Paletwa Ah Khawlal Le Mi 2 An Kai

Chin ramkulh paletwa peng sungih AA le ralhrang an doawk hnuah ralhrang cun Paletwa peng sungin khawlal pakhat le mi 2 an kai ih,an hruai. Ralhrang ralkap le AA cu may 26 lamah rak do aw an si.

Khuami pakhat cun “AA le ralhrang doawknak kiangte ih khua ah ralhrang pawl an lut ih, khua sungin mi 5 an hruaisuak. Ralhrang in mi 5 an hruai suahmi lakin mi pahnih cu an thlah kirsal. Midang pathum cu ralhrang ralkap in a kol hrih.

“Ralhrang in an kaihmi pawl khawiah an ret, ziangtin an tuah timi cu tuini tiang kan thei hrih lo ih, an sungte pawl cu an thinhar ngaingai. Ralhrang ih kaihmi pawl cu khawlal Kyar Htun Aung, U Chit San le U Kyar Aung pawl an si. Ziangruangah an kai timi a san khal kan thei lo,” tin a sim.

Ralhrang thuphuangtu Zaw Min Tun cun “Paletwa peng sungih kan ralkap hmun cun ukawknak fehpimi an nei ih, culai fangah AA lamin bomb an puah. Cumi ruangah kan ralkap lakin thi le hriam ngah an um. Curuangah, AA cu nasa ten ralrinnak kan pe zo a si,” tin media a sim ve.

Zaw Min Tun cun Paletwa peng sungih AA thawn an doawknak ah an ralkap ziangzat ciah an thi timi a zat cu a rel duh lo. AA le ralhrang karlak boruak a that lo ruangah Paletwa mipi pawl cu an thinphang tukih, a hlan bangin ziangkim ah an harsat thluh ding an phang.

May 26 hnu ahcun AA le ralhrang an doawk thu theih bet a si hrih nawn lo ih, hmailam ah ziang an bang vivo ding tikhal rel theih a si hrih lo. Tuhrih ahcun an karlak boruak a sia ih, tongkam in khat le khat an puh aw rero a si hrih.

Ralhrang In Chin Mino An Kai – Ralhrang ralkap cun Chin mino pakhat cu meithal na zukpi timen in an kai ih ,CDF na si tin an puh bet.

June 1 ah, Chin ramkulh Hakha khawpi in Yangon ih feh tum Hakha Man Mawtaw cu Hakha a suahsan ding zawngah ralhrang pawlin an cek ih, a sungih to lakin Salai Ngun Sui Thang ih phone sungah meithal thawn a zukawkmi zuk an hmu.

Curuangah, Salai Ngun Sui Thang cu ralhrang pawlin an kai ih, CDF na si tin an puh. Hivek in zuk ruangah ralhrang ralkap cun hakha Check Gate in mikaihmi tampi an nei zo.

Curuangah ramsung um hrang khuatlawn ding tikah phone thianfai hmaisa a tul ringring ih, dothlengnak zuk, meithal kenglai zuk , ralhrang dokalhnak zuk tivek hrimhrim cu phone sungah ret lo a him bik. Cucu, a tufang ram sung um hrang khualtlawn tikah theih tha a si.