Ralhrang In Henry Vanthio Thu An Sut Bet – Ralhrang in Daw Suh Kyi thubuai an tuahsakmi thawn pehparaw in rampi vice president U Henry Vanthio cu December 19 ah avei hnihnak hrang thu an sut bet.
Ralhrang cun boruak kilhimnak hrang cozah sumpai retmi cu Daw Suh in Helicopter leinak le sannak ah a hmang tin eiruk thubuai 5 an tuahsak. NLD cozah san ah boruak kilhimnak hrang sumpai kilkhawitu cu Vice president U Henry Van Thio a si. Curuangah ralhrang cun Henry Vanthio thu an suh phahnak san a si.
Henry Vanthio cu Naypidaw a umnak hmunin Naypidaw thawnginn sung Court ah hruai a si ih, ralhrang Court cun thu an rak sut. Thu an rak suh tikah Henry Vanthio cun “Daw Suh in Helicopter a leimi siseh a sanmi khalah sumpai dik lo a hmanmi zianghman a um lo ih daan vekin ziangkim a tuahmi a si,” tin Court ih thusuhnak a let.
Helicopter lei le san thuhla thawn pehparaw in ralhrang cun Daw Suh Kyi cu eiruk thubuai 5 an tuahsak. Ralhrang in Daw suh Kyi eiruk thubuai an tuahsakmi 5 sungin 3 cu kan dung December 12 ah thusuhnak an rak nei zo ih, cumi tum khalah Vice president U Henry Vanthio khal ralhrang Court cun thu an rak sut zo. Tuitum ahcun ralhrang in Daw suh Kyi eiruk thubuai an tuahsakmi 5 lakin pahnih lawng thusuhnak an nei. Eiruk thubuai 3 hrang thu an rak suhfel zo tikah tuitum eiruk thubuai pahnih thawn thusuh an theh.
Thubuai thawn pehparaw in U Henry Van Thio silo, theihpitu 5 dang an rak um ve ih, mi 4 pawl thu an sut fel zo. December 20 ah theihpitu mi pakhat thu an sut fel dingin , cutin Daw Suh Kyi ih eiruk thubuai 5 khal ralhrang Court in thu a then thlang ding.
U Henry Vanthio hi rampi Vice president pahnihnak dinhmun in a umlai ih ralhrng in thubuai pakhat hman an tuahsak lo tin RFA cun a tarlang. Daw Aung San Suh Kyi sawn cu ralhrang in thubuai 14 hrang kum 26 sung thawngtla dingin hremnak an pe zo ih, thubuai 5 pawl cu Court ah rel rero lai an si.
CDF Kutah Ralhrang A Pe Aw – Kachin ramkulh sungih ralhrang tuan pakhat cu ralhrang kuthnuai ah a um paih nawn lo ih, CDF Daai kutah a pe aw tin CDF Daai cun mipi theihternak an nei.
CDF Daai cun “Kachin ramkulh sungih ralhrang senthum pakhat cu ralhrang kuthnuai ah a um paih nawnl o ih, kan hnenah a pe aw. Kan hnenih pe aw ralhrang cu lungawi soparten kan rak hmuak ih hmunhim ah kan kuat. Midang ralhrang pawl khal ralhrang hnuaiah um ringring men loin mipi lamtang dingah kan lo sawm hai a si,” tin thu an suah.
A tufang hi Chin ramkulh sungih cangvai CDF pawl hnenah ralhrang pawl an pe aw tharsal rero. A then cu ralthuam thawn pe aw an um ih, a then cu ralthuam keng lo ih pe aw khal an um. Ralthuam thawn pe aw pawl cu laksawng ah sumpai an rak hlan ve.
Chin Raltlan Pawl Ih Inn An Bauhsak – Chin ramkulh Matupi peng sungih Chin raltlan pawl ih inn cu bauhsaktu an um ih, innsung thilri phunphun an rak laksak thluh.
Raltlan pakhat cun “Khua suahsan in kan tlan tikah raltlan zate ih inn pawl cu an rak bauh thluh. Inn an bauh hnu ahcun zuar theihmi pohpoh an rak la ih, an zuar thluh. Makzet cu ralhrang in mipi inn an bauh ih thilri an laksak cu an sinak a si ih , rel ding ciamco a um lo. Asinan, CD Matupi hmunram sungih raltlan pawl inn khal bauhsak an si tikah kan mangbang ngaingai.
“Raltlan pawl thlenlonak hmun khalah raltlan pawl ih inn bauhsak an si thotho. Curuangah, ram buai thawn harsat ah mipi lakin rukru le inn bauh hmang an um ding tin kan ruat. Inn ih kan retmi lole kan lak man lomi fangfai, thuamhnaw , innsung thilri tivek pawl tlunah kan vulhmi tilva le hmuan ih kan cinmi thlai pawl tiang an hlo. Hivek vivo a si ahcun kannih raltlan pawl inn kan tlun tikah inn lawngpi lawng kan hmu thlang ding. Inn bauhtu thenkhat kan theihmi a um nan, hremnak petu an um lo. Curuangah, CDF Matupi hnenah mipi inn in kilhimsak dingin kan dil duh a si,” tin a sim.
