Sagaing ramthen kalaymyo thlanglam Myintar tiva tluan kiangih um raltlan umnak hmun pakhat cu ralhrang pawlin may 22 zingah ralthuampi in vei 50 tlukin an kap ciamco ih , raltlan mipum 80 umnak buk pawl khal ralhrang pawl cun an urkang sak thluh.
Myintar tiva tluan cu ralhrang in rampi thuneihnak an lak hnuah Kalay PDF le ralhrang pawl doawknak hmunpi deuh a si ih, doawknak ruangah kiangkap khua mipi tamzet cu khua ah um ngam loin an tlan thluh. Ralhrang pawl cun mipi tlan khal an hnaihnok vivo ih, an beunak buk le inn tiang an urkang vivo phah. Cucu, ram buai hnuih raltlan mipi an dekcok dan a si.
Raltlan pakhat cun “Inkyaw khua ih riak ralhrang pawl cun May 22 zingah kan umnak lam in pan. Raltan umnak hmunih ralhrang pawl an rat ruangah kannih raltlan pawl cu hmundang ah kan tlan sin. Ralhrang pawl kan umnak hmun an thlen hlanin ralthuampi thawn in kap ciamco ih, kan umnak an thlen tikah umnak buk siseh thilri ziangkhal an urkang thluh.
“Khua ih kan suah tikah inn ih ret ngam lomi thilri tampi raltlan umnak hmunah kan phur ih, kan ret. Cupawl khal ralhrang pawlin an urkang tel thluh. Ralhrang pawlin ralthuampi an kahmi ruangah raltlan mipi 3 khal hriam an ngah phah a si,” tin a sim.
Ralhrang pawl cun “Kalaymyo thlanglam Inkyaw khua kiangah hmunram thianfainak kan nei ih, PDF sakhan pakhat kan thianfai thei. PDF sakhan kan thianfaimi cun kuttuah meithal zun 2, kuttuah bomb 1,fawm 1, micet 1, thir tannak 1, tungbing 1 le thilri dang khal kan laksak thei a si,” tin thu an rak suah ve.
CDF Fawm Thawn Zuk Aw Chinnu An Kai – Ralhrang ralkap cun Hakha in Yangon feh tum Chinnu pakhat cu lamzin Check Gate ah an rak cek ih, CDF fawm thawn a zukawkmi a phone sungih an hmuh ruangah an kai.
Ralhrang ralkap cun “Hakha khua cawbuk vengih Check Gate ah Hakha Mann mawtaw ceknak kan nei ih, Hakha in Yangon feh tum, CDF sungtel Hakha peng Ngaphaipi khuami pakhat kan kai ngah a si,” tin thu an suah.
An sungte pakhat cun “CDF sungtel a silo timi cu kanmah tlunah khuami zatein kan fiang thluh. Khua ih CDF pawl an rat caan ah CDF fawm in a rak zuk aw ve. Cucu, Yangon a feh ding zawngah a hlon theihhngilh ih, an cek tikah a zuk an hmu. Cucun, ralhrang pawlin CDF ah an ret cih ih, an kai siko,” tin a sim.
Meithal Zunhnih Thawn Palik A Pe Aw – Makui ramthen Gandaw District Htilin myomah palik sakhan ih palik hnatuan pakhat cu ralhrang uknak a duh lo ruangah meithal 2 le cekrek tamzet a tlansuahpi ih , mipi ralkap kutah a pe aw.
Mipi kutih pe aw Palik cu 2021 kum lamah CDM a rak tuah zo nan, mipi ralkap lamih a rak tlan thei lo ruangah a himnak hrnag palik sakhan ahcun hna a rak tuan peh. 2022, May 10 ahcun mipi ralkap lam a pehtlaih thei ih, meithal 2 le cerek tamzet thawn a tlan hnuah mipi kutah a pe aw.
Mipi ralkap lam khalin meithal zunhnih le cerek tamzet thawn an hnenih palik pe aw cu laksawng ah ting 110 an rak pe ve. Hivek cu mipi ralkap pawl ih tuah dan hrimhrim le thu an tiam ciami a si ih, ralthuam thawn mipi lamtang cu laksawng tha tuk pek an si.
Mipi hnenih pe aw palik cun “A takin PDF pawl cangvaih dan ka hmuh tikah ka upat hai tuk. Tu ahcun mipi ralkap pawlih duhdan vekin ka um vivo dingih, a tulnak hmun hrang dothlengnak ih tel dingin ka man zo a si,” tin a sim.
Rakhine Ah Doawknak Thawmvang An Thei – Rakhine ramkulh Ann khawpi sung hmun tampi ah meithal puak awn le doawknak thawmvang kan thei tin khuami pawl cun BBC an simthei. Puak awn le doawknak thawmvang an theih caan cu May 22, zan nazi 10 in a si tin an sim.
Mipi cun Ann khua vanzam cawlhmun lamin le ralkap pawl umnak hmun lamin puak awn an thei ih,ralhrang pawl cun an sakhan in ralthuampi an kap suak rero tin an sim. Zan nazi 10 hrawngin puak awn an theihmi cu minute 15 sung tluk a awn ih, ralthuampi 50 hrawng an kap suak tin an sim.
Ann khua ih um pakhat cun “Zan nazi 10 hrangain puak awn kan thei. Ralthuampi a puak durdo rero tlunah meithal puak awn khal kan thei. Khawpi kiangkap khalah a puak durdo rero. Cuti cingin, doawknak ruangah puak a si maw?ralhrang in anmah ten an hmet puak rero men timi cu kan fiang ve lo.
“Zan a si tikah zohman lengah kan suak ngam lo ih, kan fiah ngam lo lawlaw. Ralthuampi puak awn le meithal puak awn cu kan thei rori. Sittwe khawpi khalah ralhrang pawl an thleng betih, Taungkuk myome Kin Tuang khua ih phungki tlawng khalah ralhrang pawl umhmun an khuar zo,” tin a sim.
A tufang Rakhine ralkap AA le ralhrang karlak thuhla a tha lo zetih, Rakhine mipi cun doawknak picang a suah ding an phang lawlaw.
Leave a Reply