Paletwa Ah Fangfai Lei Ding A Um Nawn Lo

Falam Peng Ah Ralhrang Helicopter Vei 6 A Ttum – August 11 , zinglam nazi 7 in zanlam nazi 4 tiang Chin ramkulh Falam peng Falam le Rihkhawdar ah ralhrang Helicopter vei 6 a ttum ih, Helicopter cun ralthuam a phur men ding tin’ mipi cun an sim.

Rihkhawdar ahcun zinglam nazi 7 ihsin ralhrang Helicopter vei 3 a ttum ih,zanlam nazi 3 hrawng ihsin Falam vankau tlangzim ih ralhrang hmun ah ralhrang Helicopter vei 3 a ttum.

August 10 ah mipi ralkap komkhawm cun Rihkhawdar vengthen Tio tlangpar ih ralhrang sakhan an do ih, ralhrang 5 an thih tlunah ralhrang 4 an pe aw ih, ralhrang thi lakah tatyin-hmu duhbohmukyi a tel tin mipi ralkap lam cun thu an suah.

August 10 ih doawknak theh ah ralhrang raldonak vanzam cun Rihkhawdar kiangkap a hel ciamco zo. Tuitum ih ralhrang Helicopter cun Tio le Vankau ih ralhrang pawl hrang ralthuam a phurhsak siko ding tin mipi cun an sim.

Chin Ralkap Miraltha 53 An Thi – Chin ralkap komkhawm CJDC cun 2022, February 1 in July 31 tiang ralhrang ralkap an donak thuhla cu August 11 zan ah mipi theihternak an nei ih, thla 6 sung doawknak ah chin ralkap miraltha 53 an thi tin CJDC cun thu an suah.

CJDC ahcun Chin ralkap CNA, Chin miphun humhimtu CNDF , PDF Zoland, CDM Siyin le Chin ramkulh sung peng tinkim ih CDF tamsawn an tel thluh. CJDC an din hnuah hmunkhat ih raldo bawmawk caan khal an nei theu.

CJDC cun “Ralhrang ralkap in 2022, August 11 ah thazang tam zetin Chin ramkulh sung in nor. Asinan, CJDC sungtel pawl kan bawm aw tonih,ralhrang ralkap pawl kan rak do rero. 2022, February 1 in July 31 tiang ralhrang kan dodan thuhla pawl cu a hnuailam bangtuk a si.

“Thla 6 sungah Chin ramkulh Tonzang peng sungah doawknak vei 2, Paletwa peng sungah doawknak vei 7, Thantlang peng sungah doawknak vei 9, Tedim peng sungah doawknak vei 13, Matupi peng sungah doawknak vei 18, Kalay Kabaw ah doawknak vei 23, Kanpetlet peng sungah doawknak vei 24,Mindat peng sungah doawknak vei 35, Falam peng sungah doawknak vei 44 , Hakha peng sungah doawknak vei 45 a um ih, a zate kom cun thla 6 sungah ralhrang ralkap thawn vei 220 kan do aw.

“CDF KKG cu Chin ramkulh sung peng 9 ah an tel lo nan, CJDC sungtel an si ih, Kalay Kabaw ah ralhrang dotu an si ruangah an cangvaihnak pawl cu cazin ah kan telh ve. Cun, Thantlang khawpi sungih doakawknak tenau cu cazin ah kan telh lo thung.

“Thla 6 sung ralhrang ralkap thawn vei 220 kan doawknak ah ralhrang 927 an thi ih, kannih Chin ralkap komkhawm lamin miraltha 53 kan can ve a si,” tin CJDC cun thu an suah.

Paletwa Ah Fangfai Lei Ding A Um Nawn Lo – Chin ramkulh Paletwa peng Paletwa in khawpi dang fehnak lamzin pawl ralhrang ralkap lamin khoh zetin an cek ruangah le feh sian lomi an neih ruangah Paletwa ah fangfai lei ding a um nawn lo tin mipi cun an sim.

Paletwa ih um pakhat cun “Paletwa khua ah datsi lei ding a um nawn lo ih, fangfai lei ding khal a um nawn lo. Paletwa myone sungih fang cing thei pawl cun an fang cinmi an rial ih, dip khat ah thawng 40 in an zuar. Hmundang in fangfai lut pawl cu dip 1 ah ting 1 an ngen ih, cukhal lei ding a um nawn lo.

“A tufang Paletwa ah arti pumkhat thawngkhat a man. Datsi liter khatah thawng 7000 a thlengih cuti hman in lei ding a um lo. Kannih Paletwa cu Rakhine ramkulh Kyaukdaw khawpi in thilri ziangkim kan lalut. Asinan, tu ahcun kyaukdaw fehnak lamzin khar a si ih, thilri zianghman a lut thei lo a si,” tin a sim.

Paletwa peng sungah AA le ralhrang an kap aw theu ih, cumi ruangah ralhrang ralkap cun Paletwa in Rakhine ramkulh lam fehnak tipar lamzin cu August 1 in an rak phit zo ih, tuini tiang an ong hrih lo tin khuami pawl cun an sim.

Kalay Ih Bike Pah Aw Ah Pakhat A Thi – Sagaing ramthen Kalaymyo khawpi natchuang lamzin Aungziyah lamzin tawpnak ah saihtwe bike le bike dang pakhat an pah aw ih, a hmunah bike mawng pakhat a thi cih.