MNYF In Chin Raltlan Pawl An Vehvai – Myanmar ramsung buainak ruangah Mizoram sungih chin raltlan pawl umnak Sihhmui le Sihphir camp cu MNYF mino pawl in kan dung naite ah vehvainak an nei ih, MNYF Vice President cun Ram in ri a nei nan, unau sinak cun ramri a nei lo tin a sim.
MNYF mino Vice Pesident Zodinpuia cun “Myanmar ram sung le Bangladesh ramsung buainak ruangah himnak hawl in kan unau tampi cu Mizoram ah an rung lut. Mizoram ah Myanmar ihsin mipum 40000 le Bangladesh ihsin mipum 300 lenglo an um. Kan unau pawl tuamhlawm dingah tlawmngai pawl, khawhhran le mipi pawl in theitawk an suah. Myanmar ram ihsin ratlan luttu pawl hrang rori ah Mizoram sungah camp 160 tiang tuah sak a si zo.
“Ramkulh dang pawl ahcun ratlan in India ram sung an ra lut tum nan, Police in an rak kai ih thawnginn ah an kum. Asinan, Mizoram ahcun CM ih kaihruainak in raltlan pawl hnangam zetin nan um thei a si” tin raltlan pawl a simthei.
Mizoram acozah cun raltlan tlawngta minung 6000 lenglo tlawng an kaiter ih an tulmi cabu le tul dangmi pawl khal a lak in a bawm. Myanmar le Bangladesh in Mizoram raltlan pawl bawmnak dingah ramkulh acozah cun acozahpi hnenah a thu a thlen nan, India rampi cun daan vekin UN Refugee a cohlan lo ruangah Refugee dinhmin in India rampi cun raltlan pawl an bawm thei lo tin an rak simmen. Cuvek cingin Mizoram cozah cun Chin raltlan pawl cu anmahten theitawkin an kilkhawi rero hai.
World Cup Final Zoh Ralhrang An Kap – Sagaing ramthen Maing khawpi ah ralhrang ralkap pawl World Cup an zoh lai kan kap tin MRA cun thu an suah.
MRA cun “December 18, zan nazi 9:30 hrawngah a si. Ralhrang pawl cu penguk zung, cozah inn le palik sakhan le ralhrang sakhan tivek pawlah World cup an rak zoh. Culai fangah kannih cun kan kap ih, in rak kap ve tikah minute 30 sung hrawng kan kap aw. World cup final a um ding timi kan theih veten cangvai dingin timtuahnak kan rak nei cia thluh.
“Feh zetin ralhrang pawl kan kap ngah nan, ralhrang thizat tivek cu kan fiah thei lo. Hmailam khalah hivekin cangvaih vivo kan tum. Felfaiten timtuahnak kan nei cia dingih ralhrang lam ralrin lo laiah kan kap theu ding. Tuitum ah kanmah mipi ralkap pawl cu kan him. Kanmah MRA lawng siloin Maing PDF, MN PDF, Mungzua PDF pawl thawn ralhrang kap kan si,” tin mipi an theihter.
Beer Dawr Ih To Palik 4 An That – Sagaing ramthen Salinkyi ah Beer dawr ih to ralhrang palik pawl cu PDF komkhawm in an kap ih, palik 4 an thi tin mipi an theihter.
Salingyi PDF cun “Beer ih to ralhrang ralkap pawl cu kannih mipi ralkap komkhawm in an kap. Ralhrang pawl khalin in rak kap ve ih, mipi lamin mi pakhat ralhrang pawlin an kap that ngah. Beer dawr ih to ralhrang palik 4 pawl cu kan kap that ih, meithal zun 3 kan ngah.
“Tuitum ah kanmah lawng siloin mipi ralkap komkhawm 5 in ralhrang palik pawl kan kap. A hmunah ralhrang palik 4 an thi ih, meithal zun 3 kan laksak thei a si,” tin mipi an theihter.
Ralhrang In NLD thuronpetu An Tong – Ralhrang ralkap palai Do Man Nyein Maung cun December 19 ah NLD thuronpetu U Tin Oo a tong tin U Tin Oo sungte pawl cun an sim.
An sungte pakhat cun “Minute 15 hrawng an be aw ih, cumi hnuah ralhrang palai cu a tinsal. Ziangpipa an rel cu ka thei lo, ralhrang palai cun a harhdamnak ka ra zoh men tin a sim. A hlan khalah thei aw cia an si tikah rak leng hrimhrim khal a si thei,” tin a sim.
NLD thuronpetu U Tin Oo hi zeng natnak nei a si ih , tu ahcun thatlam a pan rero thlang tin a sungte pawl cun an sim. Ralhrang ralkap hotu Min Aung HLaing khalin kan dung kumah NLD thuronpetu U Tin Oo a rak tong ve zo. U Tin Oo hi 1974 kum in 1976 kum tiang ralbawi dinhmun in ralkap rak tuan a si ih, 1988 kum ih NLD dintu lakah a rak tel ve.
Leave a Reply