin hawlnak, mipi sukso vahnak tivek pawl khal hnaihnok lo ding kan si. Mipi himnak puhmawh in lamzin ah mipi cek ih, sumpai dil, siah dil, sizuapi tuah pawl hnaihnok tivekin kan cangvai hrimhrim lo pei.
“Hivek pawl cu hmaisa lam khalah mipi ralkap hruaitu pawl hnenah ca in pek thluh zo an si ih, mipi ralkap zaten thlun thluh dingmi khal a si. Mipi thawn kan laicinnak tha sinsin dingin thu kan suahmi pawl hi mipi ralkap lam khalin uluk zetin in thlunsak a tul. NUG cozah sungah pDF le pah-kah-phah tin ralkap bur pahnih kan din.
“Thupi bik cu mipi ralkap kan zaten lungrual zetin kan um ding cu a si. Lungrualten kan umtlang theinak dingah mipi ralkap hotu ciar khal hmaiton in thurel phah khal a tul. Khat le khat nautat aw ding, hmuhsuam aw ding kan silo ih, khat le khat theithiam aw ton ding, khat le khat sinak tawkah upat aw thiam ding kan si. Kannih tlunlam khalin mipi ralkap zaten lungrual zetih kan umnak theinak dingah theitawk kan suah rero ve a si,” tin NUG humhimnak vuanci U Yee Mon cun a tarlang.
One Championship Ah Aung La Nsang Misual Sal Ding – One Championship sualawknak ih champion taikhap pahnih rak la thei zotu Aungla Nsang cun One Championship ah mi a sualsal ding thu mipi theihternak an nei zo.
Aung La hi Myanmar in leitlun champion kan neihmi pakhat a si ih, One championship ah Light Heavyweight le Middleweight champion taikhap a rak cawi zo. Asinan, 2020 ihsin a taikhap kolmi pahnih cu Ridder in a rak laksak veve ih, tuini tiang One Championship ah taikhap a lasal thei nawn lo.
Tuitum ah Aungla Nsang cun One Champioinship ah mi a sual ding thu mipi theihternak an nei zo nan, zo a sual ding, ziangtik timi cu mipi theihternak a nei hrih lo. Misual dingin contract a ngan fel zo ih, a sual digmi le a caan khal a fel lohli dingah ruah a si.
Tuitum ih Aung La misualnak hi taikhap cuh sualawknak a si thei hrih lo dingih, taikhap cuhsal thei dingin dinhmun tha pe theitu puai vek a si hrih. A sual dingmi ih rel hlawhzet pakhat cu Japan misualthiam Yushin Okami a sinan, nemhngehnak cu a um hrih lo.
Ram Humhimnak Neclear Thabik Pawl Hmang Tum Russia – Russia president Putin cun Russia ram humhimnak ah a tul asile Nuclear ralthuam thabik pawl kan hmang ding tin US le NATO pawlkom pawl a theihter ih, leitlun buainak boruak a sosang deuhdeuh.
Russia in Ukraine an donak ah US le NATO cun ralthuam hmangin Ukraine an bawm rero ih, Russia lam duh vekin an cangvai thei lo. Hivek ruangah Putin cun US le NATO pawl hnok a ti tukih, a tul a si ahcun Russia ram humhimnak ah Nuclear thabik pawl kan hmang ding tin a theihter.
UK prime minister cun Putin tongkam ah an thinpha lo thu a relsuak zo ih, US president Biden cun “Kannih NATO pawlkom pawl cu kan tangrual tuk lawlaw. Nuclear ralthuam hmannak ah zohman nehtu an um thei lo. Curuangah Nuclear tivek hman rero a tul lo,” tin Biden cun Putin tongmi a let ve.
Russia in thla 7 sung Ukraine an do thlang tikah ralkap tampi an hloh ve ih, an buai phahzet thlangin a lang. Ukraine lamih ralkap thelhbawh pawl a kuat tum tikah Russia mipi in an rak lungkimpi lo ih, Ralkap latbet a tummi duh lo khal Russia mino tampi khal ramdang ah an tlan rero. Hivekin Russia ramsung an buai ruangah Putin khal ruah lopi’n a cang luailo pang kei tiah thenkhat rak thinphang khal an um ve.
Leave a Reply