Chin ramkulh Falam in Hakha ih feh ralhrang ralkap pawl cu July 14, zanlam ah Hakha peng Chuncung khua an lut thokih, Chuncung khua in inn hrekkhat an urkang.
Ralhrang ralkap pawl cu Chin ralkap komkhawm in lamzin tluanah an do ih, Chuncung le Dokthek khua karlak khalah Chin ralkap komkhawm in nasaten ralhrang ralkap pawl an do. Asinan, Hakha ih ralhrang hmunpi cun Chuncung kiangih ralhrang pawl bawm in lamzin sialnak hrang Chincung lamah ralthuampi an kap ciamco ih, ralhrang pawl cu Chuncung khua an lut thei zo.
Raltlan pakhat cun “Ralhrang pawl Falam in Hakha an pan ti kan theih veten kannih khuami pawl cu khua ah um ngam loin hmunhim ih kan ruahnak hmunah kan relh. Ralhrang pawl kan khua ih an thlen hlan ahcun kan khua cu kan hal ringring ko. Asinan, kan khua naivai ih ralhrang an thlen hnu cun khuasung ah kan lut ngam nawn lo.
“Tu cun ralhrang pawl Chuncung khuasung an lut fel zo ih inn hrekkhat an urkang. Ralhrang in Chuncung khua in inn ziangzat ciah an urkang timi cu khuasung kan feh thei hrih lo ruangah kan fiah thei hrih lo. Khuasung ah mipi thilri duhduh an ru ih, an ei an cen. Ralhrang pawl khua an suahsan hnu lawngah khua dinhmun felfai kan theifang ding a si,” tin a sim.
Ralhrang ralkap pawl cun July 7 ah Falam suahsan in Hakha an rak pan ih, July 8 in Chin ralkap komkhawm pawl thawn lamzin tluanah an do aw thok. Zarhkhat sung ralhrang ralkap le Chin ralkap komkhawm doawknak ah ralhrang 50 tlun an thi zo tin Chin ralkap komkhawm lam cun an sim.
Mipum le ralthuam ih an thlauaw tuk ruangah Chin ralkap komkhawm cun ralhrang ralkap pawl cu bomb puah in an do thlangpi ih, bomb an puah fuh tikah ralhrang thi an tam. Chin ralkap komkhawm cun bomb puah rori lawng siloin a remcan dan in rinlopral ah ralhrang do fukfi caan khal an nei ih, an him thei dan ding cu thupi bikah retin ralhrang ralkap pawl an do.
Kalay Khawpi Sungah An Kap Aw – Sagaing ramthen Kalaymyo khua sungih um mipi cun July 14, zan nazi 6 in nazi 8 tiang puak awn phunphun an thei ih, a hlan hnakin puak awn pawl an ring ih, tih a nung tin an sim.
Tahan ih um pakhat cun “A thok ahcun Tahan Nicia Taih lamzin hrawngin puak awn kan thei hmaisa bikih, cumi hnuah Tahan rittheihsi kilvennak palik sakhan lamin puak awn kan thei bet. Mipi ralkap lamin ralhrang pawl umhmun khuarnak an kapin a lang. Cutikah ralhrang pawl cun duhtawk in ralthuampi an kap ciamco ih, inn hrekkhat a tlaksiat ngahmi khal an um.
“Zan sim hnu a si tikah kannih mipi cun kahawknak hmunhma pawl kan zohfel ngam lo ih, kan innsung ciar ah kan relh. Doawknak thuhla cipciar cu mipi ralkap lamin an phuang leh ko ding. Tuitum cu a puak ring tuk lawmmam ih ,mipi lamin kan tih thu kan sim tikah rak hua siang hlah uh, a hmunih um hrang ahcun tih a nung tuk ko a si,” tin a sim.
Ralhrang 8 An Thi ih, Ralthuam Tampi An Laksak – Karen ramkulh Myawaddy myone Wawlay hmunram ih doawknak ah ralhrang 8 an thi ih, ralthuam tampi kan laksak thei tin KNU ralkap burkhat Cobra cun mipi hmuh ah an pholang.
KNU ralkap Cobra cun “Doawknak ih dungsip ralhrang ralkap pawl cu July 13 ah lamlak in kan rak bawh ih , kan kap. Lamlak ih ralhrang kan kahmi ahcun ralhrang bawi telin ralhrang 8 an thi ih, hriamhma ngah tampi an um. Doawknak ahcun kannih lamin miraltha pakhat hriamhma a ngah ve.
“Doawknak hmunram thianfainak kan neih tikah meithal zun 4, kutden bomb 3, bomb dang 2,cerek le ralthuam dang phunphun kan la ngah. July 14 ah doawknak hmunram thianfainak kan nei peh ih, Cerek, kutden bomb 13, palpuah bomb 12, meithal zun 12,RPG 7 le ralthuam dangdang kan la ngah bet.
“Hmundang ih ralhrang kan rak donak hmun khal thianfainak kan nei cih lawlaw ih, cerek, meithal 3,palpuah bomb 3 le ralthuam dang neuhneuh kan la ngah bet. kannih cun ralhrang dungsip pawl kan dawi vivo dingih hmunram thianfainak kan nei peh vivo ding. Curuangah ralhrang lakin kan lamtang duh pawl cu sangka kan ong ringring a si,” tin thu an suah.
