Ralhrang ralkap cun July 2, zinglam nazi 11 hrawngah Mindat peng sungin khua pahnih cu raldonak vanzam thawn bomb an thlak ciamco ih, inn tampi a siat tlunah mipi 2 an thih phah. Bomb puah tuar Mindat mipi cu tih le khur in an relh ih, ralhrang in ziangtin bomb an thlak timi cu mipi simfiangnak an nei.
Bomb puah tuar Mindat mipi lakin mi pakhat cun “Zinglam kan tho ih, mino rual thawn saam 91 siar in caan kan hman thluh hnuah thawhhlam kan ei. Zinglam nazi 11:12 hrawng ahcun puak awn ring tuk kan thei ih, kan umnak cu a hnin thluh. Meisa cet awn le kiangkap tap thawn aihramnak hlir kan thei. Zocio khal kan himnak ruatin hmunhim ih kan ruahnak hmun cu kan pan ih ,kan tlan thluh.
“Micet kan phit ih, kiangkap kan zoh tikah thihnai thawn fale pom ih tlan, khawihmun ka feh ding ti thei lo ih, tlan in an khat. Zamrangten hriamhma ngah pawl kan hawl ih, mawtaw mawngtu kan phone hnuah sibawi khal kan phone cih. Minute 10 hrawng a rei hnuah puak awn kan theisal ih, a himnak hmunah relh cio dingin kan au ciamco.
“Leihnuai relhnak hmun pakhat ahcun upa nauhak ti loin thinphang, tih le khur in kan umkhawm ih, lenglam ih puak awn kan thei peh rero. Nauhak pawl tih le khur in an tap. Ralhrang pawl cun vanzam in bomb 10 tluk kan khua ah an thlak ih, an zamhlo sal.
“Ralhrang pawl an zamsal hnuah kan relhnak hmunin kan suak ih, ralhrang ih bomb siatmi pawl cu kan zohfel. Hmunram thianfainak kan neih tikah bomb ih ngahmi nauhak, bomb ih tlakthatmi nauhak tivek kan hmu ih, kan thinheng , kan tuarna tuk lawlaw a si,” tin a sim.
Ralhrang in bomb an thlak tumnak khua pahnih cu a hlankhan ihsin zohfelnak an rak nei thup cia ih, doawknak zianghman um lo cingin vanzam thawn bomb an va thlakmi a si tin CDF Mindat cun thu an suah.
Ralhrang In Thantlang Khua Upa Pawl An Bia – Chin ramkulh Thantlang khawpi rem thatsal ding thuhla ah ralhrang ralkap cun June 30 ah Thantlang khua upa pawl an rak ko ih, thu an relpi.
Hivek in thu a suah tikah raltlan Thantlang mipi le Chin mipi tamsawn cu ralhrang thurelpitu Thantlang khua upa pawl parah an thinheng tuk ih, an mawhthluk rero. Thantlang CDF khalin buainak ding zianghman aum nawn lo, a him rori a si timi ralhrang lamin an rel thei lawngah mipi tlung haiseh tin thu an rak suah ve.
Mipi lamin auaw a tam tuk tikah raltlang thurelpitu Thantlang khua upa pawl cun ziangruangah ralhrang thu an relpi timi mipi simfiangnak an nei.
Thantlang upa pawl cun “Hakha ih um Thantlang upa pawl phone call kan dongih, tonkhawmawknak a um ding thu in sim. Ziang thuhla kan rel ding timi kan thei cia lo ih,an tinak hmun ahcun kan feh. A hmun kan thlen tikah ralhrnag hnuai ih Chin ramkulh uktu pawl le tuanvo neitu midang pawl an rak um.
“Kan mangbang tuk nan, kan tonawknak san ca an suah tikah Thantlang khawpi remthat sal dan ding thu timi an tarlang ih, cutin kannih khalin kan tonawknak san kan fiang ve. A hmunah tuanvo neitu lamin thil umdan an fel hmaisa ih, cumi hnuah kannih Thantlang khua upa pawl khal thurelnak caan in pe.
“Tuhrih ahcun olsamten Thantlang khawpi dinsuak sal ding vekin relmi le remnak zianghman kan nei hrih lo. Thantlang khawpi dinsal dingin tulsammi tampi a um thu kan rel. Kanmah in ralhrang pawl thu kan relpi siloin anmah ralhrang pawl sawn in Thantlang khawpi dinsal an tummi thurelnak ah in sawm ih , rak tel kan si,” tin a sim.
