Ooredoo In Myanmar An Suahsan Ding

Khoh Zetin Ritheihsi Kham A Si – A tufang Chin ramkulh sungin Mizoram lamih rittheihsi lut a tam tuk ruangah, CNDF cun khoh zetin ritheihsi phur pawl an kham ih, a tul dan vekin hremnak an pek ding thu an sim.

CNDF cun “Rittheihthil le thinlung tidanglam thei siivai pawl Myanmar ihsin Mizoram, India lamah phur le zuartu tam zet cu Mizoram Palik pawl in an kaih rero thu tuhrawng thuthang ah ningzakza zet kan hmu leuhleuh a si.

Kan ram buainak ruangah Chinmi pawl Mizoram ah raltlan in le Mizoram mipi pawl ih zawnruah lainatnak le duhdawt zetih in cohlannak cu remcang ah la tahrat in, mi duh-am, mai ṭanghma lawng sial ṭhenkhat cun Mozoram ah rittheihthil an phur le an zuar kan hmuh tikah CNO/CNDF telin Chin mipi pawl in mak kan tiih hleiah kan dodal in nasa takin kan dem a si.

Curuangah Chinram ihsin Mizoram, India ramri kanin rittheihthil phurih zuar nawn lo lawlaw dingin le hi thusuah thlun lotu cu CNO/CNDF in nasa takih hremnak pek an si ding thu ralrinnak sangbik kan pe a si,” tin thu an suah.

Mipi Lamtang Laksawng An Pe – Chin ramkulh Kanpetlet palik sakhan ih palik pakhat cu rualthuam famkim thawn CDF Kanpetlet kutih a pekawk ruangah CDF Kanpetlet cun laksawng ting 60 an rak hlan.

Kanpetlet CDF kutih pe aw palik Pih San Aung cun “CDM lut dingin ka timtuahnak a rei tuk zo nan, harsatnak phunphun ruangah tuanten kan rak lut thei lo. Neta ahcun tuar ding a si nawn lo ih, lo theih loin ka tlansuak. Tlunlam in nornak a tam ih, sinak sang pawlin duhtawk in an kuthnuai pawl an sor. Cuvek tikah tlan thei lo dingin an hngetkhoh deuhdeuh ih,eiin khal kan harsa deuhdeuh. Cuvek tikah umnak a tha nawn lo a si,” tin a sim.

Palik Pih San Aung cun G3 meithal zunkhat a tlansuahpi thei ih, rak cohlangtu CDF Kanpetlet cun laksawng ah ting 60 kyat an rak pe ve.

Chin ramkulh Mindat khawpi ih ralhrang hmunpi khalin ralkap Hein Min Naing khal ralthuam famkim thawn PDF Kyauk Htuh kutah a pe aw ve ih, PDF Kyuak Htuh cun laksawng an rak pe.

Ralkap Hein Min Naing cun M1 zunkhat, cerek bawm 5 le cerek 270 pawl a tlansuahpi ih, PDF Kyuak Htuh kutah a pe. Hivek ruangah PDF Kyauk Htuh khalin laksawng ting 80 an rak pe ih, hmunhim ah an kuat cih thu mipi theihternak an nei.

A tufang Meithal zunkhat ah ting 50 tlun a man vohvoh ih, CDM pawlin meithal le cerek an ken tikah laksawng hrang ting 50 tlun an pekmi cu an phu tuk ko tin mipi lam khalin an sim ve.

Mindat Ah CDm Tuah Lo Pawl A Tawpnak Ralrinpeknak An Nei – Chin ramkulh Mindat peng sungih CDm tuah hrih lo ralhrang hnuai ih hnatuan pawl cu August 15 netabik ah retin CDm tuah cio dingah Mindat mipi uktu cun ralrinnak an pe ih, an theihter.

Mindat mipi uktu cun, “Ralhrang uknak kan do timi ah CDm tuah cu thupi tuk a si ih, ralhrang dinmi phunsang tlawng, ralhrang kuthnuai ih zirnak tinkim pawl cu kannih Mindat mipi uktu in kan cohlang lo. Curuangah tutiang CDm tuah hrih lo, ralhrang hnuai ih hnatuan zaten CDm tuah dingin theihter nan si ih, August 15 tiang caan kan lo pe.

“Thusuahmi le ralrinpekmi thlun loin ralhrang hnuai ih hnatuan peh thotho pawl cu hremnak phunphun kan pe ding. Hremnak kan pek dingmi pawl cu Khua in dawisuak nan si dingih,hlolak cazin ah khum nan si ding tlunah, mipi lakah cangvai thei lo dingin hrem nan si ding a si,” tin thu an suah.

Ooredoo In Myanmar An Suahsan Ding – Myanmar ram sungih mipi hman tam pathumnak dinhmun luah theitu Ooredoo cun Myanmar an suahsan ding thu Juy 20 zanlam ah thu an suah ih, an neihmi thilri pawl midang hnenah an zuar fel ding.

Ooredoo in a thilri pawl a zuar ding tikah zoin a lei ding timi cu felfai in a um hrih lo nan, Yaung Investment Group, Campana Group le Skyinet pawlin an lei men thei tin thu a suak. Asinan, zoin an lei ding timi cu thu felfai a um hrih lo.

