Ralhrang In Chin Unau Hnihte An That – Ralhrang ralkap in August 14 ah Chin ramkulh Tedim peng Haimual khuathar an rak luhcilh ih ,Mipi inn 15 lenglo an urkang tlunah Chin unau hnihte an rak kai ih, an that.
Ralhrang ralkap cun Haihmual khuathar an luhcilh ttum ih tlan man lo Lal Nun Puii ( kum 17 ) le Lal Ruat Mawia ( kum 15) tei pahnih an rak kai ih, a ni August 14 ah an rak that cih.
Khuami pakhat cun “August 14, sun nazi 2 hrawngah Ralhrang pawl kan khua lamin an ra timi kan theih veten zamrang zetin kan tlan ciamco hngal nan,thenkhat tlan man lo pawl cu ralhrang ralkap in an kai. A thok ahcun mipi ralkap pawlin ralhrang pawl an rak kap nan, ralthuam le mipum an thlauawk tuk ruangah mipi ralkap pawl dung an sip. Cuveten ralhrang pawl cun an duhmi inn an pan hngal ih, inn ih rak um tleirawl unau hnihte an kai.
“Thil umdan kan zoh tikah ralhrang pawlin thuhla an thei cia in a lang. Dalan in ralhrang pawl thuhla a simfel thluh cia si ding, inn an thei tukih, an pan hngal. An kaihmi unau hnih cu khuasung khalah an hrem, an vuak phah. Cutikah kannih cun Kan ngaihtuah tukih, kan seherh tuk nan, tithei kan nei fawn lo.
“August 16 ahcun khua ah ralhrang pawl an um nawn lo tin thuhla kan thei ih, khua thianfai dingin khua kan pan. Cumi ahcun kan khua thlen hlan lamzin zir ah ralhrang pawl ih miphummi kan hmu ih, kan phorh tikah kum kim lo unau hnihte an si.
“Ralhrang pawl cun kan khua in Inn 15 lenglo an urkang. Inn hrekkhat an bauh ih, thilri an laksakmi khal a tam. Tu ah mipi cu hahdamten kan um thei hrih lo ih, thinheng riahsia, ninghang le ralhrang tih in caan kan hmang hrih a si,” tin a sim.
Haimual khuathar cu Falam peng Rihkhawdar vengthen Tio kiangte a si ih, Tio le Kalay lamzin tluanih um khua pakhat a si.
Mindat Ah Innsang 1 Fangfai Dip 1 Lawng Kol An Siang – Chin ramkulh Mindat khawpi ah ralhrang pawlin Innsang khat hrang fangfai dip 1 lawng kol an siangih, innsang hrekkhat an buai phah zet tin’ Mindat khawpi sungih um pawl cun an sim.
Mindat ih um pakhat cun “Biaknak lamih hruaitu pawlin ralhrang hnenah fangfai siansak dingin an di lih, ralhrang lamin an sian hnuah mipi tangka thawhkhawm cun fangfai kan cah. Innsang cazin tamsawn cu fangfai dip 10 tivek tla an cah theu nan, leifel a si tikah ralhrang pawlin inn ih ret thluh an siang lo ih, Biakinn lole phungki tlawngah an ret
“Inn ahcun innsang khat hrang fangfai dip 1 lawng ralhrang pawlin kol an siang ih, culo kan leiciami khal biakinn lole phungki tlawng ah kan ret. Inn ih kan fangfai a cem tikah kan leiciami fangfai cu an kiltu pawl hnenah kan dil ih annih in ralhrang in dilsak bet hnu lawngah kan la theii.
“Kan leiciami fangfai khal thu kan nei lo ih, kan innah kan ret thluh thei lo. Cutikah a har tuk lawlaw. Hrekkhat innsang cazin tam pawl cu fangfai an ei cem lohli ih, an leiciami khal zangfah va dil ih lak a tul. Kan fangfai dip khalah thu kan nei lo a si,” tin a sim.
Ralhrang in rampi thuneihnak an lak hnuah Mindat CDF le ralhrang pawl cu Mindat khawpi sungah an rak do aw ciamco dah ih, mipi tuar ding an phan tuk ah Mindat CDF pawl cun Mindat khawpi an rak suahsan. Cumi hnuin ralhrang pawl cun Mindat khawpi an uk ih,tuini tiang Mindat khawpi cu ralhrang kutah a um hrih.
UN Palai Myanmar A Feh – Ralhrang in rampi thuneihnak an lak hnuah UN palai Myanmar ah a feh tin UN cun thu an suah.
Tuitum cu UN in Myanmar palai hrang Noeleen Heyzer an ruat hnuah avei khat Myanmar a tlawnnak a si ih, 2021 October thlah UN cun Myanmar palai thar ah an rak ruat. A hlan ahcun US mi Christine cu UN in Myanmar palai ah an rak hmang ringring nan, a caan a cem tikah Singapore miphun Noeleen Heyzer in a sawng.
UN in Myanmar palai ih an ret hnuah Noeleen Heyzer cun Myanmar feh a rak tum rero zo nan, ralhrang lamin an rak siang lo. Tuitum ahcun Myanmar ah UN Myanmar palai Noeleen Heyzer a tlawng tin UN lamin mipi an simthei. UN Myanmar palai cun Myanmar a umsung ah biak tulmi pawl biak ih, Myanmar ram buainak ah remnak um dingin zuampi a tum. A kualtlawnnak a hlawhtling maw timi cu UN lamin mipi an theihter leh dingah ruah a si.
Malaysia In ASEAN An Nor – Ralhrang ralkap in rampi thuneihnak an lak hnuah Myanmar mipi dinpi ringringtu Malaysia cun ASEAN pawlkompi cu ralhrang lawng siloin NUG khal be thlang dingin an nor ih, ralhrnag pawl biakin umzia a nei tam lo tin an sim.
Malaysia ramdang palai cun NUG be dingin ASEAN pawlkompi a sawm tlunah ralhrang ralkap pawl khal kaihmi pawl thlah zalen thluh dingin le remnak tuah dingin a simthei hai.
Malaysia ramdang palai cun “Ralhrang pawl remnak 5 kan tuahpi nan, pakhat hman an pitlin lo tlunah remnak kan tuahmi 5 lakin tuah lo dingih an lungkimmi pawl khal an tuah rero thotho. Curuangah, ralhrang lawng biak rero umzia a nei lo ih, NUG lam khal be ding kan si,” tin a sim.
Ralhrang ralkap cun Myanmar ram buainak ah remnak a um lohli nan um asile kan cangvaihnak in theihpi uh,remdaihnak hrang theitawk kan suah rero lai. NUG le CRPH tivek cu be lamlam hlah,buainak tuahtu sawn an si tin ASEAN pawlkompi ca an rak kuat zo.
Leave a Reply