Pathian In Mipi Ralkap Pawl A Hum, Ralhrang 30 An Thi – Chin miphun humhimtu CNDF cun ni 5 sung ralhrang ralkap thawn an doawknak thuhla mipi theihternak an nei ih, ni 5 sung doawknak ah ralhrang 30 tlun an thi tin thu an suah tlunah ralhrang an do lai ih Pathian humhimnak maksak khal mipi an simthei. A tawp thleng rak ngai awla, Pathian in ziangtluk in Chin ralkap pawl a hum timi anmai relsuakmi tarlang a si.
CNDF cun “2022 kum, November 15 ni, zinglam nazi (5:30) hrawng ihsin kannih Chin National Defence Force (CNDF) cun Falam peng Tibual ralhrang camp la dingin kan kap thok ih ralhrang lamin pukpi thawn in rak kap ve ruangah nazi 3 sung khat le khat nasa tein kan kap aw. Ralhrang lam an tuar deuh ruangah zinglam nazi (9:00) kiangkap ah Jet Fighter thawn vei (3) an ra zam ih bomb vei tampi in thlakih, in do ciamco. Cuini thotho zanlam nazi (6:00) kiangkap ah Jet Fighter thawn avei 4 nak in ra kap bet sal. Bomb vei hnih in ra kapih avei hnihnak ah anmai camp kiangah an bomb kahmi a tla puak ih an camp ih inn 2 a kang. A ni khatnak doawknak ah ralhrang lam 8 hrawng an thi. Kanmah CNO/CNDF lam ihsin (2) in hriamhma an ngah. ZFU/PDF-Zoland, CDF CDM Siyin le Chinram dothlengnak ralthuamkai kawmkhawm CJDC khalin in ra bawm.
“2022 kum, November (16) ni, zinglam ah veikhat, zanlam nazi (2:00) ah veikhat tin ralhrang thawn nasa zetin kan doaw sal ih ralhrang lam an tuar deuh ruangah zanlam nazi (2:55) hrawngah raldonak ih hmanmi MI-35 Helicopter thawn minute 20 sung ralhrang cun in ra kap sal. A nihnih ni doawknak ah ralhrang lam 5 an thi ih hriamhma tuar tampi an um. Kanmah CNO/CNDF lam ihsin hriamhma ngah kan um lo. Cui’ zan thotho ah CNDF vakok le CDF-KKG tangtlang in ralhrang pawl an va kap ih ralkap pakhat a thi ih pakhat in hriamhma nazet a tuar.
“2022 kum, November (17) ni, zinglam nazi 9:30 le zanlam nazi 2:00 ah ralthuampi thawn kan kap aw sal ih zanlam nazi (3:45) ah raldonak ih hmanmi MI-35 thawn minute 45 sung ralhrang pawlin in ra kap sal. Cumi zan ah kan lamtang MEDF in drone thawn bomb tampi in thlak bawm. A ni thumnak ni ih doawknak ah ralhrang lam 6 an thi ih hriamhma ngahtu tampi an um. Kanmah CNO/CNDF lam ihsin mipi ralkap 1 in hriamhma (bese lo) a ngah.
“2022 kum, November (18) ni, a ni linak zinglam khuavan zawngah kanmah lam CNDF in ralhrang camp kan va do sal ih ralhrang lam in pukpi thawn vei tampi in rak kap ve. Cuini ah kan ral ralhrang lam 4 an thi ih kanmah CNO/CNDF lam ihsin mipi ralkap pakhat cun 60mm bomb puak themih ngah ruangah hriamhma (bese lo) a ngah. Tuini 2022 kum, November (19) ni, zinglam nazi (5:00) ihsi thokin Tibual camp la thei dingah kanmah CNDF lam in kan kapsal ih ralhrang cun an camp humnak ah Jet fighter 2, raldonak helicopter 5 thawn zinglam nazi (10:00) ihsin zanlam nazi (1:00) luan tiang cat loin in kap. Tuini doawknak ah CDF-Lautu lam khalin in rak bawm ve. Tibual camp ah ralhrang cun thazang ret betnak khal a nei ih hriamhma tuar ralkap pawl le a thimi ralhrang ruak pawl cu Kalay myoe Siizungpi ah an phur tiah thu kan dong. Zanlam nazi (5:00) kiangkap khalah kanmah CNDF in ralhrang pawl ih ralkap thazang rak retbetmi ralhrang thlengthar pawl cu Tibual camp kiang, Bualte khua ah rinlopin kan kap, kan do ih khat le khat nazi 1 sung kan kap aw. Cumi ahcun ralhrang lam ihsin a malbik 6 an thi. Cui hnu zanlam nazi (6:30) ihsin ralhrang lamin Bualte khua sungih mipi inn pawl an ur thok.