Buaipitu pakhat cun “August 11 zanlam ah saihtwe bike le bike dang pakhat an pah aw ih, Bike parih to pakhat a hmunah a thi cih. Midang pakhat khal a lu ah hriamhma a ngah ih, seherh umzet a si ruangah sizung fehpi hngal a si.

“Saihtwe mawngtu cu a hliam a bese tuk lo. Ziangtin an pah aw , ziangruangah timi cu felfaiten kan thei hrih lo. kannih cu an pahawk hnu lawngah thleng kan si,” tin a sim.

KIA In Pituhsit Sakhan An Urkang – Kachin ramkulh Phakan myone siaduzuat ( ရှဒူးဇွပ်ကျေးရွာ ) khua kiangih ralhrang sakhan le pituhsit sakhan cu August 11 zingah KIA in an kap ih, pituhsit sakhan sawn an urkang thluh tin KIA thuphuantu ralbawi Nawbu cun mipi a simthei.

KIA thuphuangtu ralbawi Nawbu cun “Pituhsit umnak Sanpia sakhan kan kap ih, kan urkang thluh tin kan ralkap pawl cun thuhla in simthei. Culo ralhrang sakhan ahcun an kap aw rero hrih ih, thuhla a fel thei hrih lo a si,” tin a sim.

Khuami pakhat cun “KIA pawl ih urkangmi pituhsit sakhan cu duhtawk in mipi tangka diltu an si ih, mipi hrang an rapthlak tuk. Doawk lai ihsin ralhrang hmunpi cun ralthuampi an kap ciamco ih,KIA pawl um nawn lo hnu khalah ralthuampi an kap bet. Pituhsit pawl cu Min Zin Thant ih hohami an si ih, ralhrang in rampi thuneihnak an lak hnuah lal duh ih cangvai an si.

“Doawknak ah KIA lam pakhat a thi tin kan thei ih, pituhsit lam khal thi an um nan, a zat kan fiah thei lo. Kan dung July 18 ah pituhsit pawl cun KIA sakhan an rak kap hmaisa. Cumi lai khalah kIA lam pahnih an rak thi. Tuitum ahcun KIA in pituhsit sakhan an urkang sak thluh a si,” tin RFA a simthei.

Hrantang Mipi 400 An Runsuak – Kachin ramkulh Phakan myone Sezin khua ih doawknak ruangah hrantang mipi 400 pawl cu August 11 zingah runsuah fel an si tin mibawmtu pawlkom cun thu an suah.

Mibawmtu sungtel pakhat cun “Tu ahcun khua sungah zohman an um nawn lo. Mipum 3000 hrawng an tlansuak thluh zo. Zianghman la ngah loih tlan an tam tikah bomnak pek an tul ngaingai. Ziangkim ah ngaihtuah sak tul hlir an si. Tuitum ahcun tlansuak thei lo, khua sungih hrantang pawl kan va phur ih, kan runsuak thluh zo a si,” tin a sim.

August 8 ah KIA le PDF tangtlang cun Sezin khua ih ralhrang ralkap sakhan le Shanni SNA sakhan an rak kap ih, ralhrang le Shanni pawl an rak tlan thluh. KIA le PDF cun ralhrang sakhan an la fel thei nan, a hnu reilo ah ralhrang pawl cun raldonak vanzam an hmang ciamco ih, doawknak a sosang.

Doawknak ruangah mipi lamin mi 5 an thi zo ih, Sezin khua in inn 400 tlun ralhrang pawlin an urkang zo. Tu khalah Sezin khua ahcun ralhrang ralkap le Shanni pawl an umlai. Sezin khua cu Sagaing ramthen le Kachin ramkulh ramri ih um a si ih, innkhi 600 hrawngah mipum 3000 tlun an si.

Sezin khuami pakhat cun “Kan inn urkang a si tikah kan ui tuk lawlaw. Ziangahtile, kum 15 sung harsa zetih kan ttuan hnuah kan sakmi a si ve. Tu khalah kan hruhmi thuanhnaw lawngin kan tlan ih, inn ah ziangkim kan tanta. Doawknak a cem tikah inn ah kan kirsal dingih , hahdamten kan um ding tin ruahsannak kan nei nan, tu ahcun a kangral thluh zo a si,” tin a sim.

Russia Vanzam Sakhan Puak Ah Vanzam 8 A Siat – August 9 ah Russia in 2014 kum ih Ukraine ram an rak laksakmi Crimea ramthen sungih um Russia vanzam sakhan a puak ciamco ih, vanzam tampi a siat phah tin Satellite ih zuktu pawl cun an sim.

Russia vanzam sakhan puak ruangah mi pakhat a thi tin Russia lam cun thu an rak suah nan, vanzam siat thuhla mipi an rak theihter duh lo. Satellite ih zuktu pawl cun Russia vanzam sakhan puak ruangah vanzam 8 hrawng a siat tin an tarlang.

Russia lam cun thil an retkhawmnak hmunin puak a suak tin an sim. Leitlun cun Ukraine lam cangaihnak si ding an tinan, Ukraine in Russia vanzam sakhan puak thu thawn pehpar aw in ziangthu hman an suah lo. Asinan, Ukraine president Zelenskyi cun buainak reh dingin Russia lam kan tuarter ve a tul tin Russia vanzam sakhan a puak hlanah a rak tongsuak.

Crimea ramthen cu a hlanah Ukraine ramsung ih um a si ringring nan, 2014 kum ah Russia in ralthuam hmangin an rak laksakmi a si.