Chin ramkulh Falam peng Taal khua ih inn hrekkhat pawl cu ralhrang ralkap in July 9 ah an urkang sak ih, inn ziagzat ciah a kang timi an fiah thei hrih lo. Taal khua ah inn 40 hrawng an um ih, ralhrang cun 2021 kum sungah Taal khua inn 11 an rak urkang zo. Tuitum ah inn 10 tlun hrawng a kang zo ding tin reltu khal an um nan, a zat felfai in an fiah thei hrih lo.
Ralhrang ralkap pawl cu Kalaymyo in chin ramkulh saklam pantu pawl an si ih, July 6 ah Falam an rak thleng. July 7 ah Falam suahsan in Hakha an pan ih, Hakha le Falam karlak Falam peng sungah mipi ralkap komkhawm pawlin an rak do.
Taal khua kiangih doawknak ah ralhrang thi an tam tin ralhrang dotu mipi ralkap hrekkhat in an sim nan, a zat an fiah thei hrih lo ruangah le doawknak a um peh rero lai ruangah mipi ralkap lam cun doawkak thuhla famkim an than thei hrih lo. Hrekhat cun Taal khua kiangkap ih doawknak ah ralhrang 20 hrawng an thi zo ding tin reltu khal an um.
Ralhrang ralkap mawtaw 27 cun June 29 ah kalaymyo in Chin ramkulh saklam an rak pan ih, ralhrang mawtaw lakah buangrua phur mawtaw 4 an tel. Ralhrang pawl Hakha ah ziang an tuah ding timi cu felfai in thei a si hrih lo.
Hrekkhat in Thantlang le Hakha karlak ih timit lilawn an tuah tum sipei maw titu an um ih, hrekkhat cun sakhan thar an tuah tum si ding titu khal an um. Hrekkhat cun Hakha ih ralhrang pawl eiin le ralthuam an phurh tum si ding titu khal an um ve.
Ralhrang ralkap pawl Falam in Hakha an feh tikah mipi ralkap pawl cun Falam le Hakha karlak ah ralhrang pawl an rak dotlangpi ih ,doawknak ruangah ralhrang ralkap cun Chunchung, Thlanrawn, Taal, Rialti le Tlangzar khua in mipi inn tamtuk an rak urkang zo.
Tamu Ramri Ih Um Pawl An Khawsuah A Har – Tamu ih India rammi pahnih thah an si hnuah ramri a buai ih hlan vekin mipi pawl sum an tuah thei nawn lo. Cutikah ramri dinhmun thasal lohli ding cu mipi in an beisei ih, ramri boruak sia ruangah mipi pawl an khawruah a har.
Tamu ih um pakhat cun “Mohre le Tamu cu reipi phih theih a silo. Khatlam khatlam in sum tuahnak ah mipi in kan hmang tangkai tukih kum tampi sung lungrual zetin kan umtlang zo. Kanmah khal rualpi vek kan si thluh zo ih, zamrangten ramri fel dingin khuanu khuapa pawlin kan zuam rero.
“Tutiang cu a hlan vekin kan feh thei hrih lo. A tlangpi thuin mipum kan feh thei lo ih, thilri kuat thei cu an um. Ramri Gate ah mipum in kan feh ngam hrih lo ih, khatlam khatlam in kilhimtu pawl an khauh tuk. A hlan vekin boruak a thatsal ding kan hngakhlap tuk a si,” tin a sim.
Tamu ih thi India rammi pahnih cu ralhrang pawlin India lamah a ruang kuat duh loin an urkang ih, cumi ruangah India lam an lungawi thei hrih lo. Asinan, ralhrang tuanpi India cozah cun ramri ih a mipi pawl kiltha dingin commando tiang an thlah. Hivek cingin boruak a dai thei hrih lo cu a si.
CDM Sayamay Kum 15 Hremnak An Pe – Mandalay ramthen Tapikcin myone Zayet khua ih CDm sayamah Cho Yamin Hein cu ralhrang ralkap Court in kum 15 sung thawngtla dingin July 6 ah hremnak an pe fel zo.
Sayamah Cho Yamin Hein cu 2021 ,December 15 ah ralhrang ralkap in an rak kai ih, mandalay thawnginn sungah an khum. Thawnginn sungih khum a si hnuah hremnak an pekmi a si.
A sungte pakhat cun ‘CDM na tuah tlunah PDF pawl thawn pehtlaihawknak nan nei tin ralhrang pawl cun an kai ih, pukmah 50 thawn thubuai an tuahsak. CDM tlunah PDF thawn tuangtlang tin ralhrang cun kum 15 sung hremnak an pe. Ralhrang uknak a duh lo ruangah CDM a tuah nan, PDF thawn pehparawknak a nei lo ih, ralhrang pawlin dik lo zetin hremnak an pekmi a si,” tin a sim.
NLD In Ralhrang UEC An Pom Lo Thu An Suah – NLD party cun ralhrang dinmi UEC thar an pom dah lo ding tin’ mipi theihternak an nei ih, 2020 rampi hrilawknak cu a dikmi le kan cohlanmi a si tin an tarlang.
NLD cun “2020 ,November 8 ih rampi hrilawnak ah zatek sungin 82.36% thawn NLD in nehnak kan rak co ih, mipi in hlutdaw palai 920 an hrilsuak.
“Rampi hrilawknak cu ramleng khalin a dikmi hrilawknak a si tin an cohlang thluh. Hrilawk caan ih UEC tuanvo neitu pawl khalin rampi hrilawknak cu a dik rori a si tin thu an rak suah zo ruangah kannih NLD cun 2020 rampi hrilawknak cu kan pom ih, kan cohlang.