Tuitum doawknak ni 5 sungah kanmah lam ihsin Drone thawn bomb vei (300) luan kan thlak thei ih ralhrang lam ihsin a malbik ralhrang 30 luan an thi. Cui’ a thimi lakah ralhrang bawi officer cin lam khal an tel. November 20, zinglam nazi 10 khalah ralhrang ralkap Helicopter pahnih cun tikhual sakhan ah eiin le ralthuam mipum an ret bet. Zinglam nazi 10:30 hrawng ahcun raldonak ih hmanmi MI 35 cun tlunsangin in kap. Zinglam nazi 11:20 hrawng khalah raldonak ih hmanmi Helicopter cun Tibual sakhan ih ralhrang pawl eiin a pe. Zinglam nazi 11:38 hrang ahcun kan Sniper kapthiam pawlin ralhrang 2 an kap that ih, cerek 200 hrawng kan laksak thei. Kannih CNDF lam kan him a si,” tin CNDF cun ralhrang ralkap thawn an doawknak thuhla cu mipi theihternak an nei.
CNO CNDF hotu cun “A thok ahcun Tibual ralhrang sakhan ah ralhrang 14 hrawng lawng an um tin thu a suak ih, cuzat lawng um dingah kan rak ruat ve. Asinan, sakhan kan kap taktak tikah ralhrang 34 an rak um. Sakhan sungih ralhrang khal kan kap that. Ralhrang 34 an um tlunah ralhrang pawl cun vanzam le Helicopter in ralthuam le ralhrang mipum dang an ret ciamco.
“Ni 5 sung doawknak ah ralhrang 30 tlun an thi tin kan hmainor pawlin an fiah thei. Thenkhat ralhrang thi cu tibual sakhan bawm dingih feh ralhrang thleng thar pawl khal an si. Curuangah mipi thenkhat in tibual ralhrang sakhan ah ralhrang an mal tukih, thi 30 tlun an um thei lo tin an rel. Cupawl cun thuhla an theihfeng lo ruangah a si. A taktak ahcun tibual ralhrang sakhan ah ralhrang 30 tlun an rak um cia ih, ralhrang dang thleng bet rero an um.
“Tibual ralhrang sakhan umnak cu a rem tuk lawmmam ih, meithal thawn luhcilh ih do vutvo theih a silo. Drone kan hmang tangkai bikih drone ah bomb ret in tibual sakhan cu bomb in kan thlak ciamco. Ralhrang lam cun tibual an sakhan ah ralthuampi phunphun an rak ret cia thluh zo ih, ralthuampi cun in kap ciamco. A hnuah raldonak vanzam le raldonak Helicopter an hmang bet cu kan mipi ralkap pawl an thi thluh dingah kan ruat.
“Asinan, mangbangza rori a si ih, mipi thlacamnak le Pathian kan lamih a ttan ruangah kan him. Kan mipi ralkap kiangte ah ralthuampi a tla , a puak thei lo, kan mipi ralkap kiang thingkung ah ralthuampi cerek a phun aw curci nan, a puak thei lo tivekin kan mipi ralkap tampi an him. Ralhrang in bomb an thlaknak le ralthuampi a kahnak hmun pawl cu a fai lengleng thluh rori. Cuvek lakah mipi ralkap pawl kan him timi cu mipi pawl thlacamsaknak ruangah Pathian humhimnak rori a si. Tuitumah ralthuam tampi kan hmangih ralthuam lam tampi kan tul.
“Curuangah hmun tinkim ih um mipi pawl dothlengnak ah a phunphun in kan tel thei thluh ih, kan ram zalennak dingah le ralhrang uknak kan do cimit theinak dingah kan tlintawk sumpai thawn tel cio uhsi. Hmuntin ramtin ih um mipi pawl in bawm hrih hram uh,” tin CNO CNDF hotu cun Vapual Auaw a sim.
Chin ramkulh Hakha le Thantlang karlak lakah mipi ralkap pawl cun ralhrang ralkap an do peh rero ih, Hakha le Thantlang karlak ih doawknak ah ralhrang lam cun Helicopter an hmang phah. Culawng siloin ralhrang ralkap cun Thantlang khua pawn ih um Chin ralkap CNA hmunpi Camp Victoria khal Helicopter in a hel ih, a helsuak hnuah a fehsan sal. Kan dung zarh khalah ralhrang cun tlunzuang in CNA hmunpi an rak hel zo. Ralhrang in duhtawk in Chin ramkulh sungih raldonak tlunzuang an hman rero tlunah ralhrang ih ruatmi Chin ramkulh uktu Dr.Vungh Suan Thang cun Helicopter in Falam ,Paletwa le Matupi pawl cu November 16 in 18 tiang a tlawngih Chin ramkulh sung tlawn peh vivo a tum. Falam a thlen ttumah Surbung airport on an tum thu, Airport on fel a si tikah khualtlawng sukso phur vanzam a zam cih ding thu pawl a sim ih, Chin ramkulh sung tlawng kual vivo dingin Vung Suan Thang cun Helicopter pakhat pe dingah ralhrang pawl a dil bet.
