Ralhrang In CDF Sakhan Pakhat An La

Chin ramkulh thlanglam Kanpetlet peng sungih CDF kanpetlet tatyin 2-nak sakhan cu June 9 le 10 ah ralhrang ralkap pawlin nasa ten an do ih, ralthuam le mipum thlauawk tuk ruangah CDF kanpetlet cun an sakhan pakhat cu an suahsan ih, ralhrang pawlin an laksak.

CDF Kanpetlet cun “June 9 ih doawknak ah ralhrang pawl an tuarna tukih, June 10 ah CDF kanpetlet tatyin 2 umnak lam cu ralhrang ralkap in thazang tampi thawn in do. Kannih CDF Kanpetlet le kan tuanpi pawl khal in nasa ten ralhrang ralkap kan rak do ve.

Zinglam nazi 7 in 9 tiang hmaisa sawn kan do aw ih, zanlam nazi 1:15 in nazi 4 tiang vei hnihnak kan do awsal. Vei hnih kan doawknak ahcun ralhrang ralhrang 15 hrawng an thi ih, ralhrang 30 hrawng hriam an ngah. Kannih lam khalin hriam ngah 2 an um.

“Ralhrang pawl an tuarnat tikah Kyauk Htuh ih ralhrang hmunpi le Mindat ih ralhrang hmunpi cun ralhtuampi thawn in kap ciamco. Tulai boruak a sia ih, nikhua a tha lo tuk nan, ralhrang ralkap in duhtawk in ralthuampi an kah ciamco ruangah kiangkap khua mipi pawl cu hramlak ah an tlan thluh.

“Ralthuam le mipum thlauawk tuk ruangah Kannih CDF Kanpetlet le kan tuanpi pawl cun kan tatyin 2-nak kan suahsan. Hivek a si tikah doawknak a sosang sinsin thei in a langih, mipi in Kanpetlet CDF in bawm vivo hrih dingin kan lo sawm a si,” tin thu an suah.