Ralhrang An kaihmi 5 An Pholang – Sagaing ramthen Bamauk myone ih ralhrang an kaihmi 5 pawl cu mipi hmuhah PDF lamin an pholang. Ralhrang an kaihmi an pholang thu ah Bamuak PDF cun mipi simfiangnak an nei.
Bamuak PDF cun “June 28 le 29 lamih thilthleng a si ih, cumi lai caan khalah mipi theihternak kan rak nei zo. Asinan, kan himnak ruatin ralhrang kan kaihmi 5 pawl cu kan pholang lo ih, a thulawng in mipi kan rak theihter.
“Ziangahtile, doawknak thuhla siseh ralhrang kan kaihmi pawl khal a ni rori ih pholang remlo caan tampi a um. Pakhatnak ahcun doawknak lai a si ruangah kanmah kan him lo phah thei ih, thil a fehsual thei. Cumi ruangah doawknak zuk siseh, ralhrang thi tivek khal pholang lo caan tampi kan nei.
“Tu ahcun mi hrekkhat in kan thusuahmi zum lo vekin an um ruangah ralhrang kan kaihmi pawl cu kan pholang. Doawknak ah ralhrang 5 an rak thi ih, ralhrang 5 nungdam in kan rak kai. Kaihmi pawl cu leitlun ralkap dan vekin thaten kan ret hrih ko a si,” tin mipi an simfiang.
Ralhrang In PDF Donak Ah Helicopter 5 An Hmang – Sagaing ramthen Khine Oo myone le Depayin myoe sungih PDF pawl donak ah ralhrang ralkap cun Helicopter an hmangih, khua mipi tampi an tlan phah.
July 14 ih doawknak ah ralhrang ralkap cun sun nazi 1:40 hrawngin raldonak Helicopter 5 an hmangih, duhtawk in hnuailam an kap ciamco. Ralhrang in Helicopter an hman ruangah mipi hrekkhat inn a siat phah tin an sim.
Khuami pakhat cun “Zinglam nazi 4 hrawngah Ye Oo in suak ralhrang pawl cu Khin Oo lamzin ah PDF pawlin bomb puah in an rak kap ih, ralhrang 8 an thi tin PDF lam cun an sim. Hmun 3 rori ah ralhrang pawl bomb an puah ih an kap ciamco bet.
‘Ralhrang thi an tam tikah sun nazi 1 hrawngin ralhrang pawl cun raldonak Helicopter an hmang. Kannih mipi cu puak awn kan theih veten khua ah um ngam loin kan tlan thluh. Ralhrang cun helicopter in hnuailam an kap ciamco ih, mipi tlannak lam khal an kap hrim. Asinan, tutiang cu mipi lakin thi an um thu kan theih hrih lo a si,” tin a sim.
A Fanu Zuartu Nupinu An Kai – Thailand ram ah a fanu kum 9 mi zuar ih, mipa in an pawllai video laksak theutu nupinu pakhat cu Thailand palik pawlin an kai ngah.
Thailand ram ah kum 9 nute duhduh in puakcok a silai video a darh ih, Thailand palik pawl cun an zingzoi cih. A tawp ahcun Central Thailand ah kum 26 mi nupinu pakhat le mipa pahnih cu Thailand palik pawlin an kai ngah.
Nupinu kum 26 mi cu hnatuan nei lo a si ih, hna a neih lo ruangah a pasal hmaisa thawn an fa lakin upasawn kum 9 mi cu mipa pawl hnenah a rak zuar theu tin a phuang aw. A leitu mipa pathum pawl cun remnak tuahtu si duh loin an pha rero lai ih, palik pawlin hremnak hmunah thu an sut bet rero hrih.
Nupinu cun a fanu kum 9 mi ih taklawng zuk le zahmawh zuk pawl cu mipa pawl hnenah man nei in a rak zuar hmaisa ih, neta ah zuk lawng a kawng thei nawn lo. A fanu zuk a zuar thei nawn lo laiah mipa pakhat cun a fanu 5000 in lei a dil ih, nupinu khalin a rak siang cih ve. A leitu in a fanu a ihpi lai cu hringtu a nu rori in video a rak zuk ih a zuar bet theu.
Pasal hmaisa thawn fa pahnih nei man a si ih a fanu upa sawn cu mipa pawl hnenah a zuar theumi a si. A pasal cun a nupi ih tuahmi zianghman a theihpi lo thu a sim ih, a fanu upa sawn thawn khawpi sung tivek ah feh caan cu an nei tin a rel.
An paei cun “Thilsual a tuah ruangah ka nupi thawngthlak asile ka fanu pahnih cu keimah in umpi ka duh. Kan fa taktak an silo nan, ka umpinak an rei zo ih, ka fa tattak vekin ka duhdawt hai a si,” tin a sim.
A nui zuar theumi nunau kum 9 nute cu thinlung le taksa tuamhlawmnak sizung ah ret hrih a si ih, a thinlung le taksa a damfel hnu lawngah a umdan ding an relcat leh ding tin Thailand palik cun thu an suah.
Leave a Reply