Chin ralkap pakhat cun “Ralhrang in Chin ralkap pawl a do daan cu a rapthlak lawlaw. Falam peng sung doawknak ah tlunzuang 7 rori an hmangih hivek cu hmundang ah theih ding a um dah lo. Ralhrang in KNU le KIA an do khalah veikhat hmanah tlunzuang 7 tivek an hmang dah lo. Tuitum cu nasaten rori in Chinram an nuai nan, mipi ralkap lam an him thotho cu Pathian umpinak rori a si,” tin a sim.
Hivek in Chin ramkulh sung a buai tuk ruangah Hakha ih kawhhran pawlkom le Falam ih Kawhhran pawlkom pawl cun tuikum Chirtsmas khal lamzin cei lo dingin, zanah khawm lo dingin, inn hal lo dingin le hlunghlai zetih puai tuah lo dingin mipi theihternak an nei ih, zan sim hnu Christmah le Kum thar puai tuah lo dingin mipi an sawm.
Palik Lem An Hmang – Makui ramthen Pwint Phyu ih palik sakhan ah palik thar an la thei nawn lo ih, dutytu dingah palik lem an sang cop tin a kiangih um pawl cun an sim.
A kiangih um pakhat cun “Felfai zetin kan thei, palik thar an lak luh thei nawn lo ruangah remcang in a kiangih um pawl cu sumpai ih an sangih, an duty. Tlunlam hnenah palik thar pe bet dingin an dil rero nan, tlunlam in palik thar an pek bet thei lo tikah a kiangih minung pawl sumpai ih an sang.
“Curuangah palik pawl cu fawm hruh loin an umsawn ih, an sanmi pawl in fawm hruh in an duty. Sanmi pawl cu nica hlawh nei in an hmang. Palik pawl cun phun 8 ong khal palik an lut thei tin thu an suah rero nan, lut duh an um lo. A hlan ahcun phun 10 ong tal tin palik an rak la. Tuih an sanmi pawl khal Pyu Saw Htee pawl an si,” tin a sim.
NUG In Ram 8 Zung An Ong – Politics in ralhrang ralkap do rerotu NUG cun theitawk in ramleng ah zung an ong bet vivo ih, tu ahcun ram 8 ah zung an ong thei thlang.
NUG ih zung on netabikmi cu US cozah hmunpi Washington DC ah a si ih, US president umnak innrangpi thawn peng hrek tluk lawng a hla aw. A hlanah NUG cun UK, Australia, France, South Korea, Japan , Czech le Norway pawlah zung an rak ong zo.
NUG in zung an on theinak ram pawlah nasaten ttan lak vivo an tum ih, ramleng dinhmun kaih vivo an tum. Curuangah ralhrang cun NUG ih zung on theinak ram pawl cu nasaten an rak mawhthluk ve.
2022 FIFA World Cup An Thok – November 20, zarhpi zan ah 2022 FIFA World Cup lek thok a si ih, Group A in inntek Qatar le Ecuador an lek hmaisabik.
Team hminthang silo khal sehla World Cup thoknak puai a si tikah mipi an phur ih a hmunih zohtu khal an tam. Puai an thok hnu minute 3 ah Ecuardor Captain Valencia cun a lu in a sawh nan,VAR zohdik a si tikah offside tin a goal pomsak a silo. Asinan, minute 16 ah Ecuardor cun penalty an ngah ih, Captain Valencia cun Ecuador hrang a sit goal. Minute 31 ah Ecuardor captain Valencia cun Ecuador hrang a lu in a sawh goal betih, Eucuardor cun 2 in Inntek Qatar an neh.
Caan hrek hmaisa sawn ah goal dang a lut nawn lo ih cawlh an hmang. Caan hrek neta sawn khalah goal dang a lut bet nawn cuang lo ih, Ecuador cun 2 in nehnak an co lanta ih hmat 3 an ngah.
Tuini November 21 ah World Cup lek ding puai 3 a um. Myanmar caan zan nazi 7:30 ah England le Iran, Zan nazi 10:30 ah Netherlands le Senegal, Zanlai nazi 1:30 ah USA le Wales pawl a lek ding a si.
Leave a Reply