Ziangzat in Ooredoo an zuar ding tikhal theih a si hrih lo ih, Myanmar ram an suahsan ding thu lawng mipi theihternak an nei hrih. Ralhrang in rampi thuneihnak an lak hlanah Myanmar ah Ooredoo hmangtu mipum 15 Million hrawng an um ih, ralhrang in rampi thuneihnak an lak hnu ahcun Ooredoo hmang 9 Million hrawng an um.

Myanmar an suahsannak san ih an relmi cu ralhrang lamih nornak a tam tuk ruangah tin an sim. Telenor khalin Myanmar an rak suahsan zo ih, a leitu pawl cu ralhrang duhdan in an feh. Curuangah Ooredoo leitu pawl khal ralhrang duhdan ih fehtu pawl an siko ding tin an sim.

Ralhrang in an kuthnuai ih an ret theimi Company lawng zalen zetin ramsung ah an umter ih, ralhrang kuthnuai ih um thei lo pawl cun Myanmar ram an suahsan rero ve.

PDF 11 An Thi – Sagaing ramthen Kanbilu myone Cisuh khua cu ralhrang ralkap in raldonak Helicopter pahnih thawn an kap ciamco ih, PDF 11 le khuami 6 an thi tin tuanvo neitu pawl cun BBC an simthei.

Ralhrang in Helicopter in hnuailam an kap ciamco ih, cumi ah PDF 11 an thi. Leihnuai hmun 3 ih then aw ralhrang pawl cun khuami an kaihmi lakin mi 6 khal an that. Ralhrang ralkap cun khuami 150 khal an kai ih, inn 300 hrawng an urkang sak. Cumi ahcun biaknak inn khal an urkang tel. Neta ah mipi an kaihmi pawl cu an thlahsal thluh ih, mipi inn 100 an urkang bet.

Ralhrang pawlin khua an suahsan hnuah mipi le mipi ralkap pawl cun khua sung umdan an zohfel thei ciah ih, cumi ahcun PDF an thahmi le khuami an thahmi pawl an hmu ih, khuami 10 dang khal an thuhla le an umnak hmun an thei hrih lo.

Khuami pakhat cun “Khua kan luh tikah a rak sa tuk lai ih, inn pawl an urkangmi khal khung vutvo lai an um. Khua sung thilri an duhduh an la ih, phungki tlawng tiang an suasam thluh. Ralhrang pawl cun kan khua ah PDF pawl an um tin an kap ciamco men. A hlanah doawknak a um lo, ralhrang mawtaw bomb an puah tivek khal a um lo. Umdan cu thuhla simtu an nei in a lang. Hivek cu kan sansung ah veikhat kan tonnak a si,” tin a sim.

Bangladesh Ah ARSA Sungtel 3 An Kai – Mithat thubuai thawn pehpar aw in rinhlelhmi ARSA sungtel 3 cu Bangladesh ih Rohingya raltlan pawl umnak hmunah kaih ngah an si tin Bangladesh palik cun thu an suah.

Rohingya ralkap ARSA pawl cu Myanmar ramri Bangladesh ah umhmun an khuar tlangpi in thu tampi a suak ih,anmah ARSA cun Bangladesh ah kan um lo tin an pha rero nan, tu ahcun Bangladesh ram sung rori ah ARSA sungtel 3 kaih fel an si.

Tu ih kaihmi pawl cu mi 6 thah thubuai ah an tel tiah an sim ih, Rohingya raltlan hmun ahcun hminlem in an rak um. Kaih an si hnuah an zaten thawnginn sungah an khum zo ih, daan vekin an tlun thu relcat a si ding.

ARSA pawl cu 2017 kum ah nasaten ralhrang ralkap thawn do aw an si ih, ralhrang in rampi thuneihnak an lak hnu khalah Rakhine ramkulh sungah veikhat hrawng an cangvai dah nan, an thazang a cak lo tikah an cangvaihnak thuhla theih ding a mal.

Sri lanka Ram President An Hril Fel – Ram buai Sri Lanka cun an president bik a tlan hnuah July 20 ah hlutdaw pawlkom pawlin president thar hrilnak an nei ih, lailak president hna kaitu Ranil cu Sri lanka president tuan dingin an hriltling.

Ranil cu Sri Lanka cozah hlunah Sri Lanka ram Prime Minsiter hnatuantu a si ih, mipi cun Prime Minister a sinak in bangseh tiah an rak phut ve. Asinan, a hna in a ban lo tlunah president hna tiang pek sawn a si ih, mipi lam an dai thei hrih lo.

president thar ih an hrilmi Ranil cun 2024 tiang Sri Lanka ram a kaihruai ding. Tuih a hna hmaisabik cu lamzawh duhphorhnak nei mipi pawl daiziar ih um dingin hahdamter ding a si ih, president thar a si veten cozah dankalh ih um pawl kham dingin ralkap le palik pawl thu a pe cih.

Hivek ruangah Sri Lanka ram buainak a reh fel pei maw tikhal rel theih hrih lo dinhmun ah a um. Ziangahtile, an president thar cu mipi duhmi a si cuang lo ih, mipi lungkim zawngin hna a tuan lohli a tul ding. Cuti a si lo ahcun mipi lam nornak a dai men lo dingin a lang.