Ralhrang In Falam Ah Rualban Lo 2 An That – Chin ramkulh Falam peng Valung khua le Hlanzawl khua ah ralhrang ralkap cun mibanglo 2 an kaih hnuah an that.
Kalaymyo in suak ralhrang ralkap pawl cu June 30 zan ah Valung an riak ih, Valung khua in mibanglo pitar Pi Tial Kap an kaih hnuah an that ih, July 3 lawngah khuami pawlin a ruang an sar. A ruangah meithal ih kahnak hriamhma a um.
July 2 khalah ralhrang ralkap pawl cun Hlanzawl khua ih um taksa hnuailam thi zo mi pakhat an kaih hnuah an hrem ciamco ih, an that tin khuami pawl cun an sim. Ralhrang ralkap pawl cu Falam peng parte khua in an suak zo ih, Falam khawpi an pan tin khuami pawl cun an sim.
Chin miphun humhimtu CNDF cun ralhrang pawl ruangah Kalay le Falam zin zawh hrih lo dingin Chin mipi an rak simthei rero zo. Ziangahtile, ralhrang pawl cu minung thinlung pu loin ramsa thinlung an put tikah lamzin ih an tonmi pohpoh an that men a si tin an tarlang.
KNU In Ralhrang Sakhan 5 An La – Pago ramthen Ngio Lay Pin District Mung myone sungih ralhrang ralkap sakhan 5 pawl cu July 2, zinglam nazi 4:45 hrawngah KNU ralkap pawl in a rualin an do ih, ralhrang sakhan 5 an lakfel thu mipi an theihter.
KNU ih ralhrang sakhan 5 an lakmi pawl cu ကြောင်ပြာစခန်း၊ အောင်းလောင်းစိန်စခန်း၊ ကျွန်းပင်ဆိပ်စခန်း၊ ကော့ပြင်းစခန်း နှင့် ကျောင်းစုစခန်း pawl an si. KNU ralkap KNLA pawlin ralhrang sakhan 5 an lakmi ahcun ralhrang tatyin-hmu telin ralhrang lam 4 an thi ih, ralhrang in vanzam in bomb an thlak ciamco tikah mipi 4 an thi ve tin an thusuah ahcun an tarlang tel.
KNU in ralhrang sakhan 5 an lak felmi pawl an cek rero laiah ralhrang lamin raldonak vanzam an hmangih, duh vekin cek thei loin an um. An cek fel cin ahcun meithal zun 8 an ngah ih, ralhrang thi 4 hnakin an tam thei tin an sim.
Ralhrang lamin an sakhan luahsal tumin raldonak vanzam an hman tlunah leihnuai ralkap khal an kuat bet rero ih, sakhan 5 kiangkap ahcun doawknak a sosang peh hrih. Doawknak a sosan lai ruangah thuhla um peh khal an than thei hrih lo ih, boruak a that tikah mipi simtheih leh an tum. KNU lamin ralhrang sakhan 5 pawl cu dik lo tukin mipi an cek theu ruangah kap an si thu an tarlang.
China Palai le Ralhrang Palai An Tongaw – Mekhaung tivapi thawn pehpar aw in ram 6 pawl meeting an neihnak ah China palai le ralhrang palai cu a hranten an tongaw ih,ziangtin sum tuahtlangnak kan nei vivo ding timi an rel.
Mekhuang tivapi thawn pehpar aw in ram 6 pawl cu Pagan ah meeting nei an si ih, meeting ahcun Myanmar, China, Laos, Thailand, Cambodia le Vietnam ram pawl an tel. An rel bikmi cu Mekhuang tiva thawn pehpar aw in sum tuah dan ding a si.
Mekhuang tivapi cu ram 6 ah a luang vivo ih,ram tin cun meisa tha tuahnak ah an rak hmang tangkai thluh. Ahleice in China lamah China cun mekhuang tiva tluanah meisa cet 10 an tuah zo. Hivek ruangah tiva tluanih um Myanmar rammi pawl cun tidai feh dan kel a awh nawn lo ih, boruak a siat phah tikah kan hrang a him lo tin an sim ve.
Leave a Reply