Sagaing ramthen Kalaymyo in Chin ramkulh saklam ih feh ralhrang pawl cu July 10 ah Falam peng Tlangzar khua an thlengih, Tlangzar khua in inn 6 an urkang. Ralhrang ralkap cun tui kum May 5 ah Tlangzar khua in inn 17 an rak urkang sak zo. Tlangzar khua in inn hrekkhat an urkang hnuah Ralhrang pawl cu Hakha lam an feh peh ih, July 10 zanlam ah ralhrang pawl cu Ramthlo khua an thlengih, Ramthlo khua ah zan an riak.
Ralhrang ralkap pawl cun July 9 ni ah Falam peng Taal khua in inn 29 an rak urkang zo. Taal khua ah inn 46 an um ih, 2021 ah ralhrang cun Taal khua in Inn 11 an rak urkang sak zo. Tuitum ah ralhrang in Taal khua in inn 29 an urkang betih, a hlanih an urkangmi inn 11 thawn ralhrang ralkap cun Taal khua in inn 40 an urkang zo. Tu ahcun Taal khua in inn 6 ,Baptist biakinn le tlawnginn pawl lawng an him thlang.
Ralhrang ralkap pawl cu Kalaymyo in saklam Chin ramkulh feh an si ih, Falam in Hakha lam feh vivo tum an si. July 10 tiangah ralhrang pawl cu Ramthlo khua an thleng zo ih, lamtluan ah Chin ralkap komkhawm pawl in an do aw phah.
Taal khua kiangih doawknak ah ralhrang 20 hrawng an thi tin Chin ralkap hrekkhat cun an sim nan, doawknak thuhla cu Chin ralkap lamin casuah in mipi theihternak an nei hrih lo. Tlangzar le Ramthlo khua kiang khalah ralhrang pawl cu Chin ralkap komkhawm pawlin an do peh ih, doawknak felfai theih a si hrih lo.
Ralhrang ralkap pawl saklam Chinram an luh tikah Falam le Hakha karlak ah Chin ralkap komkhawm pawlin an rak do tlangpi ih, doawknak ruangah ralhrang ralkap cun Chunchung khua, Thlanrawn khua, Ramthlo khua, Tlangzar khua, Taal khua le Rialti khua pawlin inn tampi an rak urkang zo.
Tuitum ah ralhrang cun Taal khua in inn 29 an urkang sak zo ih, Tlangzar khua in inn 6 an urkang zo. Ralhrang pawl ruangah kiangkap khua mipi pawl cu khua ah um ngam loin hmunhim ih an ruahnak hmunah an tlan thluh. Ralhrang pawl cu Hakha lamah feh vivo ding an si.
Mungzua Ah Yinan Phur Lawng Pahnih A Puak – July 10, zinglam nazi 9 hrawngah Sagaing ramthen Mungzua khawpi kiangih Chindwin tiva ah yinan phur lawng pahnih a puak ih, a kang vuivo.
Yinan phur lawng pahnih puak cu a kangral thluh ih, sun nazi 1 tiang hrawng tidai a kang peh. Yinan phur lawng pahnih puak cu nazi 4 sung hrawng a kangih, kiangkap inn le thilri dang kang kai loin midat le mipi cun kiangkap cu an kilhim thei. Lawng puak kang mit ruangah mithi an um lo nan, meimit lakin mi pakhat a ke a tuahmawh aw ngah.
A hmunih um pakhat cun “Tipi kap ih lawng an retmi ah datsi an thunih, cangsualnak in lawng a puak. Lawng puak ruangah thi cu an um lo. Asinan, a puak ring tukih, a kang nasa tuk. Lawng pakhat cu dot 2 a si ih, a dang lawng pakhat a kangkai bet. Kiangkap ih um hrangah tih a nung ngaingai. Lawng puak ruangah thi cu an um lo,” tin a sim.
Leave a Reply