“Asinan, ralhrang ralkap cun mipi duhhrilnak ngaihsak loin rampi hrilawknak ih hriltlinmi pawl cu an rak hlon thluh. Cumi ruangah Myanmar mipi khal lungawi loin lamzawh duhphorhnak tiang a suak. Hivek dinhmun ah ralhrang cun ram mipi le ramleng bum tumin hrilawknak lem tuah an tum.
“Ralhrang ralkap in rampi thuneihnak an lakmi cu anmai tuahmi daan khalin a duh lo ih, anmai tuahmi daan rori khal an pahbal. Ralhrang ralkap cun UEC tuanvo neitu pawl khal an kai ih, hremnak an pek tlunah anmai duhdan vekin UEC thar an dinawter. Cuvek cu kannih NLD cun ziangtik hmanah kan cohlang dah lo ding timi cu 2022, June 25 ih meeting kan neih bangin kan thusuahmi a si,” tin a tarlang.
Ralhrang In AA Biak An Tum – Ralhrang ralkap cun anmah thawn rem aw lole buainak neuhneuh nei thok Rakhine ralkap AA biak an tum tin anmah sungin ralhrang bawi pakhat cun a relsuak.
Ralhrang bawi pakhat cun “Tu ahcun thu felfai zianghman a um hrih lo nan, tlunlam pawlin AA biakrem an tum. Rakhine Party lam khalin theitawk an rak suahpi ve. Khatlam ah remnak pawlkom le Rakhine mipi khalin an rak zuam ve. Tuhrih ahcun zatek sungin 50 a si hrih ih, thu a fel thei hrih lo a si,” tin a sim.
Ralhrang ralkap hotu Min Aung Hlaing in tlangpar ralthuamkai hotu le pawlkom hotu pawl biak a duh thu a relmi ah AA cun ralhrang an biak lo ding thu mipi an theihter zo. Cumi hnuah AA le ralhrang cu rakhine ramkulh le paletwa peng sungah an ngiar phah rero ih, khat le khat an kai aw rero.
Neta bik ahcun ralhrang in karen ih AA sakhan pakhat vanzam in bomb an thlak ih, AA sungtel 6 an rak thi. Hivek pawl a thlen hnuah ralhrang cun AA pawl biak an tumsalmi a si.
Elon Musk Le Twitter An Buai – Leitlun milian bik Elon Musk cun twiiter a lei tumsal lo thu July 8 ah leitlun mipi a theihter ih, Twitter lam an lungawi lo ruangah remawknak a um zo ruangah a takih leiawknak thleng dingin kan buaipi ding an ti ve.
Elon Musk cun $44 Billion in Twitter ka lei dingih, zalen zetin mipi in Twitter an hmang thei ding. Twitter cun Duhsak le thlendan an nei thei nawn lo dingih, zalen zetin ausuah theinak ka pe ding tin leitlun a rak tiam zo.
Asinan, Elon Musk cun Twitter lam an fel lo, account lem thawn pehpar aw in thufel fai in sim dingih kan timi cu in sim thei lo ih, thuthup neih bet an tum ruangah ka leisal lo ding tin a sim.
Twitter lam cun ‘lei aw dingin remawknak ziangkim kan rak nei thluh zo ih, sumpai hlanawk lawng a si thlang. Cuvek can ah pacang thutiam zomi leisal lo ding tivek cu leitlun daan khalin a duh lo. Curuangah kannih cun lei aw dingin remnak tuah zo kan si ruangah a takin thleng dingin kan buaipi ve ding a si,” tin an sim.
Hivek a si tikah Elon Musk le Twitter cu caan reipi sung buai peh vivo thei an si. A lei tumtu in ka lei duh sal lo a ti hnuah a neitu lamin remawknak neih zo hnuah cuvek a theih nawn lo tin an tang ve.
Putin In Anmah Dotu Pawl A Hro – Russia president Putin cun Ukraine ram an domi cu a hramthok fang a si tin’ leitlun simtheihnak a nei ih, a takin tel ngam silo thupten doawknak ih nehnak co tum US le NATO pawl khal nehnak co dingin rak tum phot haiseh tin a simthei hai.
Russia in Ukraine rampi huapih thuahfai an tummi ah US le NATO cun nasaten Ukraine an rak bawm ih, Russia cun Ukraine an do dan an thleng phah. Russia cun Ukraine nisuahnak lam cu nasaten an do ih, zalennak pek fel an tum. Cucu, hram kan thokfang a si ih, biakawk duh hrang sangka khal kan ong ringring tin Putin a tongsuak.
Putin cun “Hrekkhat cu a takin tel ngam silo a thupten raldonak ah an telih nehnak co an tum. Cupawl hnenah ka sim duhmi cu nehnak co dingin rak tum phot haiseh. Ukraine mi dam an umsung cu thlanglam ram pawlin do vivo in tum. Cucu, zianghman theithiam lo Ukraine mipi hrang a poi tuk rori. Hivek ruangah doawknak a sosang sinsin dingin a lang.
“Thlanglam ram pawl cun hremnak phunphun in pe ih, Ukraine cu ralthuam in an bawm bet. Cutin in do rero nan, kannih cu kan tumram kan thlen hlansung dung kan sip lo dingih hram kan thokfang. Hivek dinhmun ah biakawk an duh asile sangka kan ong ringring. Asinan, an khulfung asile doawknak a rei deuhdeuh men ding a si,” tin a sim.
Russia cun 2022 February 24 in Ukraine ram an rak do thok ih, Ukraine ram sungin khawpi hrekkhat khal Russia ralkap kutsung ah a um zo. Tuin ram pahnih thla 5 sung an do aw thlangih Ukraine ram in a tuar nasa tuk zo nan, remawknak zianghman an nei thei hrih lo.
Leave a Reply