Ralhrang In Chinram CM Thar An Ruat – Ralhrang ralkap cun Chin ramkulh CM ih an rak retmi Ngun San Aung cu August 19 ah a hna in an cawlter ih, Chin ramkulh CM thar ah Dr.Vung Suan Thang an ruat.
Ralhrang ralkap cun “Chin ramkulh CM Pu Ngun San Aung cu a hna in cawlh theinak kan pe ih, rampi dan vekin Pu Vung Suan Thang cu Chin ramkulh CM thar ah ruat a si,” tin thu an suah.
Dr.Vung Suan Thang cu 1959 kum ah Tedim peng Ngennung khua ah a suak ih,Chin ramkulh Hakha khawpi ah hramthok le laitlak tlawng a kai. Yangon ah phun 10 kai ih kungthu bata 4 in a rak ong. Cumi hnuah sii tlawngih zirsuak a si ih, ralkap sibawi in cawl zo ,tu khalah a sungte pawl cu Yangon mayankung myone ralhrang hmunah um hrih an si.
Ralkap sibawi in cawl zo Dr.Vung Suan Thang cun ,2015 kum rampi hrilawknak ah USDP party dinhmun in Tedim pengah a rak cuh ve nan, a sung. Cumi hnuah hrilawknak ih a telsal thu theih bet a si nawn lo ih, pawlkom tivek ahcun cangvaihnak a nei phah. Ralhrang ralkap cun August 19 ihsin Chin ramkulh Chief Minister ah Dr.Vung Suan Thang an ruat fel tin mipi an theihter.
Pu Ngun San Aung cun kum 1 le thla 6 sung Chin ramkulh CM a rak tuan man ih, amai duh thu ih bang siloin a hnatuan dan ah ralhrang lam an lungkim lo ih, Dr.Vung Suan Thang thawn an thleng tin thu a suak.
Ralhrang ralkap in rampi thuneihnak an lak hnu 2021 February 2 ah Chin ramkulh CM hrang Pu Sanmawi Nikhuai ( Falam ) an rak ruat ih, 2021, February 11 zingah Pu Sanmawi Nikhuai cu lung natnak in a rak thi. Cumi ruangah ralhrang cun Pu Sanmawi Nikhuai aiawh ah an kuthnuai vuanci pakhat dinhmun hnatuan cia Pu Ngun San Aung cu Chin ramkulh CM ah a rak ret.
Tu ahcun Pu Ngun San Aung cu ralhrang lamin an duhkhop lo ruangah a hna in an cawlter ih, a aiah Dr.Vung Suan Thang an ret fel zo. Hitin ralhrang ralkap in rampi thuneihnak an lak hnuah Chin ramkulh CM hrang mi 3 an ruat man zo ih, Dr.Vung Suan Thang teh ziangtik tiang a ttuan thei ding timi cu theih a si hrih lo.
Taiwan An Zalen Cun Leitlun A Buai Ding Titu China – US, Taiwan le China ram pawl buainak ah China lam an sosang deuhdeuh ih, leitlun ram pakhat khatin Taiwan zalennak an pe asile leitlun ralpi a tho ding tin China lam cun thu an suah.
China palai cun “Taiwan thuhla ah USA le UK an tel pang asile leitlun in an hmuh dah lomi doawknak picang a suak cih ding. US cun Taiwan hmangin mi an tibuai rero. One China timi kan pom ko an tinan, Taiwan hnenah ralthuam an zuar rero ih, kanmah China le Taiwan buai dingin Taiwan lam taw an tawk. Cuvek thotho in UK khal US dungthlun in an cangvai. US House Speaker Nancy in Taiwan a tlawn thu ah UK cun an rak dinpi ih, thiltha lo tuk a si,” tin China palai cun an sim.
Ukraine le Russia buainak ahcun Indonesia in remnak tuah an rak tum ve. G20 meeting ah Indonesia cun China le Russia an tel ve ding thu an sim ih, Russia president Putin le Ukraine president Zelenskyi khal hmaiton in veikhat hman be aw hrih lo an si ruangah, be aw thei sehla a tha tuk ding tin Indonesia lam cun an sim. Tuhrih ahcun ram pahnih president tongaw dingin Russia le Ukrine lamih rem tinak a um hrih lo.
Leave a Reply